Ads by Google Ads by Google

Fagogo: O Le Sone Vevela — Vaega 128

Fa’atalofa atu i le mamalu o le atunu’u i lenei taeao fou, malo le soifua, malo fo’i le onosa’i i faiva ma tiute o lo’o feagai ai i lenei aso. E ao ai ona o tatou fa’apea ifo, “Le Ali’i e, ia maualuga pea lou vi’iga e fa’avavau, fa’avavau lava, Amene.” Ae alo maia, o le a toe fa’aauau atu la tatou tala e pei ona masani ai mo lenei aso, ae ia manuia faiva ma tiute o lo’o feagai ai ma le atunu’u.

 

Ua fa’aauau pea le galuega a le Ami a le Malo Tele i le nofoaga o lo’o i ai manuki i Reston, ae ina ua ma’ea le aso muamua o le galuega, sa talatalanoa ai Jerry ma lona to’alua le tama’ita’i foma’i o Nancy Jaxx i lo la fale. Na iloa ai e Nancy, ua o’o lona to’alua i le tulaga ua matua’i vaivai lava, ma o le taimi muamua fo’i lea ua ‘ofu ai Jerry i le suti lea e puipuia mai ai i virusi ma fa’ama’i. O le tala a Jerry na fai i lona to’alua, “Nancy, e pei ua ou nofo to’atasi i se nu’u tu’ufua ina ua ou ‘ofuina le suti puipuia, ae ou te ofo ia te oe, aua o aso uma aso uma e te fa’aaogaina ai le suti lea.”

 

Na ‘ata Nancy ma a’apa atu ua fusi mai lona to’alua e pele i lona loto ma fa’apea ane i ai, “Jerry, o le galuega ua ou tauto e fai, o le galuega fo’i sa ou naunau i ai, ia ou talia la, aua o le mea na ou loto i ai.” Ua ‘ata’ata Jerry ma tilotilo ane i si ona to’alua e pele i lona loto.

 

I le aso e soso’o ai, na toe alu le solo a ta’avale a le vaega a le Ami e aga’i atu i Reston mo le fa’aauauina o le galuega e pei ona feagai nei ma le Ami. A’o fa’agasolo le galuega, o le taimi fo’i lea o lo’o feagai le ali’i foma’i fa’apitoa e igoa i a Thomas Ksiazek ma le su’esu’eina o vaega o manuki ia na avane mai Reston i totonu o le potu numera 4- i le nofoaga a le Ami i Fort Detrick.

 

O le su’esu’ega lea a le ali’i foma’i o Ksiazek, ua fa’aaoga ai le toto ma pa’u pito i totonu o manuki ma ua fa’aioga lea su’esu’ega o le Elisa, ona e faigofie ona fa’atino. Ua su’esu’e nei e le ali’i foma’i le toto fa’apea ma feau vai (piaga) se’i tulou, o le ali’i sa faigaluega i totonu o le nofoaga o manuki o Milton Frantig. Manatua fo’i, o le ali’i lenei na maua atu e Gene Johnson o lo’o fa’asuati i luga o le mutia i talane o le fale o lo’o tausi ai manuki, o lea la ua fai nei le su’esu’ega a le ali’i foma’i o Ksiazek pe mata ua maua i le virusi pe leai.

 

Manatua fo’i, o le ali’i lenei na tau pa’ilima ai le C.D.C mai Atlanta ma le vaega a le Ami i Fort Detrick, ona ua ave e le C.D.C i le falema’i o Fairfax, ae le i manana’o i ai le vaega a le Ami. Fai mai le fa’amatalaga, ina ua ma’ea le su’esu’ega a le ali’i foma’i o Thomas Ksiazek, na iloa ma mautinoa ai, e le o a’afia le ali’i o Milton Frantig i le virusi o le Ebola, ae foliga mai ua na o se fa’ama’i o le fulu (flu), na maua ai. Ua tu’u fesilisili nei le mafaufau o Ksiazek e fa’apea, “O se misitelio le mea lenei, ae aisea ua le a’afia ai i le Ebola? 

 

E taunu’u ane le solo o ta’avale a le Vaega a le Ami i le nofoaga i Reston, o lo’o agi malie le savili i lea taimi, ua fa’alogoina fo’i le pisapisao mai o tamaiti laiti o lo’o ta’aalo i luga o suigi ma taupega fa’apea ma fa’ase’ega i totonu o le lotoa o le a’oga, lea o lo’o i talane o le fale, lea ua fai ai nei le galuega a le Ami.

 

O le lona lua lea o aso, talu ona fa’afoe e le Vaega a le Ami le galuega i totonu o le nofoaga lea i Reston ma ua amata loa le galuega. O le mea ua fa’atuai ai, ona e fai lava ma fai le malologa mo le ta’i ‘afa itula, e pei ona fa’atonu mai e le ali’i foma’i o Gene Johnson.

 

E faia pea…

 

Fa’aliliu: Akenese Ilalio Zec