Ads by Google Ads by Google

FAGOGO: O KATI LE LEOLEO NANA

E toe fa’atalofa atu i le aufaitau i le fa’aiuga o lenei vaiaso, ae alo mai loa i le toe sosooina o le tatou tala fa’asolo, lea na gata mai i le vaiaso na te’a nei i le taimi lea ua fa’ailoa atu ai e le ali’i ave taxi ia Kati le mafua’aga o lona fia talanoa ia te ia.

 

Na te’i Kati i le fa’amatalaga a le ali’i ave taxi ia te ia, ae o lona tomai masani i auala eseese e fa’atino ai lana galuega, na mafua ai ona ia tali atu i le ali’i ave taxi e fa’apea, “e le o a’u o se leoleo nana, e ese fo’i la’u matafaioi na mafua ai ona ou sau i le fonotaga lenei, e fa’amalulu atu ai i lau susuga”, na ona uma atu lava o tala ia a Kati tu loa i luga ma savali aga’i atu i le la potu ma lana paga, ae ua tu fo’i le ali’i ave taxi ma savali ese atu i le vaega o lo o paka ai lana ta’avale ma lona talitonuga, e le o talanoa sa’o atu le ali’i leoleo nana numera tasi o le lalolagi ia te ia. Na ona tago atu lava o le ali’i ave taxi i lana telefoni, oomi loa ma le numera a lona tama ma toe talanoa i ai i le faafitauli o lo o tupu, ma ia talosagaina ai lona tama ina ia saili se isi auala e mafai ai ona talitonu le ali’i Leoleo nana numera tasi o le lalolagi, e moni le mataupu o lo o ia taumafai e talanoa atu i ai.

 

O le taeao na sosoo ai, o le taeao tonu lea ua tuu po ina e amata usuia ai le fonotaga tele o lo o talimalo ai le atunuu o Aferika, ma ua vaaia foi le tumutumu o tagata usufono mai isi atunuu o le lalolagi, e fia auai i le fonotaga a Leoleo nana uma o le lalolagi. E fetaui lava le tatala mai e Kati o le faitoto’a o le la potu o le a la savavali ese mai ma lana paga e aga’i atu i le isi nofoaga lea ua fuafua e fai ai le, ae tu atu loa ma se ali’i leoleo o le malo o Aferika, ma tu’u atu se teutusi i lona lima. “Lau susuga Kati le Leoleo nana numera tasi o le lalolagi, o tusi lenei mai le Kovana o le malo o Aferika”, na ona tago atu lava o Kati i le teutusi, ona luelue lea o lona ulu ma faafetai atu i le ali’i leoleo, ona toe faaauau loa lea o le la savaliga ma lana paga e aga’i atu i le nofoaga lea ua faatulaga mo le fono.

 

O le gaioiga maumau lava a Kati sa fai ina ua taunu’u i le potu fono, o lona tatalaina lea o le teutusi ae faitau le tusi o lo o i ai, ae na te’i le tama ina ua tau atu lana faitau i le tusi, o le tusi mai le tama o le ali’i ave taxi lea sa la talanoa i totonu o le Pa pia, o le tamaloa fo’i lea ua avea nei ma kovana o Aferika, o lana uo mamae lava lea i taimi ao la aooga faa Leoleo nana i Sepania, o lea e talosaga atu ia te ia, ina ia fai se la fesootaiga ma lona atali’i, o ia tonu lea o lo o uili uma i ai meatotino o le malo, e mafai foi ona la galulue faatasi i le tau sailiina o le au faatupu faalavelave lea na galulue faatasi ma le tamaloa faipisinisi leaga o Tomasi, lea na fasiotia mai i Enelagi. Na te’i Kati ina ua fa’ai’u le tusi a lana uo kovana i lona faapea atu ia te ia, “Afai fo’i e mafai ona e fesoasoani mai la’u uo ia te a’u, o lea ou te fia maua se fa’amatalaga i le tagata na ia fasiotia le tagata leaga lena o Tomasi, ae se’i ofo atu i ai se taui tele mo ia”.