Tatou fa’afetaia pea le alofa ma le agalelei o lo tatou Matai oi le lagi, ona o Lana tausiga alofa mo i tatou e le mavae. E ao ai ona o tatou fa’apea ifo, “Le Ali’i e, o ai ea i matou ua e saga alofa mai pea i ai, ae ui lava i lea, matou te fa’afo’i atu pea le vi’iga ma le fa’amanu i Lau Afio e fa’avavau, fa’avavau lava, Amene.”

Ua alu nei i totonu o le potu le solo a Jaxx ma Amen, lea ua o e tau pu’e mai le manuki lea ua sola i fafo mai le pa. O le neti lea ua fa’aaoga nei e i la’ua ia, ona e le mana’o Jerry Jaxx e fa’aaoga le fana e pei ona fai ane ai le ali’i foma’i o Eugene Johnson. E ui ina lagona le fefe ma le popole o le ali’i foma’i o Jerry Jaxx, ae sa taumafai pea ona o lona manatu i le to’atele o Fitafita o lo’o galulue i le fa’atinoina o le galuega e pei ona i ai nei.

Ua tau sa’ili nei e Jaxx ma Amen le manuki e tasi lea na sola ‘ese, ae peita’i, sa fai lava si faigata, ona o le tele o le potu, e le malamalama lelei le moli, ae maise ai o le pisapisao ma le vavao o manuki. Na taumafai nei Jaxx ina ia maua le manuki i se taimi vave, ona o lea ua taofia galuega ae fa’atali se i maua atu se tali mai ia la’ua ma Satini Amen.

A’o taumafai Jaxx e pu’e le manuki i le neti, o le tiami lea ua le mapu le fautua a le ali’i Satini o Amen, ia fa’aitete ma ia ‘aua ne’i soso tele i le pa. Na iloa atu nei e Jaxx le manuki, o lo’o lafi mai i le pito lava i tua i lalo o le pa, na tau a’apa atu nei ma le neti e pu’e mai ai, ae oso i luga le manuki ma oso atu i le isi itu o le potu. Na fiu Jaxx e tau pu’e, ua lagona le vaivai i lea taimi, ua nenefu fo’i le pulou fa’apitoa lea e kava ai ona foliga. A tau latalata atu Jerry ma le neti, ua oso le manuki i le isi pito o le potu, a’o le taimi lea, o lo’o alu lava le fe’ei ma le pisapisao a isi manuki o lo’o i totonu o le pa, ua faigata ai ona fa’asaga tonu le mafaufau o Jaxx i le pu’eina o le manuki lenei.

A’o le taimi lea, o lo’o tu lava le ali’i Satini o Amen ma fa’atonutonu ma fa’asino le mea o lo’o oso aga’i i ai le manuki. Fai mai pe a i le ‘afa itula o tau pu’e le manuki. Ua sauni le tui e fa’amate ai le manuki lea, ma ua sauni i ai le ali’i Satini o Amen. O le galuega ua feagai nei ma Jaxx ma Amen, o se galuega faigata tele, ona o lea ua tu’u atoa i ai le loto o le ali’i foma’i o Jaxx. Ua ia lagona fo’i, ua i ai le sasi i le fa’afoeina o le galuega e pei ona tofia o ia e ta’ita’i ai.

O le mea ua tupu, e saoasaoa tele le manuki na i lo ia, atonu e faifai fo’i le selau maila e momo’e ai le ‘afa a le Manu Samoa e le maua le saoasaoa a le manuki. Ae o le tulaga lea ua o’o i ai le galuega, ua i ai le sasi, e moni lava le upu, e leai se faiva e a’e ma sona maumau e pei o lea upu a le atunu’u.

Ua fai nei le tuligasi’a a Jaxx ma le manuki, a tau o’o atu i ai Jerry, ae ‘oso le manuki i le isi itu o le potu, a tau fa’alala atu i ai le neti, ae ‘alo le manuki ma oso i le isi itu o le potu. E ui lava i le faigata ua feagai nei ma le ali’i o Jerry Jaxx, ae tasi lava le ‘auga, ia maua mai le manuki e tasi lenei. (E moni ai upu o le Tusi, i le fa’ataoto e uiga i le mamoe e tasi na se, ua tu’u uma mamoe e tele, ae alu le leoleo mamoe e sa’ili mai le mamoe e tasi na leiloa).

E faia pea…

Fa’aliliu: Akenese Ilalio Zec