Fagogo: O Le Sone Vevela — Vaega 136

Malo le soifua i le mamalu o le atunu’u, fa’afetaia pea le alofa ma le agalelei o lo tatou Matai oi le Lagi, ona o Lana tausiga alofa mo i tatou lea o lo’o tatou maua ai pea le ola ma le malosi i aso uma. Ae alo maia, o le a toe fa’aauau atu la tatou tala mo lenei aso, ae ia manuia le alo faiva o le atunu’u i feau ma galuega o le a feagai ai i lenei aso.

 

Na muta mai la tatou tala, i le tulaga ua o’o nei i ai le tina ia Nancy Jaxx, ona o lea ua vala’au ane lona tuagane ua tigaiga le gasegase o si o la tama. O lea fo’i la ua fa’alufesasi ai le mafaufau o Nancy pe alu pe leai. Ae o lona manatu fo’i, o le a afaina lana galuega, ona o lea ua feagai i latou ma su’esu’ega i le virusi o le Ebola lea ua i ai le talitonuga o nisi ua a’afia ma mamate ai manuki.

 

Ina ua uma le talanoaga a Nancy ma lona tuagane, na talanoa ai loa ma lona to’alua o Jerry Jaxx, manatua foi, o le ulugali’i lenei e maualuluga uma o la tulaga i totonu o le vaega a le Ami a le Malo Tele. O i la’ua uma o ni foma’i manu, peita’i, o lea ua avea Nancy ma tama’ita’i pule i le isi vaega a le Ami o lo’o faia su’esu’ega. O Jerry Jaxx, ua avea ma pule i foma’i manu i totonu o le nofoaga a le Ami i Fort Detrick. E faigaluega fa’atasi i le nofoaga lenei a le Ami, ma o se ulugali’i fo’i, e naunau i a la galuega, o le ala fo’i lea, na fa’apea ai le manatu o Nancy, e sili pe a nofo, atonu lava e o’o atu i le aso e ma’ea ai su’esu’ega a le Ami i le nofoaga o lo’o i ai manuki, o lo’o soifua pea lona ona tama.

 

Na fautua fo’i i ai lona to’alua le ali’i foma’i o Jerry Jaxx, ina ia alu e asi lona tama, ona o lea ua logo ane ia, ua tigaina. Peita’i, sa mafaufau Nancy i lana galuega, afai e to’atasi lona tama, ae o le a fa’apefea le anoano o tagata o le a afaina o latou soifua, pe afai o le a le faia lana galuega. E le i umi, ae toe tatagi le telefoni i le fale o Nancy ma Jerry Jaxx, e tago ane i ai Nancy, o lona tama, na fesili ane nei, pe o le a alu ane i lo latou aiga, ae na tali Nancy, “Tama, e le mafai ona ou alu ‘ese mai la’u galuega, ona o lea o lo’o feagai ma le su’esu’eina o se virusi e ono a’afia ai le to’atele o tagata.”

 

“Nancy, ua lelei, ou te malamalama.” Na toe tali Nancy, “Papa, ta feiloa’i i le Kirisimasi.” Na toe sau le tali a lona tama, “Nancy, ailoga ou te aulia le Kirisimasi.” Na fai si umi o fa’atalitali mai le toeaina i se isi tala a Nancy, ae na toe fa’apea ane i lona tama, “Tama, ou te talitonu e te aulia, ‘aua e te popole.” Na fa’alogo atu nei Nancy ua fa’apea mai lona tama, “Nancy, ou te alofa ia te oe.” Na tali Nancy, “Ou te alofa fo’i i a te oe tama.”

 

Ina ua ma’ea le fetufa’aiga a Jerry ma Nancy, na tapena ai loa o la lavalava mo le galuega. Ua fai ‘ofu savili o Jerry Jaxx, ae ua fa’amuolu le toniga a Nancy. Ua alu fa’anatinati nei Jerry i le nofoaga a le Ami o Fort Detrick, ae ua nofonofo nei na o Nancy, se ia o le la fanau i le a’oga, ona alu ai lea i lana galuega.

 

Ua taunu’u Nancy i le nofoaga i Fort Detrick, ma na ia fa’ailoa i le ali’i foma’i o C.J. Peters le tulaga ua o’o i ai le ma’i o lona tama. Na fai i ai Peters, e alu e asi lona tama. Ae fai ane le tali a Nancy, e le mafai ona ia faia lea tulaga, ona o lo’o mo’omia o ia i lana galuega.

 

Na tilotilo ane nei i ai le ali’i foma’i o Peters, ae na ta mau lava i le loto o Nancy, e le alu i lona tama, ona ua uma ona o la fa’atofa i luga o le telefoni. Na alu le na aso atoa o mafaufau Nancy i lona tama, a’o le taimi lea, ua amata lava ona fai ifo le  ola o lona tama.

 

E faia pea…

 

Fa’aliliu: Akenese Ilalio Zec

Comment Here