Fagogo: O Le Sone Vevela — Vaega 138

Taeao manuia i le mamalu o le atunu’u, malo le soifua, malo fo’i le onosa’i ma le fa’apalepale i faiva ma tiute o lo’o feagai ai i lenei aso. Tatou fa’afetaia ai le alofa ma le agalelei o lo tatou Matai oi le lagi, ona o Lona alofa e le mavae mo i tatou, ae alo maia o le a toe fa’aauau atu la tatou tala fa’asolo mo lenei aso.

 

Manatua, o lenei tala o se tala moni lava na tusia e le ali’i tusi tala o Richard Preston, ae ua ou taumafai e fa’aliliu i la tatou gagana, ona ua i ai se manatu, se i sui fo’i ona o tala e masani ai, o tala fatu, e fafau e ala i mafaufauga ma manatu. Ae o lenei tala o se tala moni lava i mea na tutupu ma fa’ama’i mata’utia e pei ona fa’ailoa mai e le tusi tala o Richard Preston.

 

O le afiafi o le aso lava lea, na fa’amuta ai galuega a le vaega a Jerry Jaxx i le nofoaga sa i ai manuki i totonu o Reston. O le manuki mulimuli, o le manuki lea na fai a la tuligasi’a ma le ali’i o Jerry. Fai mai ua fiu e tuli le manuki lea, ae na maua ina ua mau lona ulu i le isi itu o le pa, ae aliali mai na o lona si’usi’u. Na pu’e vae ai loa iina e le ali’i Satini o Amen, ma fai ai loa lona tui oti.

 

Ua alu nei le vala’au i le ali’i foma’i o Eugene Johnson, ma fa’ailoa i ai, o le manuki mulimuli lava i totonu o le nofoaga lenei ua ma’ea ona ta pe. Ae na sau le fa’atonuga a le ali’i foma’i o Johnson, ia fai e Satini Klages le isi su’esu’ega, ia mautinoa ai ua uma mai i fafo manuki mai totonu o le fale ma ia mautinoa fo’i ua mamate uma manuki.

 

Na amata nei ona toe siaki e Satini Klages le potu atoa, e o’o i fulisa o lo’o i totonu o le potu lenei, na su’esu’e uma e le ali’i Satini. Ae na fa’ate’ia, ina ua tatala atu le isi fulisa, ae o lo’o fa’asaga tonu mai lava mata o le manuki ua mate, lea o lo’o i totonu o le fulisa lenei. Na alu fa’atopetope le vala’au i le ali’i o Gene Johnson, “Gene, o lo’o i ai le manuki o lo’o i totonu o le fulisa malulu, o le a le mea e fai i ai?

 

Na iloa lelei lava e le ali’i Satini, o manuki nei o manuki mai le potu F, o le potu tonu lava lea na amata mai ai ona mama’i manuki, ma o nisi o manuki nei na ta pe e le ali’i foma’i manu o Dan Dalgard. Na toe tapuni e le ali’i Satini le fulisa, ae toe a’apa ane i lana la’au ma toe vala’au Gene Johnson.

 

“Gene, e te le talitonu i le tala o le a ou fai atu, e tusa i le sefulu i le sefululima manuki o lo’o i totonu o le fulisa.” Na fa’alogo atu le ali’i Satini o Klages, ua sau le palauvale lapo’a a le ali’i foma’i o Gene Johnson i luga o le leitio feavea’i.

 

Na toe fesili Satini Klages, “O le a le mea o le a fai i ai.” Na tali mai le ali’i foma’i o Johnson, “Ou te le toe mana’o i ni manuki, ou te le toe mana’o lava i se isi mea e fai i manuki, ave’ese ma susunu loa.”

 

Na toe fa’apea ane le ali’i Satini, “Gene, o lo’o i ai fo’i nila na tui ai manuki o lo’o i totonu o le fulisa.” E le i uma atu tala a le ali’i Satini, ae toe fetaui ma le isi palauvale lapo’a a le ali’i foma’i ma tape le leitioa e feso’ota’i ai ma Fitafita o lo’o i totonu o le fale.

 

Fai mai, na taumafai nei le ali’i Satini o Klages ma se foma’i savili e ioga ia Merhl Gibson e toso mai i fafo manuki nei mai totonu o le fulisa, ae ua le mafai. Ua matua’i malo lava, ma ua ‘ese le faiga na fai ai e le ali’i foma’i manu o Dan Dalgard ia manuki nei.

 

Na toe taumafai le ali’i Satini e fa’afeso’ota’i Gene Johnson, fai mai le tomumu a le Satini, “Fa’apa ane lou ulu i lau la’au na e u’u.”

 

E faia pea…

 

Fa’aliliu: Akenese Ilalio Zec

Comment Here