Ads by Google Ads by Google

Fagogo: O le ‘Au Uso ma le Purinisese mai Initia

[Soso’o ane loa lau faitau i le toe soso’oina o la tatou tala fa’asolo, lea na gata mai i le vaiaso na te’a nei i le taimi lea na fa’ateia ai fitafita a le tama o Iasoni ina ua fetaui lava lo latou taunu’u atu i le vaega tonu o le mafataga lea o lo’o fa’amoemoe e maua ai sa latou va’a e aga’i atu ai i tai, ae sulugia loa i latou i moli o le isi va’a a fitafita Initia.]

Na faigata ona toe faia e fitafita a Iasoni se isi gaoioiga ona o lea ua matua malamalama uma le vaega lea o lo o latou tutu ai i sulu malolosi o le va’a lea ua ki atu ia te i latou, fa’atasi ai ma le fa’asilasilaga lea ua fa’asalalau atu i le sipika ina ia tu i lalo a latou a’upega ae sisi’i i luga o latou lima. Na umi se taimi o ki mai pea sulu o le va’a fa’atasi ai ma le fa’asilasilaga o lo o tu’uina atu pea i fitafita a Iasoni, ae leai ma se fitafita o aga’i atu i le vaega tonu lea o lo o latou tutu ai, ma na avea lea tulaga ma itu na masalomia ai loa e fitafita a Iasoni, e foliga mai e na o le to’atasi lava le tagata lea o lo o i luga o le va’a lea o lo o ki atu ana moli fua i le leai o se fitafita po o ni fitafita o agai atu ia te i latou. O le tomai ma le agava’a o fitafita a le tama o Iasoni i le fa’avasegaina o taimi ma gaoioiga ta’itasi i taimi o taua, na faia ai loa le fa’atonuga a le isi fitafita ina ia ‘osofai loa le tagata lea o lo o i luga o le va’a pa’u lea e ki atu moli ia i latou.

Na toeitiiti lava tuai gaoioiga a fitafita a le tama o Iasoni, ona, e fetaui lava le mae’a ona o latou osofaia o le tagata lea sa vala’au ane i le sipika i luga o le va’a pa’u, ae o latou fa’alogoina loa le pisapisao atu o isi fitafita a le malo o Initia o lo o tuliloa atu i latou ma le alo ali’i o le malo, peita’i na vave gaoioiga a fitafita a le tama o Iasoni e ala i le fa’aola lea o le va’a pa’u lea sa i luga o le matafaga ma latou aga’i atu ai loa i tai i le vaega o lo o i ai le fuava’atele a le malo, mo le momoliina atu lea o le alo ali’i i le va’a.

Pe tusa ma le afa itula na aga’i atu ai le va’a laitiiti lea i tai ae taunu’u loa i le vaega o lo o taula mai ai le fuava’a tele, ma auina atu ai loa lea o le alo ali’i i totonu, tuli oso atu ai ma i latou i luga o le va’a, ona o latou ta fanaina loa lea o fuava’a ia sa latou fa’aaogaina ma fa’aleaga, ina nei mafai ona fa’aaoga e fitafita a le malo o Initia e tuliloa atu ai i latou. “Fa’atopetope loa gaoioiga uma ma tatou toe fo’i atu i le malo manu e lei tuliloaina mai i tatou e ‘au a le fili,” o le alaga atu lea a le ta’ita’i ‘au i fitafita uma o lo o i totonu o le va’a, ma fa’alogoina ai loa lea o le ola uma o afi o le va’a, ma va’aia ai le se’ese’e malie ‘ese atu mai le ogasami sa taula ai, peita’i ao se’ese’e malie ‘ese atu le fuava’a tele lenei a le malo o Asuria, sa va’aia le tuliloa atu e isi va’a laiti a le malo o Initia e aofia ai ma le tafanaina atu o pomu ona o le taumafai ia mafai ona toe fa’afo’i atu le purinisese ma le alo ali’i lea ua ave fa’atagata o taua e fitafita a Asuria.