Ads by Google Ads by Google

Fagogo: O le ‘Au Uso ma le Purinisese mai Initia

[Soso’o ane loa lau faitau i le toe soso’oina o la tatou tala fa’asolo, lea na gata mai i le vaiaso na te’a nei i le taimi lea na fa’ate’ia ai Lorina ma le ali’i perenise o Iasoni i leo o faili pu ma tagata o lo o fe’ei mai i le a’ai.]

E le’i gagana Iasoni po o Lorina i se ‘upu ina ua la fa’alogoina leo o faili pu, o pu o ta’avale atoa ai ma le fe’ei o tagata, ae ua na o le tilotilo atu o le ali’i o Iasoni i le tama’ita’i purinisese, ae o Lorina i le taimi lea, e le’i ano lava i se mea se’i vagana ai lona punou pea lea i lalo ma tali lana malu taeao, se’i vagana ai ona loimata ua le mafai lava ona tatali le maligi mai i lalo, ona ua lagona i lona tino o leo ia e fa’alogo atu i ai, o fa’ailoilo ia o le fa’ataunu’uina o le fa’asalaga o le oti i si ona tuagane o Kati, ma e leai se vaega o gaoioiga uma a le tama’ita’i o masepu i le va’ava’ai a le tama o Iasoni, ma ua ‘ese ai fo’i ma lagona o le tama i lea taimi, ona ua oso lona alofa i le tama’ita’i purinisese, ma o ia lagona alofa na le mafai ona taofia e le tama i totonu o lona loto, ae ua fa’atinoina loa e ala i lona tula’i ma savali atu i le itu o le laulau lea o lo o nofo mai ai Lorina, ma popo lona tau’au ma fai atu i ai, “Lau afioga a le purinisese, e i ai ea se mea ua mamafa i lou loto ua mafua ai ona e mafatia i lenei taeao.?” o le fesili atu lea a Iasoni ia Lorina, peita’i na tali le tama’ita’i purinisese ma ona loimata ia Iasoni ma fa’apea atu, “E leai se mea o fa’aletonu, ona ua pau lava fo’i o mafatiaga o le loto ua le mafai ona taofi, lea ua mafua ai ona fa’atino e ala i le maligi o loimata.”

E le’i umi se taimi o le fetaliaiga a le tama ma Lorina, ae talosaga loa le tama’ita’i purinisese e momoli o ia i lona potu se’i fai sina malologa ua lagona fo’i le vaivai o le tino, ma fa’apea fo’i ona fa’atino e fitafita fa’apitoa o lo o latou leoina le saogalemu o le tama’ita’i purinisese. Na ona fo’i mai lava o fitafita na o latou momoliina atu Lorina i lona potu, tu’u atu ai loa ma le fa’atonuga a Iasoni i ai, ina ia logo le ta’ita’i fitafita o lo o i ai i le a’ai ina ia fa’atali le fa’ataunu’uina o le fa’asalaga o le ali’i perenise o le malo o Initia se’i taunu’u atu. O le taimi lava na va’aia ai e tagata  le aga’i atu o le ta’avale a le tama o Iasoni, na toe fa’alogoina ai le tau fai alalaga o tagata ma leotetele i le fiafia, ina ua latou va’aia lo latou ta’ita’i ua aga’i atu. “Aumai le pagota i luma nei,” o le fa’atonuga lea a le tama o Iasoni na tu’uina atu i ana fitafita fa’apitoa, ma ia va’aia ai le matala mai o le keli o se tasi o ta’avale fa’apitoa a lana fitafita o lo o fa’asaga mai i le isi itu o le malae, ma ia va’aia ai loa le ta’ita’i mai i fafo o se tagata o lo o ufi uma ona foliga i ‘ofu uli, ma filifili o lo o loka ai ona lima ma ona vae. Na ona taunu’u mai lava o le ali’i o Kati i luma tonu o le vaega lea o lo o tu ai Iasoni, tula’i loa ma le tama o le a tu’u atu le isi fa’atonuga e soso’o ai, peita’i na fa’ate’ia o ia ina ua ia va’aia le ta’avale lea o lo o feavea’i ai purinisese o Lorina ua taunu’u atu i le malae.