[Soso’o ane loa lau faitau i le toe soso’oina o la tatou tala faasolo, lea na gata mai i le vaiaso na tea nei i le taimi lea ua talanoa atu ai le tamaitai purinisese o Lorina i le alii o Kati, ma ia faailoa uma atu i ai vaega uma e uiga i lona aumau ai i totonu o Asuria, aemaise ai o le mafuaaga na ala ai  ona ia tuua lo latou aiga ma lo latou malo o Initia.]

E fai atu lava tala ia a le tamaitai purinisese o Lorina, ae o Kati i le taimi lea, ua na o le nofo lava ma faatau pupula atu lana vaai i foliga o le tagata lea la te talanoa, ua faasolo le vaai a le tama i le ulu o le tamaitai purinisese, o ona foliga ma ana gaioiga o loo fai, e oo lava fo’i i lona leo e leai se mea na gole i le faalogo ma le maitau a le pelenise o le malo o Initia.

Ua motu le talanoa a le tamaitai purinisese mo ni nai sekone ina ua maligi ona loimata i lana taulaga umi o loo fai, ona aapa atu lea i le solo lea o loo tautau i lona tauau ua soloi ai ona loimata, ona ea atu lea i luga ma faasaga tonu atu lava i le itu lea o loo ia lagona atu ai le leo o Kati ona toe faapea atu lea o ana upu, “Kati lo’u tuagane laititi, ou te iloa o lou loto atoa o le malo a lo ta tama, o le tamaoaiga ma le mamalu uma o loo i ai, ae afai e fai se faaiuga a le tupu o le malo lenei o Asuria ma fasiotia ai oe, o ai o le a fai ma ia mea o loo i lou malo i le taimi nei,?”

Na ona uma atu lava o upu ia a le purinisese tula’i loa i luga ma tau piipii atu i nofoa ma le puipui o le potu, na te fia maua le faitoto’a e ulufafo atu ai ma le potu.

“Lau afioga i le purinisese, se’i faatali mai lava mo sina sekone,” o le valaau atu lea a Kati i le purinisese ma tu atu lava i luga ua uu mai lona lima ma taumafai e toe faasaofa’i o ia i lalo, o le avanoa fo’i lea na fusi atu ai le tama i le purinisese aua o lea ua ia iloa, o ia o lona tuafafine, ma amata loa le la talanoaga, na te’i fo’i le faalogo a le tamaitai purinisese i le talanoa atu a le tamaititi o Kati e uiga i le mavaega a lona tama atoa ai ma le va feagai ai o le malo o Initia ma Asuria i le tele o tausaga ua mavae seia oo mai lava i le taimi lea.

Na faateia le talanoaga umi ma le faalevaleva a  Lorina ma le aloalii ina ua la faalogoina le faitoto’a o le potu ua tuitui mai e ni tagata faatasi ai ma le alaga o loo sau ai tua, “Toe 5 minute o loo totoe ona maea lea o lou avanoa i le pagota o le taua,” o upu ia na taia ai le faalogo a Lorina ma pei ai o le timu to le maligi o ona loimata aua o lea ua ia mautinoa, afai o le aloalii o se pagota o le taua, e leai se pagota e ola umi pea, aua o lona iuga lava o le oti. Na ona mae’a mai lava o upu ia a le fitafita o loo valaau mai fafo, aapa atu loa ma le tamaitai purinisese ua fusi mai Kati si ona tuagane pele ma tagi ai i luga o lona tauau, e matala mai lava le faitoto’a o loo tagi pea le tamaitai purinisese ma fusi lona tuagane.