Ads by Google Ads by Google

FAGOGO: O KATI LE LEOLEO NANA

[Sosoo ane loa lau faitau i le tatou tala faasolo mo lenei vaiaso, lea na gata mai i le vaiaso na tea nei i le taimi lea ua faailoa atu ai e le Sui Komesina ia Kati le aafia ai o le taitai fitafita ma ni isi o fitafita i ni isi o faalavelave na maliliu ai ni tagata i totonu o le aai, peitai e lei maua lava.]

Na umi se taimi o punou le alii leoleonana i lalo ao ia faalogo ma le totoa i le molimau a le Sui Komesina lea ua fofola atu i le taimi o le la talanoaga, e faatatau i le tele o mea matuia o lo o tutupu i totonu o le aai, peitai e le o mafai e leoleo ona saili ma molia i latou o lo o aafia ai, ona e foliga mai o taitai o vaega au ma taitai o leoleo o lo o aafia ai i solitulafono nei.

E ui i le te’i tele o Kati, peitai e lei avea lea ma itu na tape ai lana masini pu’eleo, ae sa faaola pea e pue ai le la talanoaga atoa ma le Sui Komesina. “Ou ke kaukigo aku foi, o le faalavealve lea ma maua ai le silia i le 40 kilokalama o le aisa ma le silia i le afa milioga o le kupe sa i kokogu o se container ga aumai i le vaa, o le uka uma lega a le Kaikai Fikafika, ga pau la’u vaega sa faia i le makaupu lega, o a’u ga faakoguina leoleo e faakaga le faaulufale iga mai o mea ga,” o le molimau lea a le Sui Komesina.

“O ai uma leoleo na aafia i le mataupu lena ae o a foi mea na maua e leoleo na,?” o le toe tulitatao atu lea a Kati i le faamatalaga a le Sui Komesina, “E koa 5 leoleo na aafia ai, o leoleo uma lava ga sa i lalo o la’u vaavaaiga, lea ua galulue gei i kokogu o vaega au a le malo e le o koe leoleo,” e fai lava tala a le Sui Komesina ma ia lau le lisi o igoa o leoleo na aafia ia Kati. Pe tusa ma le 3 itula le umi o le faatalatalanoaga a Kati ma le Sui Komesina ae maea loa, ona toe foi loa lea o le tama i le hotel lea o lo o faamautu ai ma faatulaga le isi laasaga o le a oo i ai lana sailiiliga, ina ua maea, sa ia tago loa i le telefoni ma vili ana leoleo faapitoa e toalua o lo o totoe ma faailoa i ai, ia ta le 6:00 i le taeao o le aso e sosoo ai ua latou fetaui i le fale’aiga masani i le taulaga, sei o latou talanoa i mataupu fou ua mafai ona maua mai i le la talanoaga ma le Sui Komesina.

Na ofo Kati i le matautia o le molimau lea ua tuu atu e le Sui Komesina, ma e foliga mai e le laititi le galuega lea o le a latou sauni atu i ai, ae talu ai o Kati o le tagata ua agavaa i le galuega lea, na ia faataoto ai le faafanua o laasaga e tatau ona latou ui muamua i ai, ma ua latou manatu e tapena se tusi saisai e pu’e faapagota ai le taitai au o le malo ma ana fitafita faapitoa e toatolu ia o lo o lalamua i mea valea nei, ina ia faa faigofie ai la latou galuega. E taunuu atu le tama i le fale’aiga o lo o i le ogatotonu o le taulaga, ua leva ona inuti mai ai ana leoleo faapitoa e toalua.