Ads by Google Ads by Google

Fagogo: O Le Sone Vevela — Vaega 121

Taeao manuia i le alafa’i mai o le atunu’u i fanuga lelei o lenei aso fou i le alofa ma le agalelei o lo tatou Matai oi le lagi. E ao ai ona o tatou fa’apea ifo, “Lo matou Tama e, oi le lagi, ia paia Lou Suafa, ia o’o mai lou malo, ia faia lou finagalo i le lalolagi e pei ona faia i le lagi, Amene.”

 

Na muta la tatou tala i le fa’amatalaga a le ali’i foma’i o Gene Johnson, lea ua fa’amatala i le ali’i tusi tala o Richard Preston i mea na tutupu a’o tapena le vaega a le Ami e o i le nofoaga o lo’o i ai manuki i totonu o Reston. Ae se i tatou tulituliloaina pea, po’o le a le mea o le a tupu i le galuega ua feagai nei ma le Ami a le Malo Tele. Ae ia maunia lou alo faiva i feau ma galuega o le a feagai ai ma oe i lenei aso.

 

Manatua fo’i, o lenei tala o se tala moni lava ma o le ala lea ua ou taumafai ai e fa’aliliu i la tatou gagana, ina ia o tatou malamalama ai i le mata’utia o virusi e pei ona fa’amatala mai e Richard Preston, e i ai le virusi o le AIDS, o le Malburg ma le virusi o le Ebola. E lua ituaiga virusi ua fa’aigoa o le Ebola, o le Ebola Zaire, o le virusi lea ua sili atu ona mata’utia fa’apea ma le virusi o le Ebola Sudan lea na a’afia ai tagata soifua i tausaga ua mavae i totonu o Aferika ma o’o atu ai i Siamani.

 

Fa mai le fa’amatalaga a le tusi tala o Richard Preston, o le ali’i o Eugene Johnson, na malaga i Aferika i ni tausaga ua tuana’i, ma na lavea ai i le tele o taimi a’o tau sa’ilia le nofoaga na sau ai le virusi o le Ebola i totonu o Aferika. Fai mai na au mai fa’anatinati ai lava i le va’alele tu’u sa’o a le Ami ma ave sa’o loa i totonu o le falema’i o lo’o i le nofoaga a le Ami, USAMRIID o le Slammer.

 

Fai mai, e tele lava ni tulaga fa’aletonu na o’o i lenei ali’i foma’i, ae sa fa’asaoina lava lona ola. O lea la o le a sauni e malaga ma le vaega a Jerry Jaxx i Reston, ua lagona ai le popole o lona loto, ina ne i tula’i mai se tulaga faigata, a’o alo atu Fitafita a le Ami mo le fa’atinoina o le galuega.

 

O Eugene Johnson, e nofo i lona fale o lo’o i le mauga o Catoctin. Ua nofonofo nei na o ia i totonu o le potu, lea ua fai ma ona ofisa ma fa’asolosolo ona mafaufauga. Ua tusitusi uma i luga o le pepa ma fa’amaumau fuafuaga ma tulaga uma e ao ona fai e Fitafita, a’o le i malaga atu i Reston. Na fa’asolosolo ona mafaufauga e fa’apea, po’o le a le itutino o le tagata e sili ona a’afia pe afai o le a galue i le galuega lea.

 

Na alualu lava mafaufauga o le ali’i o Johnson, tau loa lona mafaufau e fa’apea, o lima o le tagata. Ona o lima e fa’atinoina galuega uma, o lima fo’i o le tagata e feso’ota’i atu i lona mafaufau, ona mafai ai lea ona fa’atino lana galuega. O lona uiga, e tatau ona fuafua lelei le gaioi o lima i le fa’atinoina o le galuega lenei, ina ia ‘aua ne i pipi’i ai se toto o manuki. O lona uiga fo’i, e tatau ona fa’aitete ma ia fai pea totigilima i taimi uma.

 

Fai mai, na tu a’e nei i luga Johnson ua fa’ata’ita’i gaoioiga uma o le a fa’atino i le taimi e taunu’u ai i Reston. O gaioiga e tatau ona fai, o gaoioiga e le tatau ona fai, ua tusitusi uma i luga o le ‘api ma fa’amaumau ai. O le fa’aaogaina o mea faigaluega ma’ai, e pei o le naifi, o le selaulu, o nila ma isi mea e fa’aaoga, ua uma ona tapena lelei e Johnson lona fa’aaogaina. O le tulaga e tu ai le tagata, o le tulaga e tatau ona tu ai le isi tagata, ua fa’amaumau uma e Johnson i totonu o lana ‘api.

 

Fai mai na alu alu lava, ai ua fa’alogo ifo le ali’i foma’i, ua tau alu atu ai ma lona malosi, o lea na tu’u ai loa ae alu ane ua fai lana malologa. Fai mai o lea po, na fa’ate’ia ai lona to’alua, ina ua mau le opo a le ali’i foma’i, ma musumusu ane, “Agnes, ou te alofa i a te oe la’u pele, ma e fa’aauau pea se’i i loga e tu’u ifo lo’u tino i le tu’ugamau.” Fai mai na tali ane i ai lona to’alua, “Gene, ou te alofa fo’i i a te oe, always fa’alausoso’o, never fa’amotumotu, fai loa sau malologa, ae sa le moefiti.”

 

E faia pea…

 

Fa’aliliu: Akenese Ilalio Zec