Ads by Google Ads by Google

Fagogo: O Le Sone Vevela — Vaega: 119

Tatou fa’afo’i pea le vi’iga ma le fa’afetai i lo tatou Tapa’au oi le lagi, ona o Lona alofa mo i tatou, ae maise o Lana tausiga faifai pea i aso uma. E ao ai ona o tatou fa’apea ifo, “Le Tama e, ia e fa’amanuia i a i matou i lenei aso, ia fo’ai mai pea lou filemu matou te mapu i ai i taimi o faigata ma puapuaga o le soifuaga nei, a’o le vi’iga matou te fa’afo’i atu i Lau Afio i aso uma o lo matou ola, Amene.”

 

Na muta mai la tatou tala ina ua fai nei le talanoaga a le ali’i o Dan Dalgard mai le kamupani a le Hazelton Washington ma le ali’i foma’i o C.J. Peters mai le vaega su’esu’e a le Ami. Ua malilie fa’atasi nei, e tatau ona fai se tusi e fa’amaonia ai ua malilie le kamupani e tu’u ane le nofoaga o lo’o i ai manuki i lalo o le pule’aga a le Ami a le Malo Tele, ina ia mafai ai ona galulue e ta pe ma fa’amamate uma manuki o lo’o totoe a le Kamupani a le Hazelton o lo’o i Reston, ma ua fa’apea lava ona fai.

 

Ua malie mai Dan Dalgard o le a fai le tusi ona imeli ane lea i a C.J.Peters e fa’amaonia ai le tu’u ane aloa’ia o le nofoaga o lo’o tausi ai manuki i lalo o le pule’aga a le Ami a le Malo Tele. E le i umi, ae taunu’u loa le tusi lea i le ofisa o C.J.Peters, na savali loa C.J. Peters e aga’i atu i le ofisa o General Philip Russell.

 

Ua faitau nei ma toe su’esu’e i la’ua i le fa’aupuina o le tusi ma o la iloa ai, e leai se mea o sasi i le fa’aupuga o le tusi, ma na tonu fo’i i o la mafaufau o le a le fa’ailoaina le tusi lenei i loia a le Ami. Fai mai na fa’apea le tala a General Russell, “O lona uiga e tatau ona tauanau ali’i loia i le ala o le amiotonu.” Na saini lima ai lava C.J. Peters ma General Philip Russell i le taimi lea ma ua fa’amaonia ai loa, o le a fa’amatu’u ane i le Ami a le Malo Tele le malosi’aga e galulue ai i totonu o le nofoaga o lo’o i ai manuki. Na toe fa’afo’i nei le kopi o le tusi i le ali’i o Dan Dalgard, ua uma ona saini e ta’ita’i o le nofoaga a le USAMRiiD.

 

O lona uiga, o le a toe o fo’i le vaega a Jerry Jaxx i le nofoaga o lo’o i ai manuki ma o le vaega lenei e sili atu ona to’atele, ona o lea ua pulea e le vaega su’esu’e a le Ami le nofoaga lea. O le taimi lea, ua tele manuki ua a’afia, ma e i ai le talitonu o Jerry Jaxx, e tatau ona tapena ma sauniuni lelei i latou nei, ina ia ‘aua ne i tula’i mai se fa’alavelave e ono lamatia ai le soifua ma le ola i i latou uma.

 

O le tulaga o lo’o i ai nei Jerry Jaxx i totonu o le vaega a le Ami i totonu o Fort Detrick, o ia e fa’auluulu i ai le vaega atoa o lo’o feagai ma le va’ava’aia o manu e auina atu i totonu o le nofoaga a le Ami i Fort Detrick. O le tulaga o lo’o i ai le vaega lea, ua fa’aigoaina o le iva tasi-T, (91-Tangos). O tama o lo’o galulue i le vaega lea e ta’i sefuluvalu tausaga le matutua, o nisi fo’i, o tagata tuai o le maea, ma ua masani i galuega fa’apea i totonu o le Ami a le Malo Tele.

 

A’o alu le ta’avale a le falema’i e momoli Milton, o le taimi lea ua ta’alo ai e Jerry Jaxx se fonotaga a le 91-Tangos, fa’apea ma tagata faigaluega savili i totonu o le potu fono a le Ami. E ui ina fa’apea o le vaega lenei e laiti tama, ae o tagata savili, o i latou ia ua lava le tomai fa’apitoa i galuega fa’apea. Fai mai ua fa’atumulia le potu fono a le Ami ina ua taunu’u ane uma i latou nei, ma o lea fonotaga ua ta’ita’ia nei e Jerry Jaxx.

 

Na tula’i Jerry ma fa’apea lana tala, “O le virusi o le Ebola po’o se ituaiga e foliga o le Ebola, ma o le a tagofia le tele o le toto, o le a fa’aaoga fo’i mea faigaluega ma’ai, ae maise o suti puipuia.” Ua sa o le potu atoa, ua leai se tasi na toe pisa, ae e le i ta’uina e Jerry le tulaga ua o’o i ai Milton, ona e le i ta’uina e C.J. Peters lea tulaga i a Jerry Jaxx.

 

E faia pea…

 

Fa’aliliu: Akenese Ilalio Zec