Tatou fa’afetaia pea le alofa ma le agalelei o lo tatou Matai oi le lagi, ona o Lana tausiga alofa mo i tatou, o lea fo’i ua mafai ai ona o tatou alafa’i mai i le manuia i lenei taeao fou. E ao ai ona o tatou fa’apea  ifo, “Ae o a’u, ou te fa’atalitali ma lo’u fa’amoemoe i lo’u Ali’i, ou te fa’atali mo le Atua lo’u Fa’aola, ma o le a fa’afofoga mai o ia i a te a’u i lenei aso ma aso uma o lo’u ola, ia vi’ia pea Oe Tama e fa’avavau, Amene.” ia manuia le alo faiva o le atunu’u i feau ma galuega o le a feagai ai i lenei aso.

Ua fa’aauau pea le talanoaga a le ali’i foma’i o C.J. Peters ma le tuistala o Richard Preston, na fesili muamua ane Peters i a Preston, pe ua va’ai i foliga o le virusi o le Ebola, na tali le ali’i tusi tala, ioe, na fa’aali ane ia te ia e le tama’ita’i foma’i o Nancy Jaxx.

“O lona uiga ua e iloa, ma e mafai ona e va’ai lelei lava i foliga o le Ebola i totonu o avanoa o le ma ma.” Na toe fesili le ali’i tusitala, “Pe sa e taumafai e fia iloa ma tu’u le Ebola Reston i le ea ma fa’asosolo ai pe mafai ona a’afia ai manuki?

Na tali le ali’i foma’i o C.J. Peters, e leai, ona sa i ai lona manatu e le o se mea e tatau ona fai. Afai ae maua pe iloa e se tasi na taumafai le Ami e faia lea tulaga i le Ebola, o lona uiga, o le a tu’ua’ia le Ami i le gaosia o meatau, ma ua o’o ai le manatu i a i latou e ‘aua ne i faia lea tulaga.”

Na toe fesili le ali’i tusi tala o Richard Preston, “O lona uiga tou te le o talitonu ma iloa e mafai ona a’afia le tagata po’o le manu e ala i le ea? Na tali le ali’i foma’i o C.J. Peters e fa’apea, “E sa’o. Matou te le iloa. O se mea e mafaufau ma saga mafaufau pea i ai, pe fa’aaoga e le Ebola le ea. Afai e mafai, o se tulaga mata’utia o le a aliali mai.”

O le au uso e to’atolu- Marburg, Ebola Sudan, Ebola Zaire- o lea ua i ai nei ma le latou uso e to’afa ai, o le Ebola Reston. Ua galulue nei le vaega a le C.D.C, le ali’i foma’i o Anthony Sanchez ma le ali’i foma’i o Heinz Feldmann, e tu’u ‘ese’ese virusi ia e fa, ma ua o la iloa ai o le virusi o le Ebola Zaire ma le Ebola Reston, o se virusi e tutusa lelei lava, ma ua faigata ona i ai se talitonuga pe fa’apefea ona ‘ese’ese.

Fai mai le fa’amatalaga a le ali’i tusi tala o Richard Preston, ina ua la feiloa’i ma le ali’i foma’i o Anthony Sanchez ma fesili i ai e tusa ma le fa’aiuga o a la su’esue’ga na fai ane i ai le ali’i foma’i, “Ua pei o se tausoga, virusi nei e lua, ae ou te le iloa pe aisea ua le mafai ai e le virusi o le Ebola Reston, ona a’afia ai tagata, ae na o manu.”

O se manatu na paso ai ali’i foma’i ma tama’ita’i foma’i, ona e tutusa lelei rivusi nei e lua o le Ebola Zaire ma le Ebola Reston, ae o le mea ua tula’i mai, o le Ebola Zaire na matua’i mata’utia ana faiga lea na maliu ai le tama’ita’i o Mayling i totonu o Zaire, ae maise o le to’atele o isi tagata. A’o le Ebola Reston, lea na alia’e i totonu o Virginia i le nofoaga na fafaga ai manuki, ua na o manuki lava na a’afia ai, ae le a’afia ai tagata.

O le Ebola Reston, na fa’aigoa ai le fa’ama’i lenei ina ua taunu’u ane i totonu o Reston i Virginia. O le mafua’aga lea ua fa’aioga ai e ali’i foma’i atamamai, i le Ebola Reston, ona o manuki ia sa tausi i Reston lea na a’afia tele i le virusi lea.

O le fesili ua tula’i mai, aisea ua tutusa lelei ai le virusi o le Ebola Reston ma le virusi o le Ebola Zaire, ona o lea ua iloa atu nei, o le Ebola Reston na amata mai i le Atu Asia?  Afai e ‘ese’ese konitineta (continents) o lona uiga e i ai fo’i le ‘ese’esega o virusi, e le tutusa uma, e pei ona i ai nei le virusi o le Ebola Reston.

E faia pea…

Fa’aliliu: Akenese Ilalio Zec