Ads by Google Ads by Google

Fagogo: O le Sone Vevela

Vaega: 33

 

Taeao manuia i le mamalu o le atunu’u, tatou fa’afetaia ai pea le alofa ma le agalelei o le Atua Soifua, ona o Lana tausiga alofa mo i tatou lea ua mafai ai ona o tatou aulia mai lenei aso e fa’aopoopo i aso o lo outou soifua fa’apea ma si o’u nei ola. Ae alo maia, o le a toe fa’aauau atu la tatou tala fa’asolo e pei ona masani ai.

 

Na muta mai la tatou tala ina ua sauni nei Nancy Jaax e alu i totonu o le potu lea o lo’o i ai le virusi o le Ebola. A’o le i alu le tagata i totonu o le potu lea, e tele sauniuniga e tatau ona fai, aua le malu puipuia o le tagata. O lea la ua tu nei Nancy i totonu o le potu lea, e fai ai ona lavalava e alu ai i totonu o le potu lona 4 lea o lo’oi ai le virusi o le Ebola.

 

O le suti lea ua fai nei e Nancy o le suti lanu moana, fai mai o le suti lea ua uma ona fa’amanonia e le au su’esu’e a vaega ‘au a le Malo Tele o Amerika. O suti nei e faia e tagata e su’esu’ea so’o se vaila’au o’ona lava, lea la ua fa’aaoga fo’i e le au su’esu’e lea a le Ami mo le virusi o le Ebola.

 

E tele mea e ao ona fai e le tagata ina ia mautinoa ai, ua ta’oto lelei le suti lanu moana lenei i lona tino. Ia mautinoa ua mau lelei le fa’amauina o lima o le suti, ona o lima lava e u’uina virusi ma gaioi e fa’atino ai a latou galuega i totonu o le potu numera 4 lea o lo’o i ai le virusi Ebola.

 

O le suti lanu moana a Nancy ua uma ona tusi ai lona fa’ai’u, Jaax, ma atonu sa fa’anatinati Nancy i le tapenaina o lona suti, atonu fo’i sa i ai se mea o le vaega o le suti ua le mau lelei, atonu fo’i sa le i alu i ai lona mafaufau i le faiga o lona suti a’o le i alu i totonu o le potu numera 4 lea o lo’oi ai le virusi o le Ebola.

 

Na savali atu nei Johnson ua fa’amau le pulou o Nancy, o le pulou lea ua uma fo’i ona su’esu’eina e le vaega a le Ami, ma iloa ai, ua malu puipuia lelei mo galuega fa’apea i totonu o potu o lo’o i ai virusi. Ina ua uma ona faia ia tulaga, ua o’o nei i le taimi e tapunia ai le suti lanu moana lenei i ona itu uma lava, e aofia ai ma le pulou. O le taimi lava na faia ai lea mea, na matua’i ufitia mata o Nancy Jaax i le ao, ua nenefu ma ua tau le mafai ona iloa le isi itu o le potu.

 

Na a’apa atu nei Nancy ma toso mai le fa’aga’au lanu samasama ma sulu loa i lona suti, o le taimi lea ua amata ona fefete le suti ona ua sao i totonu le ‘ea lelei lea, ma ua amata ai ona tau kilia le va’ai.

 

O lo’o i ai fa’amatalaga i totonu o le Ami ae maise o le aufaigaluega o lo’o galulue i le vaega lea a le Ami e fa’apea, e le iloa lava le taimi e fefe ai ma popole ai le tagata, pe a o’o ina fa’aaoga le suti lanu moana lea, ona fai mai, o le taimi lava e tapunia ai le suti, o lona uiga, ua na o oe lava ma le lalolagi. Ua leai lava se isi mea e ao ona fai. Ae o le tagata e to’a lona loto ma iloa lelei lana galuega, o le tagata lea e sao mai ai.

 

Fai mai o nisi tagata, o le taimi lava e tapuni ai le suti lanu moana lea ma fa’amau le pulou, ua le mautonu o latou mafaufau, pau le mea ua taumafai e fai, o le sasae ‘ese, ua amata ona tafe lauga’o ifo le afu, ua tete atoa le tino, ma i’u ai ina pau ifo i luga o le foloa.

 

E faia pea…

 

Fa’aliliu: Akenese Ilalio Zec