Taeao manuia i lou alafa’i mai i fanuga lelei o lenei aso fou, o se aso e fa’aopoopo i lou soifua fa’apea ma si o’u nei ola vaivai. E ao ai ona o tatou fa’apea ifo, “Le Atua Mamana e, afai e iu sa matou galuega, ma ua o matou iloa ua manuia, ona o matou fa’apea ifo lea, le Ali’i e, e fa’asilisili lava Oe, i mea uma matou te manatu i ai, e leoleoina ai i matou e ala i le Mana o Lou Agaga Paia, ia fo’i atu lava le vi’iga ma le fa’ane’etaga i Lau Afio, nei, se ia o’o i le fa’avavau, fa’avavau lava, Amene.”

O le vaega mulimuli lenei o la tatou tala fa’asolo, “O le Sone Vevela,” Ma e i ai le fa’amoemoe maualuga ua fa’amalieina lou finagalo i se taumafaiga a le auauna vaivai. Ae afai lava sa i ai se upu ua pa o papa, pe ua le tau tamali’i fo’i i lau fa’afofoga’aga ma lau faitau, ou te tatalo atu, le faiva o Fiti ia lililo. Aua ou te talitonu, o lo’o i’ina le tofa ma le fa’autautaga e malu ai le auauna vaivai.

O le a fo’i le musumusuga a le Agaga Paia ua foa’i mai, ma ua mafai ai ona fa’atino lenei galuega, o le vi’iga lava ou te fa’afo’i i le Atua Soifua, ona o Lona alofa ma lona agalelei, o lea o lo’o maua ai pea le ola, ae maise o manatu ma mafaufauga lelei e fa’atautai ai lenei taumafaiga.

Manatua, o lenei tala o se tala moni lava, o tagata fo’i o lo’o ta’ua o latou suafa i lenei tala, e moni ma fa’amaoni. O virusi fo’i na tutupu i la vaitaimi ma a’afia ai ola ma soifua o tagata, e moni ma fa’amaoni. Ae ia o tatou nonofo sauniuni pea ma o tatou tapenapena, ona ua o tatou va’aia pea suiga ua i ai nei, e le gata i le si’osi’omaga fa’alenatura o le tagata soifua, ae ua a’afia fo’i ma le si’osi’omaga o so’o se meaola ma so’o se la’au.

Ia o tatou fa’atuatua pea i le Atua, aua o la o lo tatou olataga ma lo tatou maluapapa i taimi o ma’i o le tino, o faigata ma puapuga e o’o mai i a i tatou, ma ia o tatou fa’atagisia pea lona mana fa’aola, ina ia o tatou malolo ai.

Ae avea lenei avanoa ua ou maua, e momoli atu ai la’u fa’afetai tele i le mamalu o le atunu’u, ae maise o i latou o lo’o fiafia e faitau i a tatou tala, e ala i le tautua matavela a le Nusipepa o le Samoa News, fa’afetai, fa’afetai tele, ma ia fa’amanuia le Atua i faiva ma tiute o le a feagai ai i lenei aso.

Ua fa’aauau pea le maimoaga a le ali’i tusitala o Richard Preston i le nofoaga sa tausi ai manuki ia na avane mai Filipaina i totonu o Amerika. O le virusi fo’i lea sa finau ai le vaega a le Ami i Fort Detrick ma le Vaega a le C.D.C i Atlanta, o lea ua o latou fa’aigoaina o le Ebola Reston. O le mafua’aga, ona o Reston na mafua atu ai, ona o manuki ia na mama’i ma mamate i totonu o le nofoaga lenei.

A’o tau autilo pea le ali’i tusitala o Richard Preston i totonu o le fale lenei, na ia va’aia ai ua matua’i lanu ‘ena’ena atoa le fola o le fale. O lona uiga sa fa’aaoga e le Vaega a le Ami ia vaila’au e fa’amama ai le fale atoa.

Na fa’asolosolo pea lana va’ai, ona o lo’o loka mau pea le fale atoa, ae sa maua lava lona avanoa e ala i lona tau autilo i totonu o fa’amalama o le fale. Fai mai na ia iloa atu ai le aupogaleveleve tele lava. Ona ia manatua ai lea, o le pogaleveleve, e sau ai i fafo le suavai lanu samasama, o lona uiga, ua tu’ufua le aupogaleveleve, ma o le a amata fo’i le ta’amilosaga e olaola ai pea ma tu’ufua i totonu o le fale.

Ua i ai le isi ola i totonu o le fale lenei na tausi ai manuki ia na maua i le virusi i totonu o Reston. O potu nei na ola ai fo’i le virusi o le Ebola ma o lea ua toe fo’i i le toga vaomatua e fa’atalitali mai ai, ae e toe sau, e i ai le taimi e toe sau ai.

Soifua …

Fa’aliliu: Akenese Ilalio Zec