Fagogo: O le Sone Vevela — Vaega: 116

Fa’atalofa atu i le mamalu o le atunu’u, i lou maleifua mai i fanuga lelei i lenei taeao fou i le alofa ma le agalelei o lo tatou Matai oi le lagi. E ao ai ona o tatou fa’apea ifo, “Lo’u agaga e, ia e fa’amanu atu i a Ieova, o mea uma fo’i oi totonu i a te a’u, ia fa’amanu atu i lona Suafa Paia, Amene.”

 

Na muta mai la tatou tala, ina ua fa’afesaga’i nei le ali’i foma’i manu o Dan Dalgard ma le vaega a le C.D.C, ma ua fa’amatala i ai e Dan tulaga uma ma mea na tutupu i totonu o le nofoaga o lo’o i ai manuki. O le isi itu, ua mana’o le ali’i foma’i manu, ina ia tapunia vave loa le nofoaga lea ma tu’u atu i le vaega su’esu’e a le Ami, latou te fa’afoeina.

 

Fai mai, e leai se finauga na faia, ua malilie fo’i i ai sui o le C.D.C mai Atlanta, e tu’u atu i le vaega a le Ami latou te fa’afoeina le nofoaga lea o lo’o i ai manuki. Ae o le fesili ua tula’i mai, pe o le a le mea o le a fai i le ali’i o Milton Frantig, lea o lo’o ta’oto’oto pea i luga o le sofa i le fale o lo’o i ai manuki, i lalo o le fa’atonuga a Dan Dalgard.

 

Ona o le galuega a le vaega a le C.D.C. o le va’aia lea o tagata ua a’afia ma ua i ai fa’ailoga ua maua i le fa’ama’i, o lea na manatu ai le C.D.C. ua tatau ona ave loa le ali’i o Milton i le falema’i o Fairfax i totonu o Uosinitone Beltway.

 

Ua nofonofo nei na o Dan Dalgard i lona ofisa fa’atasi ma ona fa’alogona fa’anoanoa ua i ai nei, sa ia manatu ai loa ua tatau ona vala’au le vaega a le Ami i Fort Detrick. Na vala’au nei Dan Dalgard i le ali’i o C.J. Peters ma fa’amatala i ai le tulaga ua o’o i ai le isi tagata faigaluega o lo’o galue i totonu o le nofoaga o lo’o i ai manuki. E le gata i lea, ae ua fa’ailoa fo’i i ai e Dan, ua lafo atu nei ma ua tu’u atu le malosi’aga i le vaega a le Ami a le Malo Tele, e pule ai ma fa’atautaia su’esu’ega i le nofoaga o lo’o i ai manuki.

 

Fai mai, na fa’ate’ia C.J.Peters i lea tala, aua o lona uiga, afai ua a’afia tagata nei pe maliliu fo’i, pe i ai fo’i se isi tulaga ogaoga e ono tula’i mai, o lona uiga, o le a tu’ua’i uma i le Vaega Su’esu’e a le Ami. E le taumate fo’i, o le a ono o’o i se tulaga e ona fa’ailoa ai ni tagi i le Fa’amasinoga a tagata e onaina i latou ia ua a’afia. O nisi ia o manatu na o’o ifo i le loto ma le mafaufau o le ali’i foma’i fa’apitoa o C.J. Peters.

 

O lo’o i ai pea le mana’oga o C.J. Peters e fai e le Ami le galuega o le fa’amamaina lea o le nofoaga lea i Reston, peita’i, o lo’o popole lona loto, ina nei o’o ai le Ami i luma o le Fa’amasinoga a le Malo Tele, pe afai o le a fa’aletonu le fa’atinoina o le galuega.

 

Ae na tu’u ane le tali a C.J. Peters i le ali’i o Dan Dalgard e fa’apea, o le a ia talanoa i le ali’i sinia o le nofoaga lenei a le Ami, po’o le a sona manatu ona toe fa’ailoa ane lea i se taimi vave. Ua talatalanoa nei, i uiga ma auga o le ma’i o le ali’i o Milton, ma na fa’ailoa ane e Dan, ua ave le ali’i o Milton i le falema’i o Fairfax.

 

Fai mai le tala, na lagona le popole o le ali’i o C.J. Peters, ona ua manatu ifo ma toe manatua, afai ua a’afia le ali’i o Milton i le virusi o le Ebola, e le tatau ona ave i se nofoaga o lo’o tumutumu ai tagata. Na toe fa’amanatu ane e C.J. Peters i a Dan le mea na tupu i Aferika i tagata na a’afia, lea na i’u ina tapunia ai falema’i, ona ua pepesi ai le virusi o le Ebola.

 

E faia pea…

 

Fa’aliliu: Akenese Ilalio Zec

Comment Here