Fagogo: O Le Sone Vevela — Vaega 125

Tatou si’i fa’atasi le vi’iga ma le fa’afetai i le Atua Soifua, ona o Lana tausiga alofa mo i tatou e le mavae, e ao ai ona o tatou fa’apea ifo, “Le Atua e, o ai e i matou le tagata agasala ua e saga alofa mai pea i ai, ae tau ia ina o matou o atu i Ou luma ma le agaga maualalo, e fa’afo’i atu le vi’iga, o le fa’amanu ma le fa’afetai e le aunoa i Lau Afio, Amene.”

 

Na muta mai la tatou tala, ina ua o nei i totonu o le fale o lo’o i ai manuki ia Jerry ma lana paga o Thomas, a’o le taimi lea ua fa’atumulia le potu sauniuni i isi Fitafita o le Ami a le Malo Tele. Ua amata nei ona fa’amuolu o latou suti, ua va’ai lava e le tasi le isi, e pei ona polo’ia e Gene Johnson ma Jerry Jaxx, ia galulue fa’atasi i taimi uma.

 

Ua amata ona fa’atutumu tui i va’alau fa’apitoa lea na tapena e le vaega a le Ami e tui ai manuki e fa’amoemoe muamua, ona fa’atoa tui ai lea i le vaila’au malosi e fa’amamate ai. E faselau limasefulu (450) manuki o lo’o totoe i totonu o le fale lenei, o lona uiga e o’o lava le galuega i le po, e pei ona tomumu le leoa ai se tasi o tama’ita’i e fa’apea, e o’o mai le fa’avavau fa’avavau amene, e le toe uma.

 

O se galuega fita ua feagai nei ma le ali’i o Jerry Jaxx ma lana vaega, ae sa ta mau pea i lona loto ma lona mafaufau, ia saogalemu uma lana vaega. O le isi itu na popole i ai le ali’i, ona e laiti Fitafita, o lo’o galulue i le galuega lea, ae sa fa’amoemoe pea i tama tuai, aua o i latou ia ua uma ona ao’oga ma tapenapena lelei i galuega fa’apea.

 

A’o i ai le tele o Fitafita i totonu o le potu lea, ua tapena ai nei tui ma vala’au e fa’amamate ai manuki, o le taimi lea o lo’o i ai fa’atasi ma le ali’i Kapeteni o Mark Haines.

 

Fai mai na liliu ane nei Haines ma toe fa’amanatu i Fitafita le mea e ao ona fai, ia mata’alia, ia fa’aitete, ia ‘aua lava ne i fefe pe popole, aua a tupu loa le tulaga lea, o lona uiga, o le a tula’i mai ai se fa’alavelave ogaoga.

 

O le isi itu sa toe fa’amanatu e Haines, o le tulaga lea e ao ai ona galulue fa’atasi le tagata ma lana paka ua uma ona tofia e Jerry Jaxx. O lona uiga, ia fai ma siaki e le tasi le isi, pe o masae le suti fa’apitoa, po’o lelei le faiga o totigilima, ma ia ‘aua lava ne i fefe pe popole i le taimi o le galuega.

 

Ua toe fa’amatala e Haines le galuega ua feagai nei ma le latou ta’ita’i o Jaxx, ma ia fesoasoani le tasi i le isi i mea uma. Ua galulue le isi vaega o Fitafita i le fa’atulagaga o tui e tui ai manuki, o le tui muamua, o le tui lea e fa’amoemoe ai, ae fai le galuega a le au su’esu’e, o le tui ‘ese lea o le toto o manuki e ave i le lotoa a le Ami mo su’esu’ega.

 

O le tui lona lua, o le tui lea e fa’amamate ai loa ma ave’ese mai totonu o pa o lo’o puipui ai. Ua amata galuega ua tumu atoa le fale i Fitafita o le Ami a le Malo Tele, a’o fafo o le fale, e leai ma se tagata o i ai, pe o se tulaga fo’i e fa’apea, o lo’o i ai le vaega a le Ami i le fale lea. Ua o’o fo’i i televise ma leitio fa’asalalau, e leai se tasi na iloaina le galuega tele ua feagai nei ma le Ami a le Malo Tele.

 

Ua tofu paga uma Fitafita, ma ua galulue lava e pei ona fa’atonuina ai e Jaxx ma Johnson, ia mata’alia ma ia fa’aitete, ‘aua le polepole vale pe fefe fo’i, ina ne i tula’i mai ai se fa’alavelave.

 

E faia pea…

 

Fa’aliliu: Akenese Ilalio Zec

Comment Here