Fagogo: O Le Sone Vevela — Vaega 133

Taeao manuia i le alafa’i mai o le atunu’u i fanuga lelei o lenei aso. Tatou fa’afetaia ai le alofa ma le agalelei o lo tatou Tama oi le Lagi, ona o Lana tausiga mo i tatou e le mavae. Ae alo maia, o le a toe fa’aauau atu la tatou tala e pei ona tusia e le ali’i tusi tala o Richard Preston, ae ua ou taumafai e fa’aliliu i la tatou  gagana, ona o se tala moni, i mea na tutupu i le tau sa’iliga o le virusi mata’utia o le Aids, Malburg, Ebola Zaire ma le Ebola Sudan.

 

O lo’o fai pea le tuligasi’a a Jerry Jaxx ma le manuki e tasi lea ua sola ‘ese mai le pa. Fai mai ua tau sau le fiu, ua uma fo’i le malosi, ae e le fiu lava le manuki, o lo’o malosi lava. A tau pu’e atu e Jaxx i le neti, ua oso le manuki i le isi itu, a o’o atu i ai Jerry, ua atili ai ona sola le manuki.

 

O le taimi fo’i lea, ua matua’i sauni lelei le ali’i Satini o Amen ma le tui e fa’amate ai le manuki. O manuki o lo’o i ai ua le maua se tonu, ua na o le fe’ei ma pisapisao ua avea ma ala ua tau sau ai le fiu o le ali’i o Jerry Jaxx i lea taimi.

 

O lo’o fa’aauau pea le galuega a isi Fitafita, i le faia lea o tui ma tao’otoga o manuki ia ua mamate aua su’esu’ega a ali’i foma’i fa’apitoa ma tama’ita’i foma’i lea ua ta’ita’i ai le tina ia Nancy Jaxx i totonu o Fort Detrick.

 

Fai mai, na tofia e Jerry Jaxx le tama’ita’i o Rhonda Williams e galulue fa’atai ma Major Nate Powell, i le faia lea o ta’otoga o manuki ua mamate. ina ua fai e Williams le tui e fa’amate ai le manuki na misi mai le fatu o le manuki le tui. Ae sa taumafai lava le tama’ita’i ia toe fai le isi tui ina ia tu tonu i le fatu o le mauki. Na tau i ai fo’i sina fa’aletonu i le tapenaga lea a le vaega a le Ami. Ae sa taumafai pea ina ia i’u lelei le latou galuega, ona o lea o lo’o fa’atali mai C.J. Peters mo se fa’ai’uga o le galuega.

 

Na toe tofia nei e Jerry Jaxx ia Williams e galulue i le tuiina o vae o manuki ina ia maua mai ai le toto mo su’esu’ega a foma’i o le Ami. Fai mai na misi fo’i le tui a le tama’ita’i o Williams, ma na o’o ai ina ave’ese mai i lona tulaga lea.

 

Ua fefe ma popole le tama’ita’i i le taimi na ia faia ai tui o manuki, ona fai mai lana fa’amatalaga i le tusi tala o Preston, na faigata i a te ia, ona tilotilo ane i manuki, o lo’o pupula mai o latou mata ma sa ia lagona le alofa i nei meaola.

 

Fai mai le fa’amatalaga, ina ua fai e Williams le tui o le isi manuki, na sese le tui ma na oso ‘ese ai le manuki mai i luga o le laulau, ma ua taumfai e u le lima o le tama’ita’i. O tui muamua, o tui ia e fa’amomeo ai manuki, peita’i, e tago atu le tama’ita’i o Williams o lo’o pupula mai mata o le manuki lea. O le mafua’aga lea na lagona ai lona popole, ae ui i lea, na tamomo’e ane nei isi Fitafita ma tui i le tui malosi ua fa’aioga o le T-61, o le tui lea e mate ai le manuki po’o le tui oti fo’i.

 

Ua tonu nei i le mafaufau o le ali’i foma’i o Jerry Jaxx, ua tatau ona faia se malologa a Fitafita, ona ua leva fo’i le aso ma ua sau le vaivai. Ae o le taimi lea, ua lagona le popole o le taima’ita’i o Rhonda Williams, ona o tulaga na o’o i ai a’o fa’agasolo le galuega e pei ona feagai ai ma le Ami.

 

Ua i ai lava sasi i le fa’atautaiga o le galuega a le Ami ma ua lagona ai le popole o Jerry Jaxx, aua o ia o lo’o ta’ita’ia le vaega lea a le Ami i le fa’amamateina o manuki i totonu o Reston i Virginia.

 

E faia pea…

 

Fa’aliliu: Akenese Ilalio Zec

Comment Here