[Sosoo ane loa lau faitau i le tatou tala faasolo mo lenei vaiaso, lea na gata mai i le vaiaso na tea nei ina ua tuuina mai le faaiuga a le faamasinoga, e solo atoa i le falepuipui le au alii e toalua ia na laua tafanaina leoleo e toatolu i le aai.]

Na ona maea lava ona lau mai o faasalaga a le au ula ia e toalua, tofu loa leoleo ma le tagata ae taitai atu i fafo o le potu faamasino. E savavali vae a’o mata e le emo ese ma Kati lea o lo o tu atu i le isi tulimanu o le potu faamasino. Na vaaia e Kati pupula le fiafia a le au alii ia ia te ia ae lei fefe pe popole ai, sei vagana ai lona agaga fiafia o lo o fai lana galuega. E silia ma le minute o faatau pupula le au ula ia ma Kati ae le’i fefe ai le tama ae ua atili ai ona pupula atu i ai. Na vaaia e le tama le tumutumu o tagata i fafo o le fale faamasino, ai o aiga ia o alii leoleo e toatolu ia na tafana e le au alii ia, o ni isi o tagata sa ia vaaia o fafine ma latou fanau o lo o uu mai ata o leoleo ua maliliu. O isi e fetagisi ae o isi sa na o le feei i luga ma tusi o latou lima i le itu lea o lo o alu ane ai le taavale a leoleo o lo o momoli atu ai alii pagota.

O Kati o lo o ofu savili i le taimi lea, ae o totonu o ona ofu savili o lo o fai o lo o nana ai fana e lua mo le puipuiina o ia. Na ona savaili mai lava o le tama i fafo ma le potu faamasino, ma ia vaaia ai aiga o leoleo o lo o tumu i fafo ona maligi lemu lea o ona loimata ao savali ese atu i le isi itu o le vaega e paka ai taavale ma tu tu mai ai,  e le’i umi ae vaaia loa le taitai leoleo ma lana failautusi ua savavali mai fafo o le potu faamasino ma feiloai atu i aiga o alii leoleo ua maliliu, i ni nai minute sa faia loa sa latou faasalalauga faapitoa e faailoa aloaia ai le faaiuga a le faamasinoga faasaga i alii fasioti tagata e toalua ua maea ona lau a la faasalaga.

Ua leai se isi e toe pisa ae ua na o le sioa ma faalologo ao tolaulau e le taitai leoleo le faaiuga a le faamasinoga, o le taimi lava na faapea atu ai le taitai leoleo, o le faasalaga ua solo atoa i le falepuipui, e le mafai ona toe tatalaina i tua, o le taimi lea na faalogoina ai le feei o tagata ma pati ina ua faamalieina o latou loto i le faaiuga a le faamasinoga, peitai na toe faapea atu le taitai leoleo, “Ana leai le galuega mae’ae’a na gafa ma le alii leoleo le la o lo o tu mai i le tulimanu la le,” e fai lava tala a le taitai leoleo ma tusi lona lima i le itu lea o lo o tu mai ai Kati, “e le mafai ona taunuu lenei mataupu i se taunuuga fiafia mo outou uma.” O le taimi lava na faasino ai le lima o le taitai leoleo ia Kati, na tau fai togi uma i ai ulu o tagata e fia iloa poo ai, ae o Kati i le taimi lea, sa na o le tu ma talo mai i ai lona lima mo ni nai sekone, ona toe punou lea i lalo ma savali aga’i i lana taavale.