Ads by Google Ads by Google

Fagogo: O le Au Uso ma le Purinisese mai Initia

[Soso’o ane loa lau faitau i le toe soso’oina o la tatou tala faasolo, lea na gata mai i le vaiaso na tea nei i le taimi lea na tatala atu ai e le fitafita le faitoto’a, ae o loo tagi lava le tamaitai purinisese o Lorina i luga o le tauau o lona tuagane o Kati.]

Na ona matala mai lava o le faitoto’a ae vaaia loa e Kati ni alii fitafita tino ese se to’alua o loo tutu mai ma la a’upega, ma o la foliga saua ua oso ai lava lona fefe, ae o le taimi lea i le tamaitai purinisese, o loo fusi lava isi ona tuagane ma tagi ai i luga o lona tauau. Pe tusa o se minute talu ona matala le faitoto’a ma tutu mai ai pea alii fitafita e toalua, ae faalogoina loa e Lorina ma Kati le leo o se tasi o alii fitafita ua faapea atu, “Lau afioga a le purinisese, ua poloaina i maua e Iasoni ina ia auina atu le alii pagota o le taua i luma o le maota i le taimi lava lenei, ma ia e afio atu fo’i ua maea ona tapena le taumafataga mo oe i lenei aso.” Na ona uma atu lava o upu ia a le alii fitafita, ona la savavali atu loa lea ua faatu i luga le tamaitai purinisese e le isi oi laua, ma ta’ita’i atu i fafo o le potu ma momoli atu loa i le  taavale i le maota, ae o le isi o i laua na taitaiina atua le alii o Kati ma faaui atu i tua o le maota, i le nofoaga lea e masani ona loka ai pagota o le taua e sauni ai mo le taimi e faataunuuina ai le faasalaga o le oti.

“Lau afioga i le purinisese, aisea ua e mata faanoanoa ai i lenei taeao, e i ai ea se mea ou te faia ina ia toe faafo’i atu ai lou fiafia,?” o le fesili muamua lava lea a le tama o Iasoni  ia Lorina ina ua la ulufale atu ma le fitafita lea o loo taitaiina atua o ia. E le’i tali Lorina i se upu se’i vagana ai lona ifo atu i le tama o Iasoni, ona toe taitai atu loa lea o ia i lona nofoa ma saofa’i ai loa i lalo ma tau to lona sela mo ni nai minute, ona faatoa maua ai loa lea o lona avanoa e tali atu ai i le fesili a Iasoni. Sa na o le faalologo o le tama a’o faasoa ma loimata e le tamaitai purinisese le tulaga ua mafua ai ona mafatia lona loto, ina ua ia iloa o le iuga lava o lona tuagana laititi lea ua aumaia faatagata taua o le oti.

E le’i faatasi ona talosaga Lorina ia Iasoni ina ia faasao le ola o si ona tuagane o Kati, na pau lana faamatalaga na fai i ai, o le faaiuga pe faaoo le oti ia te ia pe leai, o loo i ona aao, o lana faaiuga foi e manuia ai le malo atoa o Asuria, o le a avea fo’i faataitaiga lelei uma poo le leaga o le a ia faia ma auala e mulimuli uma i ai isi foi taitaiga o le malo i le lumana’i. Na momotu faafuasei e Iasoni le la talanoaga ma le tamaitai purinisese, ae se’i la alo i le taumafataga ua maea ona tapena e auauna, peitai e lei umi se taimi talu ona fai le taumafataga ae o la faalogoina loa logo ma faili ua tau fai ta ta ma ili mai, ae o leo foi o pu o taavale ua le malolo le feei i luga.