Ads by Google Ads by Google

FAGOGO: O KATI LE LEOLEO NANA

[Sosoo ane loa lau faitau i le tatou tala faasolo mo lenei vaiaso, lea na gata mai i le vaiaso na tea nei i le taimi lea ua taunuu ai i totonu o Italia le tama o Kati ma ana leoleo faapitoa e toalua mo le faagasoloina o le latou suesuega i le solaaga a le taitai fitafita ma ana fitafita e toafa.]

 

Na ona logo tala lava o le komesina o leoleo a le malo o Italia ua taunuu le alii leoleo nana o Kati ma ana leoleo faapitoa e toalua i totonu o le malo, faatonu loa ma ana leoleo suesue faapitoa e to’a 4 e leoleo ma puipui le saogalemu o Kati ma lana vaega, amata mai lava i le taimi e taunuu ai i le atunuu seia oo i le taimi e toe tulioso ai i totonu o le vaalele o le a toe fo’i. Na ona faailoa atu lava o pine leoleo nana a Kati ma lana vaega i le malae vaalele, fesootai loa ma le vaega a le malae vaalele i le ofisa o leoleo e logo i ai malo faapitoa ia ua taunuu, e le’i umi ae taunuu loa leoleo suesue e toafa ia ua tofia e puipuia le saogalemu o Kati ma ana leoleo i le malae vaalele, ma piki mai Kati ma ana leoleo ma momoli atu loa i le nofoaga faapitoa lea ua faamoemoe e faamautu ai.

 

O le nofoaga lea ua ave i ai Kati ma ana leoleo e toalua, o le nofoaga e faapitoa mo suesuega a fitafita a le malo o Italia, e le soona avea i ai ni isi tagata sei vagana ai lava sui o isi atunuu e malaga atu mo le faia o ni suesuega faapitoa i ni solitulafono, poo ni suesuega lotoifale foi a le malo o Italia e faia ona o ni solitulafono mamafa ma le matuia ua aafia ai ni isi o ona tagata nuu. E taunuu atu Kati ma ana leoleo, ua leva ona faatali mai le Komesina o leoleo a le malo o Italia, ma faia ai loa sa latou feiloaiga e tusa ai o le malaga atu, ma faamatala ai loa e Kati tulaga uma e faatatau i le Sipi uliuli lea na latou mulimuli atu ai i tua, ae emo ane le ata e ese tagata o lo o i ai, ma ua maliliu uma le toa 5 sa i totonu o le Sipi lea, sa faamatala foi e le tama solitulafono o lo o masalomia ai le taitai fitafita ma ana fitafita e toafa, lea e fesootai ma solitulafono ia ua mafua ai ona loka le sui komesina o leoleo a le latou malo i Sepania.

 

O le taeao na sosoo ai na taunuu ai loa Kati ma ana leoleo e toalua i le falepuipui lea o lo o loka ai le taitai fitafita ma ana fitafita na sosola mai, ma amata ai loa le suesuega o lenei mataupu, ma o se itu na matua maofa ai le tama o Kati, ona o le toatele o tagata o lo o taua o latou igoa o lo o aafia i solitulafono eseese ma mafua ai ona maliliu ma leiloloa le silia i le toa 100 tamaitai aoga i totonu o le aai i le lua tausaga talu ai. E lei toe faatali le taitai fitafita i lona faailoaina uma o tagata o lo o aafia i faiga faasolitulafono nei, lea e aofia ai ni isi o sui o le Palemene a le malo o Sepania, ona o i latou ia sa faatauina atu fualaau faasaina i totonu o le malo, faatasi ai ma le taumafai e ave faamalosia tamaitai lalelei ina ia mafai ona fesuia’i ma fualaau oona ae tuuina atu i ni isi o tagata milione i totonu o le malo ae maua mai ai le faitau miliona ma miliona o tupe.