Fa’atalofa atu i le alafa’i mai o le atunu’u i fanuga lelei o lenei aso fou, malo le soifua, malo fo’i le onosa’i i faiva ma tiute o lo’o feagai ai i lenei aso. E ao ai ona o tatou fa’apea ifo, “Le Ali’i e, ia e alofa ma fa’amanuia i a i matou i lenei aso, ia mua’au ma muli’au Oe Tama i mea uma matou te faia, Amene.”

O le ali’i o Milton Frantig, lea na faigaluega i totonu o le nofoaga na i ai manuki, lea na fa’asuati i luma o le fale na i ai manuki, ma ave ai loa i le falema’i, e tele aso na tu’u ai i se potu fa’apitoa i totonu o le falema’i o Fairfax i Uosinitone. Fai mai, ua toe fo’i i le manuia le ma’i o le ali’i lenei, ae foliga mai sa maua i le fiva, ae e le i a’afia i le virusi o le Ebola. ina ua ma’ea su’esu’ega o le ali’i lenei, na manatu ai loa le vaega a le C.D.C i Atlanta, o le a te’a i tua mai le falema’i le ali’i o Milton, ma ua fa’apena lava ona fai.

Ina ua ma’ea aso e sefuluiva e pei ona nofo fa’atalitali i ai le ali’i foma’i o Peter Jahrling ma Tom Geisbert pe mata e o’o atu i ai ua a’afia i la’ua i le virusi, na o la mautinoa ai loa, e leai, e le i a’afia i la’ua i le virusi.

Ona o lea fo’i e le i a’afia Dan Dalgard ma lana vaega sa galulue i totonu o le nofoaga sa i ai manuki i le Ebola, o le ala lea na loto tetele ai i la’ua ia, e leai, o lo’o sologa lelei lava mea uma.

Na mafaufau nei Peter Jahrling e fa’apea, po’o le a la le tulaga ua i ai nei le Ebola, o le a fo’i le mea o lo’o tupu i le virusi lenei, a’o lea ua mama’i ai manuki, ae peita’i, e leai se tagata soifua na maua ai.

Afai la e le o le Ebola Zaire, o le a la lea ituaiga fa’ama’i, ae po’o fea fo’i na mafua mai ai. Ae ua i ai le talitonuga o le ali’i foma’i o Jahrling, e le taumate na sau mai Aferika, ona o lea na fa’aalia i le toto o le tama’ita’i foma’i o Mayings. O lona uiga la, o se fa’ama’i e tali tutusa ma le virusi o le Ebola Zaire, ae e i ai lona ‘ese’esega, ona o lea ua mama’i ma mamate ai manuki, ae le o a’afia ai tagata.

Na i ai lava le manatu o le a uma le lalolagi, peita’i, ua alu ‘ese le virusi, ma ua toe ola ai le tagata soifua. O le galuega la ua feagai nei ma le vaega a le C.D.C i Atlanta, o le taumafai lea e sa’ili le mafua’aga o le virusi. Ma na o’o le sa’iliga a le C.D.C i le fa’atoaga o lo’o fafaga ma nonofo ai manuki i talane o Manila. Ona o manuki uma ia na i totonu o le nofoaga i Reston, Virginia, o manuki uma nei na avane i le ‘oka mai Filipaina.

Fai mai o le su’esu’ega lea na fa’atautaia e le vaega a le C.D.C na o latou iloa ai, ua tele manuki ua mamate i totonu o le fa’atoaga lea i Filipaina, o le fesili ua tula’i mai, aisea ua le a’afia ai tagata Filipaina. Afai o le virusi lenei e sau mai Aferika, o le a la lana mea o lo’o fai i Filipaina. O le a fo’i le mea ua le a’afia ai tagata Filipaina o lo’o galulue i totonu o le fa’atoaga, a’o lea ua mama’i ma mamate ai manuki.

E foliga mai, o le faiga lea o le natura o le lalolagi, e foliga mai na ‘ata’ata mai i le tagata, a’o lea ua toe sola ‘ese, o le ata e fa’afoliga i a Mona Lisa, o le mea ua tupu, e leai se tasi e mafai ona ia taumateina.

Tesema Aso 18, Aso Gafua- Ua amata nei le galuega a le vaega a le Ami, i le fa’amamaina o le nofoaga sa i ai manuki. Ua leai se vaipanoa o le fale, e le i o’o i ai le fa’amama a le vaega lenei, o nisi o i latou nei sa tu’u atu i ai e le ali’i foma’i o Gene Johnson lona fa’atuatuaga, o le a o latou faia se galuega ma’ea’ea lelei aua le saogalemu o tagata uma.

E faia pea…

Fa’aliliu: Akenese Ilalio Zec