Fagogo: O Le Sone Vevela — Vaega 132

Fa’atalofa atu i lou alafa’i mai i fanuga lelei o lenei aso fou, e ao ai ona o tatou fa’apea ifo, “Le Atua e, e talitonu o matou loto, e leai se mea e faigata i Lau Afio, ia e alofa mai ma fa’amanuia ia matou galuega o le a feagai ai i lenei aso, a ma’ea ona o matou fa’apea lea, Le Ali’i e, ia vi’ia pea Oe e fa’avavau, Amene.”

 

A’o fai le tuligasi’a a Jerry Jaxx ma le manuki e tasi lea ua sola mai totonu o le pa, o le taimi lea o lo’o i fafo o le fale le ali’i foma’i o C.J.Peters. Na o’o ane e fia va’ai ma siaki po’o a mai le galuega o lo’o feagai ma le Ami i totonu o le nofoaga o lo’o i ai manuki i Reston.

 

O le mea e lelei ai, e le i faia ofu Ami a le ali’i foma’i ua na o lona ofuae li ma lona ‘ofutino na fai, o le ala fo’i lea na le mate’ia ai e nisi tagata. O lea taimi, e foliga mai o le ali’i foma’i o Peters o se tagata e teu fale, po’o se tagata fo’i e faigaluega i totonu o le fale lenei, peita’i, o le tamaloa e tele, e maualuga fo’i lona tulaga i totonu o le vaega su’esu’e a le Ami a le Malo Tele, i Fort Detrick.

 

Fai mai, na fa’ateia le ali’i foma’i o Peters i le va’ai atu i le isi itu o le fale, o lo’o fealualua’i mai ai se tamaloa i luma o le fale, lea o lo’o fai ai le galuega a le Ami. O ai lenei tagata? O le taimi lea, ua amata ona savali ane le tamaloa i le isi itu o le fale. Na fa’apea le manatu o C.J.Peters, e pei lava e i ai se mea o lo’o fia maua e le tagata lea, ona ua latalata tele i le mea o lo’o fa’atino ai le galuega a le Ami.

 

Na fa’anatinati atu nei C.J Peters ma fesili i le tamaloa lea, pe o le a ana mea o lo’o fai i le nofoaga lea. Na tali ane i ai le tamaloa, o ia o se tagata tusitala mai le nusipepa o le Washington Post. E le i toe fai atu se isi tala a Peters, ae alu ane le fesili fa’atusitala a le tamaloa, “O le a le mea lea e tupu i le nofoaga lenei?”  Na tali Peters,“E leai se mea o tupu.” Na manatu nei le ali’i foma’i, ua tau tonu lava lana fana i le muaulu o si ali’i lea, ona ua mafaufau le ali’i foma’i ua le maua se fa’amatalaga a le ali’i tusitala, ona o ona ofu o lo’o ‘ofu nei, e foliga mai o ia o se tagata e tueina le fale, ae le o se tagata maualuga i totonu o le Ami.

 

E le i fa’ailoa fo’i e Peters i le tamaloa lea, o lo’o i ai le vaega a le Ami i totonu o le fale lenei, o lona uiga, ua matua’i pogisa lava le au tusitala, o fale televise ma leitio i le galuega o lo’o feagai nei ma le Ami a le Malo Tele. O le manatu e pei ona fa’ailoa mai e le tusi tala o Richard Preston e pei ona fa’amatala ane ia te ia e C.J. Peters ma Eugene Johnson, o le fa’atonuga na tu’u ane i a i la’ua, ia ‘aua ‘aua lava ne i fa’apopoleina tagata, aua a fai ae tupu lea tulaga, o lona uiga, o le a o’o atu i se tulaga ogaoga le galuega e pei ona lafo atu nei i le Vaega a le Ami.

 

Manatua fo’i, o lea ua uma ona tusi a’ao le kamupani a Hazelton Washington ma  le Vaega a le Ami, o le a fa’amatu’u ane le nofoaga lea o lo’o i ai manuki e va’ai ma puipui e le Ami. Ua uma fo’i ona fa’amautu le tonu i le va o le C.D.C i Atlanta ma le Vaega a le Ami, o le ala la lea ua galulue punoua’i ai ina ia fa’atino le galuega, ma ia ‘aua lava ne i iloa e se tasi.

 

Fai mai, na fiu le au tusitala ma le au fa’asalalau e tau sa’ili po’o le a le mea lea e tupu i le nofoaga lenei, peita’i, e leai se tasi na iloaina. Ua fiu fo’i e tau sa’ili ni fa’amatalaga mai le Vaega a le Ami, e leai se tasi na matala i luga lona gutu i se tala e tasi. O ta’avale fo’i o lo’o i tua o le fale lenei, e leai ni laisene a le Feterale po’o le Vaega a le Ami o pipi’i ai. O le mea lea ua iloa gata ai le galuega o lo’o galulue ai le Vaega a le Ami a le Malo Tele i totonu o le nofoaga lea i Reston.

 

E faia pea…

 

Fa’aliliu: Akenese Ilalio Zec

Comment Here