Ads by Google Ads by Google

FAGOGO: O KATI LE LEOLEO NANA

E toe fa’atalofa atu i le aufaitau i le fa’aiuga o lenei vaiaso, ae alo mai loa i le toe sosooina o le tatou tala fa’asolo, lea na gata mai i le vaiaso na te’a nei i le taimi lea na fa’ateia ai Kati ina ua oso fa’afuase’i se tauga fana i totonu o le fale’aiga ma maliliu ai ni tagata se to’alua.

 

Na fa’ataga le ano le ali’i Leoleo nana mai Italia i le vaaiga lea ua ia iloaina atu, ae na fa’ataga aapa atu i le tama’ita’i lea la te paga ma opo mai ma fai atu i ai la te o i le potu ina ne’i la lavevea, e fai lava tala ia a Kati ma aapa atu ua opo mai lana paga ma la tamomo’e loa aga’i i totonu o le potu, ae o le taimi lea na vaaia ai e le tama le tau fai laga mai o tagata ofu uli ma a latou a’upega, ma ua avau le tauga fana i totonu o le fale’aiga sa la i ai, ma fa’asolo atu ai i le isi o le fale talimalo atoa lea, ma ua vaaia fo’i le pisi solo o tagata usu fono e saili se nofoaga e mapu lelei ai, ae o Kati ma lana paga, e le i toe aga’i i se isi nofoaga ae ua aga’i sa’o atu loa i le la ta’avale o lo o paka mai i le itu o le malae, tuli oso ai i totonu ma le aga’i ese atu loa i se saoasaoa uiga ese, ae ua la vaaia fo’i le tau fai emo solo mai o moli o ta’avale a leoleo a le malo atoa ai ma le Ami, lea ua tau fai lolofi ati e fesoasoani i le vevesi lea ua ripotia mai le oso malosi i totonu o le nofoaga o lo o fuafua e tatala aloaia ai le fonotaga i le taeao e sosoo ai.

 

E le i leva ona alu ese atu le ta’avale a Kati ma lana paga, ae maua loa ma le fesootaiga a le tama i lona ofisa autu i Italia, ma ia logoina loa i ai le mea ua tupu, o laua lea ua sosola ese ona o le vevesi ma le tauga fana lea ua tula’i mai i totonu o le faletalimalo o lo o la nonofo ai, ona fa’atonu mai loa lea e le Ofisa autu i Italia le tama, e aga’i ese mai le nofoaga o lo o la i ai, ae saili se isi fale talimalo e mautinoa la te mapu i ai mo le po, e fa’atalitali ai se isi fa’atonuga mai le vaega sa fa’atulagaina le fonotaga, po o fea le taimi ma le aso lea ua fa’amoemoe e toe tolopo i ai le fonotaga na mafua ai ona la malaga atu. O se tama’i fale talimalo e tu i le isi aai e mamao ese mai le nofoaga lea o lo o tula’i mai ai le fa’alavelave, o iina lea ua aga’i atu nei i ai Kati ma lana paga ma la fa’amautu ai loa mo le po, ae manatua fo’i, e o ese mai le vaega e le i leva ona amata le la tafaoga o le afiafi, ma ua manaia fo’i manatu ma lagona ua oso ae ina ua uma ipu ta’ilua, ae na toe fa’aopoopo numera ina ua taunu’u i le nofoaga fou lea ma la iloa ai, e sili atu le saogalemu ma le matagofie o le faletalimalo lea nai lo le nofoaga sa la i ai muamua.

 

Ua toe fa’aauau tafaoga o le afiafi, ma ua le mafai fo’i ona toe taofi le fiafia o le ali’i Leoleo nana numera tasi o le lalolagi ina ua ia vaaia le matagofie o fa’afiafiaga i totonu o le fale kalapu, atoa ai ma le tau fai fiafia uma o tagata, ae na liua lagona fiafia i le fa’anoanoa ina ua te’i le vaai a Kati i lona vaaia o le ali’i ave taxi lea na taumafai e fa’alavelave atu ia te ia, o lo o nofo mai i le isi nofoaga o le fale kalapu, ae ua toeititi lava tapuni le Pa.