[Soso’o ane loa lau faitau i le toe soso’oina o le tatou tala fa’asolo, lea na gata mai i le vaiaso na te’a nei i le taimi lea ua agai atu ai nei le tama o Iasoni i lona maota e fia vaai pe faapei le tulaga pagatia lea ua oo i ai lona malo.]

O le naunau tele o Iasoni i le fia vave o'o mai i lona maota pe fa'apei le tulaga pagatia lea ua o'o i ai, na pei ai o se va'alele le alu o le ta'avale, ua le kea lava i omoomo o le 'auala atoa ai ma le to'atele o tagata feoti o lo o fola solo i le alatele ae ua taula’i mai lava le va'ai a le tama i le fia o'o mai i lona maota, ae paga lea, ina ua taunu'u le tama sa ia mautinoa ai le tulaga pagatia ua i ai lona malo, ua ia va'aia fo'i ana fitafita fa'apitoa sa fai ma ona fa'amoemoega i le tausiga ma le puipuiga o le malo ma ona tagata, ua leai ma se isi o ia va'ai atu ai.

O se va'aiga fa'amomoi loto le taimi lea i le tau fai fola mai o tagata feoti, o fafine ma a latou fanau, o fitafita atoa ai ma tagata matutua e o'o lava i tupulaga. O ni isi sa fa'aaogaina i ai e ‘au a le fili fulu a u e fasioti ai ae o ni isi sa fa'aaogaina i ai fana ma ua pei o le paepae mai o le otaota le tau fai laupae mai o tagata o le malo i so o se vaega o le taulaga. E silia i le 5 minute o tu Iasoni i luma o lana ta'avale ma fa'asolosolo lana va'ai i le tulaga pagatia lea ua i ai lona malo, ae na fa'ateia o ia ina ua ia fa'alogoina le e'e mai o le leo o le pu o se va'a e foliga mai o se va'a ua alu 'ese atu. Na fa'apalasi lemu ifo lava i lalo ma le tama ma tagi aue ai lava na o ia ona o le alofa i le to'atele o ola ua maumau ona o faiga saua a 'au a le fili. E silia ma le itula o fa'anoanoa pea Iasoni ma tagi i le alofa i ona tagata.

Na ona tula’i lava o le tama i luga, savali aga'i atu loa i le vaega tonu o lo o i ai le maota na te fia iloaina po o a ni isi va'aiga e maua mai ai, na va'aia e le tama ni isi o ana fitafita o lo o manunu’a e lei feoti o lo o ta'atitia mai i le isi tulimanu o le  maota, o lo o gaoioi mai o latou tino, o le taimi fo'i lea na ia fa'alogoina ai leo o ta'avale o lo o aga’i atu i le vaega lea o lo o tu ai, ma ia va'aia ai ni isi o ana fitafita fa'apitoa sa aga’i atu i le taulaga lea ua toe fo'i mai, o ni isi o lo o manunu’a ae o ni isi o lo o manuia uma. “Iasoni, o manuia oe,?” o le fesili atu lea a le isi ta'ita'i 'au ma savali atu lava ua fa'afeiloa’i le tama ae  o le taimi fo'i lava lea na palasi atu ai ma Iasoni i luga o le tau'au o lana ta'ita'i 'au lea ma matapogia ai. Na pei o le televavave o gaoioiga a foma’i lesitala i le falema'i gaoiga a fitafita i le taimi lea, i le tau togafitiina o le ta'ita'i lea ua tulaga fa'aletonu mai i la latou va'ai, ae o le taimi fo'i lea ua va'aia ai le tau fai aga'i uma mai o isi fitafita a le tama sa i le isi itu o le taulaga, o le to'atele o i latou sa fo'i manuia uma mai sei vagana ai se vaega itiiti na manunu’a.

Na ona mae'a lava o togafitiga fesoasoani sa faia i le tama, fa'atonu loa e le ta'ita'i 'au fitafita uma ina ia fa'ata'alise uma atu i vaega o le malo ma sa'ili mai ai ni tagata o lo o manunu’a ina ia ofo atu i ai se fesoasoani mo i latou. E fa'aifo loa le la i lona nofoaga mau i le afiafi o le aso lea ae mae'a fo'i gaoiga a fitafita mo le tau sa'ilia mai o tagata manunu’a, ma o ni isi na mafai ona maua e aofia ai tagata lautele, o fitafita atoa ai ma fitafita e to'a 8 mai 'au a le fili na maua o manunu’a ina ua lavea le ta'avale na malaga ai, ma o se tasi o i latou nei e foliga mai o se aloali'i o le malo.