FAGOGO: O KATI LE LEOLEO NANA

E toe fa’atalofa atu i le aufaitau i le fa’aiuga o lenei vaiaso, ae alo mai loa i le toe sosooina o le tatou tala fa’asolo, lea na gata mai i le vaiaso na te’a nei i le taimi lea na fa’ateia ai Kati ina ua ia vaaia le ali’i ave taxi lea sa tau fa’alavelave ia te ia i le isi fale kalapu, o lo o saofa’i mai i le fale kalapu lea o lo o eva ai.

 

O le te’i tele o Kati ina ua ia vaaia le ali’i ave taxi lea sa la tau vevesi i totonu o le Fale Kalapu na eva muamua ai, o lo o nofo mai i le isi laulau o le fale kalapu lea o lo o la tafafao ai ma lana paga, na manatu ai loa ua tatau loa ona ia fasiotia le ali’i lea, manu e le i tuai lana fa’aiuga. Na toe oka e Kati isi ipu meainu e fa, ona tu’u lea o ipu e lua i luga o le la laulau, ae fa’atonu le teine faigaluega e ave isi ipu e lua i luga o le laulau o lo o saofa’i mai ai le ali’i fai pulou kaupoe o lo o fa’asaga mai i le isi tulimanu, ona toe fa’auau loa lea o le evaga a Kati ma lana paga. Manatua o le taimi tonu lava fo’i lea o lo o vevesi ai le fale talimalo sa nonofo muamua ai le ali’i Leoleo nana ma lana paga, ma ua vaaia fo’i i luga o news le vevesi o lo o tula’i mai, e foliga mai e to’atele tagata ua maliliu ai.

 

O le te’i o le ali’i ave taxi i ipu uaina e lua lea ua tu’u atu e le teine faigaluega i luga o lana laulau, na mafua ai ona ia fesili po o ai na avatu ai, ae na tusi le lima o le tama’ita’i i le laulau o lo o nofo mai ai Kati ma lana uo, o lea na tula’i ai loa le ali’i ave taxi ma savali atu i le laulau o lo o i ai Kati ma lana uo, ma fa’afetai atu i ai e tusa ai o le fa’aaloalo, ma lana fa’aupuga, “ou te fia talanoa ia te oe pe a tapuni le Pa”, e le i tete’e Kati ae sa lue i ai lona ulu e fa’ailoa atu ai lona taliaina o le talosaga ua fa’ataoto atu, ona toe savali lea o le ali’i ua saofa’i i lalo ma inu ana ipu uaina e lua o lo o i ai, ae ua alo atu fo’i Kati ma lana paga e fa’aauau le la tafaoga seia o o lava i le taimi na tapuni ai le Pa, ma la sauni ai loa o le a tuua le fale kalapu ae toe fo’i atu i le la potu lea ua uma ona totogi, ae na te’i Kati ina ua toe valaau mai le ali’i ave taxi, “se fa’amolemole lava lau susuga pe maua sina avanoa mo a’u se’i ta talanoa ai”, ma faliu Kati i tua ma ia iloa atu ai le ali’i ave taxi.

 

“E i ai se mea taua e te fia talanoa ai ia te a’u, a o ai fo’i oe, o fea fo’i e te sau ai, ae o le a fo’i sau mea e fai?”, o le mau fesili lea ua saputu atu a Kati i le ali’i ave taxi, ae o lo o tu lava le ali’i e aunoa ma sana tala, se’i vagana ai lana talosaga pe maua se avanoa mo ia se’i o la talanoa, ona fa’atonu lea e Kati o lana paga e muamua i le la potu ae se’i la talanoa ma le ali’i lea. Na te’i Kati ina ua fa’ailoa atu e le ali’i ave taxi ia te ia, o ia o le atali’i o se ali’i milionea i totonu o Aferika i Saute, o ia fo’i lea na tofia fa’apitoa mai e lona tama e saili le fale talimalo o lo o fa’amautu ai le Leoleo nana numera tasi o le lalolagi mai Italia, la te talanoa ma fa’amasani, o ia fo’i lea o le a lua galulue fa’atasi i le osofaiga tele o lo o fuafua fa’asaga i le tamaloa faipisinisi ua maliu o Tomasi ma ana vaega fa’atupu fa’alavalave.

Comment Here