Ads by Google Ads by Google

Fagogo: O Le Sone Vevela — Vaega 135

Taeao manuia i le alofa ma le agalelei o le Atua, ina ua tatou toe alafa’i mai i le manuia i lenei taeao fou. E ao ai ona o tatou fa’apea ifo, “Le Ali’i e, ia e alofa ma foa’i mai le loto fa’amagalo i a i matou i lenei aso, ina ia mafai ai ona o matou fa’amagalo atu i e o lo’o ita mai ia te i matou, Amene.”

 

O lo’o faia pea su’esu’ega ma sa’ili’iliga a le ali’i foma’i o Peter Jahrling i totonu o le potu numera 4, i le nofoaga o lo’o fa’atautaia e le vaega a le Ami a le Malo Tele i Fort Detrick. Ua le gata i le sa’iliga o le mafua’aga ua a’afia ai manuki i le nofoaga i Reston, ae ua su’esu’e ai fo’i ma o la toto ma le ali’i o Tom Geisbert.

 

Ua fa’asolosolo nei mafaufauga o le ali’i foma’i o Jahrling e fa’apea, afai e le o nei, o lona uiga o taeao po’o le aso fo’i e soso’o ai, e le taumate o le a i ai se suiga i le lanu meamata lea e tilotilo atu nei i ai. Na lagona lona fiafia i lea taimi, peita’i, e le o fiafia tele le ali’i, ona e le o mautonu lona mafaufau pe o le a i ai se suiga pe leai.

 

Manatua fo’i o i la’ua nei e to’alua na mauaina le virusi lea ua mafua ai ona mamate manuki, o le mafua’aga fo’i lea ua galulue ai nei Fitafita a le Ami i Fort Detrick e fa’amamate uma manuki o lo’o i totonu o le nofoaga i Reston, Virginia.

 

Ina ua ta le itula e sefulutasi i le po, na fa’amuta ai loa galuega a le ali’i o Jahrling, ua manatu ai nei, o le a alu i lona fale mo sana malologa. Ua tu nei na o ia i le isi itu o le potu, ua ta’ua o le (gray zone) po’o le sone lanu ‘efu’efu. Ua fa’alogoina le tiga o ona vae, ua tau le mafai ona savali, peita’i, sa taumafai pea i ai, ona ua na o ia lea o lo’o i totonu o le potu fa’apitoa lenei. Na i’u lava ina fa’apau ifo i luga o le nofoa ma ua moe ai. Ae na fa’ateia, ina ua fa’alogo atu ua tatagi le telefoni o lo’o i totonu o le potu lenei. Na tu a’e nei i luga ma savali atu loa e tali, ae fa’apea mai le leo o le tagata, “Peter, o Tom, o a mai oe?”

 

Na toe fetilotilofa’i solo nei le ali’i foma’i ma tau matemate po’o fea o i ai, ae na ia toe iloa mulimuli ane o lo’o i totonu o le potu numera 4. E pei o le ‘emo o le uila le gaioi a le ali’i foma’i i lea taimi ma na a’apa ane nei ua u’u mai le fa’aga’au ma fana atoa ai lona suti fa’apitoa, na toe liliu atu nei i vaila’au fa’apitoa e fufulu ai lima ma totigilima ua fa’apasi solo i lona ofu, e le i umi, ae matala mai loa ma le faitoto’a, ma alu sa’o loa i fafo e le i toe i ai lava ni upu.

 

Tesema Aso 7, Aso Tofi. Ua ala a’e Nancy Jaxx i le ta tonu o le itula e fa i le vaveo, ina ua fa’alogo i le tatagi o le telefoni. O lona tuagane o lo’o vili mai i se telefoni totogi o lo’o i totonu o le fale ma’i i Wichita. Na fa’apea le fa’amatalaga a le tuagane o Nancy, ua tigaina lo la tama, ma ua o’o i se tulaga ogaoga lona ma’i, atonu fo’i o le iuga ua o’o mai ia te ia. O le mafua’aga, ona ua fesili foma’i, pe manana’o Nancy ma lona tuagane e sulu le fa’aga’au e manava ai lo la tama, peita’i, e le i talia e Nancy, ma sa ia fa’atonuina lona tuagane ina ia ‘aua ne i faia lea tulaga.

 

Na mafuafua nei Nancy Jaxx, pe o le a le mea o le a fai, ona o lea fo’i o lo’o feagai o ia ma lana galuega, ae maise ai o le tulaga o lo’o i ai nei le Vaega a le Ami i totonu o Reston. Afai o le a alu, o lona uiga, o le a afaina ai lana galuega, ona o lo’o mo’omia lava lona tomai ma lona agava’a i le taimi lenei i su’esu’ega o lo’o fa’atino i totonu o le nofoaga a le Ami i Fort Detrick.

 

Na toe manatua vave e Nancy si ona to’alua o Jerry lea o lo’o feagai ma le galuega faigata lenei, ona afai ae alu i le taimi lea, o lona uiga, o le a vaivai ai le loto o Jerry, ona tutupu mai ai lea o ni fa’alavelave. Sa manatu nei, e ui ina alofa i si ona tama, ae sa ia manatua le tala a lona tama sa fai ane i a te ia, “Nancy, o a’u ua vaivai, ua le toe i ai nisi aso o lo’u ma’i, a’o lau galuega, o le a sefe mai ai ola ma soifua o tagata e to’atele.”

 

E faia pea…

 

Fa’aliliu: Akenese Ilalio Zec