Fagogo: O Le Sone Vevela — Vaega 127

Malo le soifua, malo fo’i le onosa’i i faiva ma tiute o lo’o feagai ai ma le mamalu o le atunu’u i lenei taeao fou i lou alafa’i mai i le manuia i le tausiga alofa o lo tatou Mata’i oi le Lagi. E ao ai ona o tatou fa’apea ifo, “Le Atua e, o Oe o le Alefa ma le Omega, o le Amataga ma le Muta’aga o mea uma lava, ia fo’i atu pea le vi’iga ma le fa’afetai i Lau Afio i aso uma o lo matou ola, Amene.”

 

Manatua, o lo’o i ai pea la tatou tala i le nofoaga o lo’o i ai manuki a’o lea fo’i ua feagai nei le vaega a Jerry Jaxx ma Eugene Johnson ma le galuega o le fa’amamateina lea o manuki, ona ua a’afia i le fa’ama’i. Manatua fo’i, e le o mautinoa lelei lava pe o le virusi o le Ebola po’o se isi virusi e tau tutusa ma le virusi mata’utia lea.

 

Ae o auga uma lava o le fa’ama’i lea ua maua ai le ali’i e faigaluega i totonu o le nofoaga lenei, ae fa’aauau pea lau faitau, ma se i o tatou tuliloaina po’o fea o le a o’o i ai le galuega a Fitafita o le Ami a le Malo Tele, lea ua pulea nei le nofoaga lenei i totonu o Reston.

 

Ua fa’aauau pea le galuega ma ua alu fo’i le aso atoa o fa’atino, ae ui lava i lea, ae sa lelei lava tulaga uma, ae se i vagana ai nai fa’aletonu laiti e pei ona i ai tama’ita’i e to’alua a le Ami, lea na fa’aletonu o la suti, ma ua pe fo’i le ma’a e ola ai le masini e fa’amama ai le ea o lo’o fa’aaoga e manava ai.

 

O le isi itu e pei ona ta’ua e le ali’i tusi tala o Richard Preston, i lana tusi lenei, “O le sone vevela, o le le manana’o lea o le vaega a le Ami a le Malo Tele, ia iloa e se Fale Televise, o Leitio fa’asalalau po’o le au tusi tala le galuega o lo’o feagai nei ma le Ami, o le fa’amamateina lea po’o le tapeina o manuki i totonu o le nofoaga lenei i Reston Virginia.

 

Fai mai, o le tagata na mulimuli lava sau i fafo mai le fale lenei, o le ali’i foma’i o Jerry Jaxx, e ta tonu lava le itula e ono i le afiafi, ae ulufafo loa Jaxx mai le fale lea sa i ai manuki. Fai mai ua iloa atu fo’i, e foliga mai ua lima i le sefulu pauna o Jaxx ua pau, ona o le tele o le afu ua alu, o ona foliga fo’i ua matua’i suia lava.

 

E leai se mea tausami na saunia mo Fitafita, a’o alo atu i le latou galuega lea, ma ua lagona le fia a’ai ma le fia fe’inu. Na fai nei le palota a Fitafita, po’o fea se fale ‘aiga o le a aga’i i ai mo sa latou mea tausami, ae na manumalo lava le falea’iga lea e vave ona fa’atino le gaosia o mea’ai o le Taco-Bell.

 

Na fai le fa’atonuga a le ali’i foma’i o Eugene Johnson i Fitafita, ia ‘aua ‘aua lava ne i ta’uina i se tasi le mafua’aga ua o ane ai i le nofoaga lea. Ua alu le solo a ta’avale e agai atu i Taco-Bell, ua le mafai ona taofiofi le fia tausasami o Fitafita, ma ua pule lava le tagata latou i lana mea’ai e oka.

 

A’o fa’asolosolo le okaina o mea’ai a Fitafita, fai mai, na fa’aet’ia le ali’i Satini o Klages ina ua fesili ane i ai se tamaloa o lo’o tu i ona talane, “O a a outou mea na fai i o?, na ou iloa uma lava le tele o ta’avale Van na tutu i tua o le fale, o le a le mea o lo’o tupu i totonu o le kamupani a le Hazelton, ae o le a fo’i le galuega o lo’o fai e le Ami.?”

 

E leai se tali na fai ane e le ali’i Satini o Klages, na ona liliu lava i luma, u’u ma lana ipu mea’ai ma savali loa e le i toe tautala pe tilotilo i se tasi. O tagata uma sa i totonu o le fale’aiga, ua na o le tilotilo ane nei i le Vaega a le Ami, ai o tu’u fesilisili po’o le a le mea a le Ami o lo’o fai i totonu o Reston. O le isi itu, ai ua fa’apea tagata, po’o le mea o le a pa se pomu atomika i totonu o Reston, fua i le o’o ane o Fitafita a le Malo Tele.

 

E faia pea…

 

Fa’aliliu: Akenese Ilalio Zec

Comment Here