Fagogo: O Le Sone Vevela — Vaega 123

Taeao manuia, i lou alafa’i mai i fanuga lelei i lenei aso fou ua foa’i e le Atua Soifua e fa’aopoopo i lou soifua ma si o’u nei ola. E ao ai ona o tatou fa’apea ifo, “Le Atua e, e fa’asilisili lava Oe i mea uma matou te manatu i ai, aua e leai se mea e faitaga i Lau Afio, ia fo’i atu lava le vi’iga ma le fa’amanu i a te Oe Tama e le aunoa, Amene.”

 

Ina ua taunu’u uma ta’avale a le vaega a le Ami i totonu o le lotoa o lo’o tausi ai manuki, na paka uma lava ta’avale i le pito i tua o le fale, ma ua toe fa’atasitasi ai nei mo le tautalaga a le ali’i foma’i o Gene Johnson a’o le i amataina le galuega. Na iloa lelei lava e Fitafita, e le i maua se malologa filemu a le ali’i foma’i, ona ua iloa atu lava i ona foliga.

 

Na fa’apea le tautalaga a Gene Johnson i Fitafita, “O le galuega o le a tatou alo atu i ai, e le o se ta’aloga, e leai, o le mea moni lava, o su’esu’ega i le vaega lona fa o se virusi mata’utia e le o se ta’aloga. Ua i ai fa’aaliga ua tula’i mai, lea ou te mana’o ia fa’ailoa atu ia te outou. Ua i ai le masalosaloga o le a’afiaga o le tagata soifua i le virusi lenei ua taunu’u ma ua maua ai fo’i tagata. E to’alua ni tagata ua a’afia ma o lo’o fa’ataotolia nei i le falema’i. O i la’ua uma nei, o ni tagata faigaluega i totonu o le nofoaga ma le fale lenei. E tasi le tagata o lo’o matou popole nei i ai, o le taeao ananafi, na ma’i ai. Ua fa’asuati ma pua’i, ua o’o i luga le fiva ma o lo’o taoto nei i le falema’i, e le o mautinoa i le taimi nei pe ua a’afia i le Ebola pe leai.

 

O le tulaga lea ou te mana’o ia outou malamalama ai, e le i uina e se manu, e le i lavea fo’i i se mea faigaluega ma’ai, e le i tuia fo’i i se nila. Ae afai ua a’afia ma maua i le virusi o le Ebola, o lo’o i ai le manatu ua mafua ona a’afia, ona o le ea sa ia manavaina i totonu o le fale lenei.”

 

Fai mai, a’o faia le fa’aaliga fa’alaua’itele a le ali’i foma’i o Gene Johnson, ua na o le fa’alologo o taliga o Jerry Jaxx ma lona popole tele. Ona na te le i iloaina le mea ua tupu i le tagata lea, e leai fo’i se tasi na ta’u ane ia te ia le tulaga lea, a’o lea ua fa’atoa fa’ailoa mai, o lona uiga, e le taumate o le a i ai nisi o le a a’afia ma i’u ina maliliu i le fa’atinoina o le galuega  lenei.

 

A’o faia le tautalaga a Gene Johnson, o le taimi lea, ua amata ona o’o ane matua e tu’u a latou fanau laiti i le fale e tausi ai tamaiti, o lo’o i lalo ifo o le mati’e i talane o le fale lea o lo’o tausi ai manuki. Ua amata fo’i, ona alu le fa’alu’ega a tamaiti i luga o suigi ma pisapisao ma ta’aalo i lea taimi o le teao.

 

Ua toe fa’aauau le tautalaga a Eugene Johnson, “E tatau la ona galulue tatou uma ma ia manatu pea, e mafai ona a’afia le tagata i le virusi o le Ebola e ala i le fa’aaogaina o le ea, ua outou iloa e i ai lava se mea e ona tupu mai, ae peita’i, ua ou iloa, ua lava le tomai o lo’o ia te outou e fa’afoe ai le galuega.”

 

O le taimi tonu lava lea na tau ai le va’ai a le ali’i foma’i o Eugene Johnson i le tama’ita’i e ioga ia Nicole Berke. O se tama’ita’i lalelei toe la’ititi, e sefuluvalu ona tausaga. Na mafaufau Johnson, po’o ai lea tama’ita’i, na te le i va’ai lava i ai, ae a tonu o se tasi o lo’o i le vaega a Jerry Jaxx. Talofa, ua na o ni tamaiti, e laiti ma latou te le o iloa le mea o lo’o fa’atalitali mai mo i latou.

 

Na toe fa’apea ane Johnson, “Ia outou uia pea auala e pei ona fa’atonu ai outou, ia ‘aua lava ne i ai se fa’aletonu, afai e i ai se fesili, e tatau ona e fesili mai i le taimi lenei a’o le i amataina le galuega.”

 

E faia pea…

 

Fa’aliliu: Akenese Ilalio Zec

Comment Here