Taeao manuia i le alafa’i mai o le atunu’u i fanuga lelei o lenei aso fou, malo le soifua, malo fo’i le onosa’i i faiva ma tiute o lo’o feagai ai i lenei aso. E ao ai ona o tatou fa’apea ifo, “Le Tama e, oi le lagi, ia paia Lou Suafa, ia o’o mai lou malo, ia faia Lou finagalo i le lalolagi e pei ona faia i le lagi, Amene.”

Fai mai le fa’amatalaga a le ali’i tusi tala o Preston, a’o alu le la ta’avale ma le ali’i o Robin McDonald, ua tutu lana sikaleti ma tilotilo ane ia te ia, ma fesili loa. “O le a la lau fuafuaga o le a fai pe a ta taunu’u i le Ana o Kitum?” O le a e aoina mai ni faua po’o fa’afiafiaga a pe’a, (tae pe’a) po’o le a nisi mea?

Na tali le ali’i tusi tala, “E leai, na o lo’u fia matamata lava ma tilotilo i totonu o le Ana o Kitum.” Na toe fa’apea ane le ali’i o McDonald, “Sa masani ona ou alu i luga o le Ana lea i aso ua mavae, o le Ebola ma le Malburg e foliga mai o se ma’i e mata’utia tele, o lona uiga e a’afia uma ai le tino atoa o le tagata, o le fa’amatalaga lea, e sa’o, ae o le a la le umi.?

Na tali le ali’i tusi tala o Preston “E fitu (7) Aso.” Na toe fa’apea ane le tala a le ali’i o Robin, “Oka, e fa’apefea ona maua ai le tagata.?” Na tali le ali’i tusi tala o Preston, “E mafai ona maua ai oe, pe afai ua e pa’i i le toto o se tagata ua a’afia, e i ai fo’i le masalosaloga e maua e ala i le manavaina o le ea, e maua fo’i le tagata pe afai o le a fai se feusua’iga fa’aleulugali’i i le va o le tamaloa ma le fafine, po’o se teine ma se tama.”

“E pei o le AIDS, o le uiga le na o lau tala.” Na tali le ali’i tusi tala, “Ioe, o le a fufula  fuamiti po’o polo, (se’i tulou), ma o le a va’ai ai ua lanu uliuli ma lanu moana malosi.”

“E a?, o lona uiga, o le a papa polo? Manaia! O le a pei au polo po’o fuamiti o polo a le manuki, Oka! Oka e,! Na toe tali le ali’i tusi tala, “O lena ua e fa’amatala au’ili’iliina mai le fa’ama’i.” Fai mai le fa’amatalaga a Preston, ua manava i totonu e Robin le asu o lana sikaleti ma lulu lona ulu. Ua ave’ese le pulou mai lona ulu ma tau fa’asa’osa’o lona lauulu, ona toe tu’u ai lea o lona pulou.

“Sa’o, o le a e alu i totonu o le Ana ona e tilotilo lea i feau a pe’a. Ona…ona a’afia lea o oe, o le a le mea o le a fai ia te oe?” Na tali le ali’i tusi tala, “Aua ne i e pa’i mai ia te a’u. E te ma’i ai, pe afai o le a e tago mai ia te a’u. Na ona ta’ai’ai lava o lo’u tino i le fale’ie ma afifi ai, ona ave loa lea o a’u i le falema’i.”

Fai mai ua ‘ata le ali’i o Robin, ma tilotilo ane ia te ia, “Sa’o. O le a vala’au foma’i Flying Doctors. O i latou ia e fa’atautaia tulaga ia. O fea la le falema’i e ave i ai oe, a?” Na tali le ali’i tusi tala, “Ave a’u i le falema’i o Nairobi, ona tu’u lea o a’u i fafo, ae logo vave foma’i.”

“Ia ua lelei ali’i Boss, o le mea sili ua ou iloa le mea e tatau ona fai, pe afai o le a e ma’i mai i luga o le mauga.” Ua alu pea le ta’avale a Richard Preston ma le ali’i polofesa tulimanu o Robin McDonald, ma ua la iloa atu le mati’eti’e maualuga e igoa o le Cherangani Hill.

Ua o la va’aia le puaoa ma ua amata fo’i ona olioli mai timuga i lea taimi. Na tilotilo nei le ali’i tusi tala i le matagofie o le laufanua, o la’au ua lau usiusi, o le vaomatua ua matua’i tetele lava, ae maise o le auala lea o lo’o la uia, ua fai lava si va apiapi. Ua ata le ali’i tusi tala ma tilotilo ane i lana paga, le ali’i o Robin McDonald.

E faia pea…

Fa’aliliu: Akenese Ilalio Zec