Fa’afeiloa’i atu ma fa’atalofa atu i le mamalu o le atunu’u, i lou alafa’i mai i fanuga lelei o lenei aso fou, o se aso e fa’aopoopo i lo outou soifua fa’apea ma si o’u nei ola vaivai. E ao ai ona o tatou fa’apea ifo, “Le Atua Mamana e, o Lau Afio o lo matou maluapapa ma lo matou malosi’aga, e leai lava se mea matou te mafaia pe a aunoa i matou ma Oe Tama, ia fa’afo’i atu pea le vi’iga, o le fa’afetai ma le fa’amanu i Lau Afio e fa’avavau, fa’avavau lava, Amene.”

Na muta mai la tatou tala, ina ua toe alu nei le malaga a le ali’i tusi tala o Richard Preston i Aferika, i le nofoaga sa nonofo ai ma ona matua ma ona uso i le tele o tausaga, ae na fa’atoa alu ‘ese mai ina ua sefululua ona tausaga. O lea la ua o fa’atasi nei ma le ali’i polofesa i mea tau tuligamanu i totonu o Aferika, le ali’i e ioga ia Robin McDonald e fa’asino ala mo Preston, ona ua tele lava le suiga ua i ai nei i totonu o Aferika mai le luasefulu ma ona tupu tausaga talu ai.

Fai mai, ina ua atoa le fitu tausaga o le ali’i o Robin, ae amata loa ona a’oa’o e lona tama i le tuliga o manu i le vaomatua o Aferika. O lea la ua fa’amatalatala uma nei i le ali’i tusi tala o Preston lona olaga a’o ola ai i totonu o Aferika, ina ua iloa e le ali’i, e fa’amatala uma nei e Preston i lana tusi lenei.

Na i ai ripoti ua maua e le ali’i tusi tala o Richard Preston e fa’apea, o lo’o fai fetaua’iga i le va o ituaiga tagata ‘ese’ese o lo’o nofoia nofoaga i autafa o le Mauga o Elekone. O le ituaiga e ta’ua o le Elgon Masai ua osofa’ia le isi ituaiga e ta’ua o le Bukusu ma o tagata nei e nonofo i le itu i Sasa’e o le Mauga o Elekone, (Mount Elgon), ua susunu uma fale ma tafana tagata i fana okometi ma tutuli ‘ese mai i o latou lau ‘ele’ele. Na lagona ai le popole o le ali’i o Preston i lea tulaga, ma o le ala lea na ia vala’au ai e ala i le telefoni i le ali’i o Robin McDonald mai Amerika, ona o lona fia iloa po’o le a sona manatu i lea itu, a’o le i tu’ua e ia Amerika mo lana malaga i Aferika.

Ina ua vala’au ane Richard Preston i le ali’i o Robin McDonald, o ia e fia alu ane i Aferika, o le fesili muamua lava a Robin, po’o fea tonu e fia malaga i ai, ae sau le tali a Preston, e fia alu i luga o le mauga o Elekone, (Mount Elgon).

Fai mai na tau le lagona mai e ia le leo o le ali’i o Robin, ae na toe fa’apea mai i ai le ali’i tusi tala, o lo’o alu ane i Aferika ma suti e fa’aaoga e tagata su’esu’e e pei ona fa’aaoga e le Vaega a le Ami i le taimi na su’esu’e ai le fa’ama’i o le Ebola Reston i totonu o Amerika.

Fai mai le fa’amatalaga a le ali’i tusi tala o Preston, o lea lava e naunau mai ina ia fai atu se fa’amatalaga a le ali’i o Robin i le mea o lo’o ia mana’o e fai, ae foliga mai, ua fa’alotolotolua le ali’i i lea taimi. Na toe fesili mai nei i ai, pe iloa e Robin e sefe pe tatau fo’i ona uia le auala e tau atu i le Mauga o Elekone, i le taimi lea, ona o lo’o ia fa’alogo i Tala mai le Televise, o lo’o fai fetaua’iga a nisi o ituaiga o lo’o nonofo latalata i le Mauga lea.

Na sau le tali a le ali’i o Robin McDonald, e tele le avanoa, e leai se mea o le a taofia ai fua lana malaga, se i vagana ua iloa ua matua’i vevela ai se taua, ona le mafai lea. Ae sauni e malaga atu i Aferika, o lea o le a ia fa’atali mai lona taunu’u atu. O lea la ua alu ai nei le malaga a le ali’i tusi tala o Preston i Aferika ma feiloa’i ai loa ma le ali’i polofesa i le fa’agatama o le tulimanu aivao o Robin McDonald.

E faia pea…

Fa’aliliu: Akenese Ilalio Zec