Fagogo: O Le Sone Vevela — Vaega 122

Fa’atalofa atu i lou maleifua mai i fanuga lelei o lenei taeao fou, i le tausiga alofa a lo tatou Matai oi le lagi. Tatou fa’afetaia ai pea ma fa’afo’i le vi’iga i le Atua Silisili ‘Ese, ona o Ana fa’amanuiaga o lo’o tatou ‘oa’oa ai pea i faleseu ma o tatou sa’a ai i ma’a o malie i aso uma o lo tatou ola. Ae ia manuia faiva ma tiute o le a feagai ai ma oe i lenei aso.

 

Alo maia, o le a toe fa’aauau atu la tatou tala e pei ona masani ai. Na muta la tatou tala ina ua tapenapena nei Fitatifa o le Ami a le Malo Tele o lo’o i totonu o Fort Detrick mo le malaga atu i Reston i le nofoaga o lo’o i ai manuki. O lea fo’i la ua alafa’i ai i le taeao lava lea ia Jerry Jaxx ma alu sa’o loa i le nofoaga ua ma’ea ona fa’asino e feiloa’i ai, ona o ai lea i Reston.

 

Na tu’ua e Jerry Jaxx le la fale ma lona to’alua o Nancy i lea taeao, a’o moe gapepe pea Nancy e le i ala a’e i luga, ma na musu fo’i Jerry e fa’alavelave, a’o fa’asolosolo miti malie a si ona to’alua i lea taeao. Ua alu nei Jerry Jaxx ma ua fetaui ma le ali’i foma’i o Gene Johnson i le nofoaga lea o le a potopoto ai le Vaega a le Ami, a’o le i o i Reston.

 

Na tu’u ane nei e Gene Johnson ia fa’amaumauga lea na galue ai i le po atoa i lona fale i le lima o le ali’i foma’i o Jerry Jaxx. A’o faitau e Jaxx ia fa’amaumauga nei a Johnson, o le taimi lea ua amata ona taunu’u ta’ito’a tasi ane ia Fitafita o lo’o i le vaega a Jaxx. O le to’atele lava, na savavali ane, ona e latalata i le nofoaga lea. O le to’atele fo’i e nonofo lava i totonu o le nofoaga a le Ami i Fort Detrick, a’o tagata savili, e o mai mai nofoaga o lo’o nonofo ai ma o latou aiga.

 

Fai mai ua tu tu nei ma fa’atalitali po’o le a le fa’atonuga mo i latou, o le taimi lea o lo’o pogisa lava le nofoaga e le i malamalama lelei, pau le tulga o lo’o maua mai ai sina tau malamalama o le moli o lo’o tu tonu i talane o le fale lea ua potopoto ai nei.

 

Ua manatu Jaxx, e sili pe a fai fa’apaga, pe ta’ito’alua  fo’i, ona afai ae tula’i mai se fa’aletonu i le isi, ae o lo’o i ai le isi e ripoti ane, ma fa’ailoa le tulaga ua o’o i ai. O lea na ia tofia ai loa Fitafita ia ta’ito’alua, ma o le taimi e taunu’u ai i Reston, o le ta’ito’alua lava lea ia o fa’atasi i taimi uma.

 

Ua taunu’u Fitafita ua tofia e galulue i le galuega lea a le Ami, ma ua la’u loa le uta i luga o ta’avale Van. O mea faigaluega uma e mo’omia e Fitafita, ua uma ona taepna e le ali’i foma’i o Eugene Johnson, ae fa’apitoa lava suti puipuia, ia ‘aua lava ne i fa’aletonu. O le tonu fo’i na fai muamua i le isi galuega lea na o ai fo’i i le nofoaga o lo’o i ai manuki, o le tonu fo’i lea ua fai nei, fa’atoa fa’amoulu lava suti nei pe a o i totonu o le fale. Ona o le popolega ina nei i ai lava se tagata mai i leitioa fa’asalalau po’o le televise, ae maise o nusipepa e iloa le galuega lea o le feagai nei ma i latou.

 

Ua alu nei le solo a ta’avale, ma e leai ma se ta’avale e i ai se laisene a le Ami o pipi’i ai, o ta’avale uma lava na fa’aaoga, o ta’avale savili, o lona uiga o ta’avale o lo’o pipi’i ai laisene o lo’o fa’aaoga e le lautele o tagata o lo’o alaala i Amerika.

 

Fai mai, na maua lelei lava e le poloka i lea taeao, ona ua amata fo’i ona aga’i tagata uma i a latou galuega. Sa tau faigata ai le mataupu, peita’i, na maua pea le onosa’i i lea taimi, ona ua masani i tulaga fa’apea, ae maise o taeao e pisi ai le alatele. Atonu, ua fai lava le tatalo le leoa a le tagata latou, ina ia sao ma uli le fa’amoemoe e pei ona alo atu i ai le vaega a le Ami a Amerika.

 

E faia pea…

 

Fa’aliliu: Akenese Ilalio Zec

Comment Here