Ads by Google Ads by Google

FAGOGO: O KATI LE LEOLEO NANA

[Sosoo ane loa lau faitau i le tatou tala faasolo mo lenei vaiaso, lea na gata mai i le vaiaso na tea nei ina ua faailoa e leoleo ia Kati, o ana tama faapitoa sa i totonu o le taavale na lavea ua maliliu uma.]

Na ona maua lava e Kati o le tala ua maliliu isi ana tama faamoemoeina e toalua, ona faaauau atu ai lava lea o lana savali i le vaega o lo o lavea mai ai le taavale, a’o taumafai leoleo ma tagata faigaluega a le EMS e aumai i fafo le aualii ia mai totonu o le la taavale. “Onosa’i lou loto i le mea ua tupu i isi sui o lau vaega, o lenei lava galuega e faapena, ae faafetai mo galuega lelei sa outou faia i se taimi puupuu sa outou galulue faatasi ai ma lau vaega faapitoa,” o le musumusu atu lea a le Komesina o Leoleo ia Kati ao la tutu faatasi i le vaega tonu o lo o tupu ai le faalavelave. E lei umi ona i ai Kati i le nofoaga lea a faamavae ma toe alu ese loa, ona o le naunau lava e fia tulituli le mataupu i alii e toatolu ia na o latou tafanaina taavale a lana vaega lea ua mafua ai ona maliliu le isi toalua.

Manatua fo’i, e tutupu vevesi nei ao o lo o faagasolo le faamasinoga o alii e toalua ia na o la tafanaina leoleo i le isi pito o le aai, ma o le au alii la ia na o la faailoa i le faamasinoga, o le sui komesina o leoleo lea o lo o i tua uma o osofaiga nei, o ia lea o lo o sapalaiina atu fana, tupe ma fualaau faasaina e faaaoga e i latou o lo o faatinoina solitulafono eseese nei. E saofa’i loa Kati i totonu o lana taavale ae tatagi ma lana telefoni, ma le vaai atu o isi alii e toalua o lana vaega lea ua vili atu. “Hello, o fea oulua i le taimi lenei,?” o le fesili lea a Kati, ae tali mai lana vaega, o laua lea ua agai atu i le fale faamasino e faalogologo i le lauina o le faasalaga a alii e toalua ia na tafanaina leoleo i le isi pito o le aai.

“Oi, ia ua lelei la, o lea o le a ou alu atu ou te fia faalogologo foi a’u i se faasalaga e tuu atu i le au alii na,” na ona uma lava o le tala lea a Kati, tape ma lana telefoni ae faanatinati atu loa i le taulaga i le vaega o lo o i ai le fale faamasino, lea o le a lau ai le faasalaga a le au sifi ia na o latou lokaina.

“Tula’i le faamasinoga,” o le alaga lea a le leoleo o lo o tu i le faitotoa, ona tau fai laulaututu uma lea o tagata sa i totonu o le potu faamasino, ae fetaui loa foi ma le ulufale atu o Kati i totonu, ma faagasolo loa galuega a le faamasinoga. O le mataupu lona fa sa i luga o le lisi, o le lauina lea o le faasalaga a le au alii ia e toalua. E lei umi ae fofogaina loa le faasalaga mo alii ia e toalua. “E lua moliaga o le fasioti tagata ua ta’usalaina ai i laua nei e toalua, ma ua manatu ai le faamasinoga, o le a faasalaina i laua i faasalaga e lua o le soloatoa lea i le falepuipui e le mafai ona toe tatala i tua.”