Ads by Google Ads by Google

Fagogo: O LE AUUSO MA LE PURINISESE INITIA

[Soso’o ane loa lau faitau i le toe soso’oina o le tatou tala fa’asolo, lea na gata mai i le vaiaso na te’a nei i le taimi lea na faateia ai Iasoni ina ua ia maua le tala ua taunuu fitafita a le fili i totonu o ona laufanua.]

E lei i ai se fitafita o le malo na toe maimauina sona taimi e faaalu ai i ni gaioiga le aoga, ae ua taufai alo uma atu i le taua lea ua amataina nei. E lei toe i ai se avanoa na tuu atu e fitafita a le malo o Initia i tagata o le malo o Asuria ia na maua atu i nofoaga o fefaatauaiga i le taulaga, ae na o le faasolo pulu lava i le fatafata ma tau fai fola i lalo tagata, o tamaloloa, fafine e oo lava i fanau e leai ma se isi na sao mai i sauaga a le taitai ‘au saua lea ua ia taitaiina maia le osofaiga a fitafita mai Initia.  E lei atoa se 2 itula talu ona taunuu fitafita a le fili i laufanua o Asuria ae soo atoa le taulaga i fitafita ma o latou faaleagaina ai le tele o fale, pisinisi e oo lava i atina’e a le malo e lei toe i ai se avanoa na tuu i ai, e ui foi sa mafai ona tali mai fitafita a Asuria i osofaiga nei, peita’i sa fai lava si tuai o a latou gaioiga.

Sei o tatou tuliloaina atu lava ia Iasoni ma ana gaioiga lea ua fai e tali atu ai i osofaiga a le fili. Na ona atoa lava o mea tau a le tama o Iasoni e manaomia mo le taua, oso loa i lana taavale ma agai atu loa i le vaega o le taulaga lea ua logo mai na muamua taunuu i ai au a le fili, peitai na faateia le tama ina ua latalata atu lana taavale i le taulaga, ae ona vaaia le tau fai asu mai o vaega eseese o le taulaga, atoa ai ma le pa pa o fana o loo ia faalogo atu i ai. “Faanatinati le taavale i le vaega tonu lea o loo tatou iloa atu ai le asu ma leo o fana o loo pa pa mai, o le faatonuga lea a Iasoni i le ave taavale. E lei taunuu lelei le taavale i le alatele lea e fesootai ma auala tetele o le taulaga ae ua vaaia e Iasoni nisi o fitafita a le fili o loo latou faapologa ma fasioti tagata o lona malo, o isi vaaiga e aofia ai le tamomo’e o nai tamaiti ae tafana e fitafita, ae o isi e tiga ona alalaga atu i le fia ola ae atili ai ona tafana ma faapologa. Na ona oso lava i fafo o Iasoni, aapa atu loa i ana fulu a u ma amata loa lana gaioiga o le fana fana, e lei misi lava a u o loo tafana atu e le tama ma vaaia ai le taufai palalasi i lalo o fitafita a le fili, ae o le isi itu o loo osofa’i ane ai isi fitafita faapitoa a le tama e ala i le faaaogaina o pelu ma fana e tete’e atu ai i au a le fili. Ao vevesi le taua i le taulaga, na lilo i le manatu o Iasoni o le a i ai se tala e tuia ai lona loto, ina ua faateia o ia i le logo mai o le tala mai totonu o le maota, ua osofaia e fitafita a le fili vaega eseese o le malo e aofia ai le maota o le tupu, ma ua  i ai masalosaloga ua ave faatagata o taua atu ai ma nisi o fitafita faapitoa e aofia ai ma purinisese Lorina.