Fagogo: O Le Sone Vevela — Vaega 137

Fa’atalofa atu i lou alafa’i mai i le manuia i lenei taeao fou, malo le soifua, malo fo’i le onosa’i i faiva ma tiute o lo’o feagai ai i lenei aso. E ao ai ona o tatou fa’apea ifo, “Le Ali’i e, o ai e o le a o matou o i ai, o lo’o i a te Oe upu o le ola, vi’ia pea Lau Afio e fa’avauvau, fa’avavau, Amene.”

 

Ua amata ona auina ane i le nofoaga a le Ami i Fort Detrick ia manuki mai le nofoaga sa i ai manuki i totonu o Reston, Virginia. O le aoauli lava lea na amata ai ona avane mo su’esu’ega a le Ami. Ua uma ona saunia lelei e le Vaega a le Ami ia taga e tu’u i ai manuki nei ua mamate. O le galuega lea sa feagai ma le ali’i foma’i o Jerry Jaxx ma lana vaega.

 

E ui ina sa i ai ni mea na tutupu i le galuega lenei, peita’i, sa mafai lava ona fofoina, ona o le galulue fa’atasi o ali’i ma tama’ita’i Fitafita a le Ami a le Malo Tele. O le tele o manuki ua mamate, na fa’atonu lelei e le ali’i foma’i o C.J. Peters ia susunu uma ma fa’atamaia.

 

O manuki na avane i le nofoaga a le Ami, o lea ua fa’afeagai nei ma le tama’ita’i foma’i o Nancy Jaxx, a’o le tele o isi manuki ua susunu ma fa’atama’ia e pei ona fa’atonu e le ali’i foma’i o C.J. Peters.

 

Ua galulue nei Nancy Jaxx ma isi ali’i foma’i e to’alua i totonu o le potu numera AA-5, lea ua i ai nei vaega o manuki na avane mai Reston. E leai se tasi e tautala, ae ua na o le feso’ota’i i saini o o latou lima, ma le fa’asino i le tasi o le mea ua o’o i ai le virusi.

 

O mafaufauga e uiga i lona tama ua fa’aosofia nei, ua toe mafaufau i le taumafaiga o si o latou aiga, a’o tau fa’ato’a ma tau amata i totonu o Wichita. Fai mai, sa galue malosi Nancy e fesoasoani i lona tama i le suaina o le palapala e toto ai le saga, ma le tamato. E amata i le taeao, se ia o’o ina gagaifo le la, o galulue lava. Ua toe mafaufau i le faigata ma le tiga na o’o i ai, ina ua maliu lona tina. O se aiga sa taumafai pea i tulaga uma ma i’u ai ina tula’i mai ai i se tulaga manuia. O lea la ua inu i ai Nancy i galuega lelei ma galuega fi ta sa feagai ma ia, ona e fa’asolo atoa ao ma po o galulue ma lona tama i le fa’atoaga.

 

A’o feagai Nancy Jaxx ma lana galuega i totonu o le potu numera AA-5, o le aso lava lea na maliu ai lona tama. Fai mai, na malaga i le va’alele e aga’i atu i Kansas, ma na taunu’u i le mea e lagomau ai lona tama i le aoauli.

 

Ua le mafai e Nancy ona tatali le maligi ifo o ona loimata ina ua va’ai atu i le tumutumu mai o tagata, ae o lo’o ta’atia le pusa o lona tama, o le a sauni e tu’u ifo i le tu’ugamau. O le mea na toe manatua e Nancy i lea taimi, ua va’ai atu o lo’o ufi mai le va’a o lona tama i le fu’a a le Malo Tele. Na toe manatua ai e Nancy, o lona tama na tautua i Vaega ‘Au a le Malo tele i totonu o le Ami.

 

Fai mai le fa’amatalaga a le ali’i tusi tala o Richard Preston, o le taimi lea, ua le mafai e Nancy ona tatali ona tiga, na tamo’e atu nei ua tagi lotulotu i luga o le pusa oti o lona tama. O fa’alogona uma sa teu pea i lona loto ma lona mafaufau, o lea ua fa’aalia nei, o mafatiaga ma fa’alogona sa teu mau pea, o lea ua sasa’a mai i fafo i lea taimi.

 

Ua na o le tilotilo ane nei i ai o tagata, ae na savali ane si ona tuagane ua fusi mau ma taumafai e fa’ato’ato’a lona tuafafine. “Papa, ou te alofa i a te oe, ia manuia lau malaga.”

 

E faia pea…

 

Fa’aliliu: Akenese Ilalio Zec

Comment Here