Ads by Google Ads by Google

Fagogo: O le ‘Au Uso ma le Purinisese mai Initia

[Soso’o ane loa lau faitau i le toe soso’oina o la tatou tala fa’asolo, lea na gata mai i le vaiaso na te’a nei i le taimi lea o lo o pisi ai le isi vaega tele o le malo i toe sauniga o latou fitafita na maliliu i le taua, ae o le isi vaega o lo o pisi i le taumafai lea e tete’e atu i ‘au a Asuria lea ua taunu’u atu i o latou laufanua.]

E faigata ona manino lelei se va’aiga fa’amomoi loto i vaega ‘ese’ese o lo o tupu i totonu o le malo o Initia i le taimi tonu lea, ona e fai o le pisi o tagata i toe sauniga o fitafita na maliliu mai le taua, a’o lea fo’i e pisi le isi vaega to’atele o fitafita i le tali atu lea i osofa’iga a ‘au a Iasoni lea ua latou nofoia se vaega o vaega o ‘ele’ele o le malo.

Se’i o tatou aga’i atu lava i totonu o le maota o le malo lea o lo o vavao ai le taua i le va o fitafita Initia ma ‘au mai Asuria. E le’i umi lava se taimi na peko solo ai fitafita a Iasoni i le tau sa’iliina o le aloali’i lea na fa’auluulu i ai le osofa’iga lea na fasiotia ai le to’atele o tagata o lo latou malo, ae o latou tau atu loa i se tasi o potu e sausau ‘auro uma lona tino, o le faitoto’a ma ona foliga mai e ‘auro atoa, e o’o i fa’atagata e lua o lo o fa’aitu alalua ai i luma o le faitoto’a, o le ‘auro  uma o lo o fausia ai. Na koma fitafita a Iasoni mo ni nai sekone ao latou taumafai e taumate pe fa’apefea ona o latou ulufale i totonu, peita’i a’o tutu ai fitafita a le tama o Iasoni i luma tonu lava o le faitoto’a, o le taimi fo’i lea na iloa mai ai loa e fitafita a le fili lea o lo o ta’amimilo solo i isi vaega o le maota i latou ma o latou osofaia lea, ma, o le isi to’alua o fitafita e to’afa a Iasoni o lea ua tali mai nei i le osofa’iga ae o le isi to’alua o lo o fa’aauau pea le la sa’iliga i totonu o le  potu lea e sausau ‘auro uma lona tino, la te fia iloaina po o ai o lo o i totonu o lea potu.

Na mulimuli fitafita ia e to’alua a Iasoni i fa’atonuga uma o lo o i tusia i luma o le faitoto’a ma mafai ai loa ona o la tatalaina faitoto’a ‘auro e lua o lo o pito i luma, ma o la va’aia ai le isi fo’i faitoto’a u’amea o lo o i tua atu o le faitoto’a ‘auro lea, pe tusa ma le tolu mita lona va mai le faitoto’a ‘auro. “O le a nei le mea o le a ta faia i le faitoto’a u’amea lea ua ta iloaina atu, e foliga mai e ‘ese le vaega o le maota lea ua ta o’o mai i ai,” o le musumusu atu lea a le isi fitafita i lana soatau lea o lo o la to’alua, a’o la tutu pea ma taula’i le la va’ai i le faitoto’a u’amea mo ni nai sekone, ae o la va’aia loa ua mumu moli i le  vaega lea  o lo o la tutu ai, ona tau fai se’i loa lea o a la pelu ma sauni ina nei osofaia i la’ua e ni ‘au a le fili, peita’i na o la va’aia luma o le faitoto’a u’amea o lo o fa’apipi’i ai fo’i isi fa’atonuga e mafai ai ona tatala le faitoto’a ma ulufale atu ai i totonu. O le taimi lava na mafai ai e le ‘auali’i ia ona tatala le faitoto’a u’amea, na matua maofa ai o la’ua mata ina ua la va’aia le vavala mai o se maota e uiga ‘ese lona matagofie, o lo o i ai se nofoa e foliga mai o se nofoa o se tupu, ma se tagata o lo o nofo mai ai i luga o le nofoa.