Ads by Google Ads by Google

Fagogo: O le Sone Vevela

Vaega: 4

 

Fa’amalo le onosa’i i le mamalu o le atunu’u, a’o alo atu i tiute ma galuega o lo’o feagai ai i lenei aso. Tatou fa’afo’i pea le vi’iga ma le fa’afetai i le Atua, ona o Lana tausiga alofa mo i tatou i aso uma, lea ua mafai ai ona o tatou toe alafa’i mai i le manuia i lenei aso, o se aso fo’i e fa’aopoopo i aso o lou soifua ma si o’u nei ola. Ia manuia le alo atu i feau ma galuega o le a feagai ai i lenei aso.

 

Ae alo maia, o le vaega lona fa lenei o la tatou tala fa’asolo, “O le Sone Vevela”. E fa’amanatu atu pea i le mamalu o le au faitau, o lenei tala o se tala moni lava i le mafua’aga na tupu mai ai le fa’ama’i o le AIDS ma ua a’afia ai le lalolagi atoa. Tatou tatalo pea i le Atua, ina ia fa’aitiiti o tatou tagata e maua i lenei fa’ama’i, ma ia malu puipuia pea i tatou e Ona a’ao alofa i aso uma o lo tatou ola.

 

O lalo ifo o le Mauga lenei o Elekone (Mount Elgon) e lauusiusi le ola o la’au, ma o se nofoaga fo’i e matagofie tele, o le ala fo’i lea ua fa’aaiga ai e le tele o Ituaiga tagata i totonu o Aferika. O le isi itu o le Mauga o Elekone, ua avea ma Paka Fa’asao, ma o le ala lea na tu ai le ta’avale a Tiali Moneti ma lana uo tama’ita’, ina ia totogi le tupe e ulufale ai.

 

Fai mai o le Paka Fa’asao lenei, e nofonofo ai i luga o le la’au e lata ane i le faitoto’a se manuki, ma na iloa atu e Tiali ma ua tu’u loa i ai le fa’i pula e ‘ai ma le manuki. Sa avea lea ma ala na ‘ata ai lana uo tama’ita’i, ma sa leai se tasi na toe minoi a’o faia pea le tausamiga a le manuki.

 

Ina ua ma’ea lea, ona toe alu lea o le ta’avale a Tiali ma lana uo tama’ita’i, ma ua tau atu nei i se nofoaga o lo’o ola mai ai le mutia, ma o lo’o si’omia e se vaitafe o lo’o tafe lemu ifo mai le papa ‘ele. Ua to ai nei le fale tapoleni o Tiali ma lana uo, ona ua o la iloa le matagofie o lea nofoaga. O le nofoaga lea ua malolo ai nei Tiali ma lana uo tama’ita’i, o se nofoaga ua matua’i sili ona matagofie, o le tetele o la’au o lo’o i talane o le vaitafe, ma ua avea lea ma fa’apaologa i le faleie ua i ai nei Tiali ma lana uo.

 

O le nofoaga tonu fo’i lea, o lo’o i ai le tele o manu, e fai o manu felelei a’o manu vaefa, ua avea le nofoaga lea ma o latou ofaga. E tele fo’i elefane e nonofo ai i le nofoaga lea, fai mai o le mafua’aga lea na manatu ai Tiali e to ai le la faleie, ona e fiafia tele lenei ali’I i manu. O le po tonu lava o le vaeluaga, o le Tausaga Fou, na fai lava si timuga o le po, ma o le ala lea na nonofo ai pea Tiali ma lana uo tama’ita’i i totonu o le la fale ie,  ai pe sa fa’amanuia ai le Tausaga Fou, i lea taimi.

 

Ae ina ua o’o i le taeao o le Tausaga Fou sa tu’ua ai loa e Tiali ma lana uo teine le nofoaga lea, ae o la a’ea loa le mauga o Elekone (Mount Elgon). Ua alu nei le la ta’avale ma ua paka i lalo ifo o le mauga o lo’o i ai se ana, ma ua fa’aigoa lenei Ana o Kitum Cave. Sa mata’ina pea e Tiali ma lana uo tama’ita’i, le alu atu o le solo a elefane ma savavali sa’o i totonu o le ana lea o lo’o malolo ai nei. Sa iloa atu fo’i e Tiali le tele o isi ituaiga manu o lo’o feoa’i solo i luma tonu lava o le gutu o le ana.

 

Ua fa’asolosolo ona alu a’e le pouliuli ae ua nonofo ai pea Tiali ma lana uo i lea mea, ma sa o la maitauina ai le alu atu o le solo fa’aniutu a elefane ma o i totonu o le ana. Na avea lea ma fa’aoso manatu i a Tiali ma lana uo ona ua o la fia iloa, po’o le a le mea ua alu ai le solo a elefane i totonu o le ana. Na ki nei e Tiali le moli uila lea na o atu ma la’ua ma aga’i loa i totonu o le Ana lenei ua fa’aigoa o le Kitum. O totonu o le ana e tele lava, ma ua aga’i atu nei le va’aiga a Tiali ma lana uo tama’ita’i i totonugalemu o le ana, ma na la iloa ai, o le ana lea e momoe ai lava elefane, fa’atoa o mai i fafo i le ao.

 

Ua ki nei le moliuila a Tiali ma iloa ai le anoano o pe’a o lo’o taupe mai i luga o la’au lea o lo’o ola i totonu o le ana, ua fa’asolosolo pea le savaliga a Tiali i totonu o le ana ma o se va’aiga matagofie sa o la molimauina i totonu o le ana e igoa o le Kitum o lo’o i le Mauga o Elekone.

 

E faia pea

 

Fa’aliliu: Akenese Ilalio Zec