E toe fa’atalofa atu i le aufaitau i le fa’aiuga o lenei vaiaso, ae alo mai loa i le toe sosooina o le tatou tala fa’asolo, lea na gata mai i le vaiaso na te’a nei i le taimi lea na iloa atu ai e le ave taxi ia Kati ua savali ese atu mai totonu o le fale kalapu.

Na ona iloa atu lava e le ave taxi o Kati lea ua savali ese mai luga o le laulau sa saofa’i ai, toe liliu loa ma le ali’i ae mulimuli atu i tua o le tama ma lona manatu, ua ia maua le tagata o lo o tau sailia e leoleo po o le fale talimalo, lea fo’i ua ofa atu le taui tupe e 5 miliona ia te ia pe afai na te maua Kati i soo se vaega o le taulaga. O le po lea o lo o tupu ai le tuliga lea, e sosoo ma le taeao e tatala aloaia ai le fonotaga faaletausaga a Leoleo nana uma o le lalolagi, lea ua usuia i se tasi o aai o Aferika i Saute.

Na avea le telegese o le savali a le ave taxi ma itu na te’i ai lava ua ia le toe iloa atu Kati po o fea ua afe i ai, ae o le taimi lea ua i totonu le ali’i o le la potu ma lana uo, tatala ese ana teuga sa fai ae ofu loa i ana teuga masani lea e iloa ai o ia e tagata faigaluega o le fale talimalo, atoa ai ma leoleo po ia o lo o faia le amio valea o le fasiotia o tagata ese o lo o autova’a. Na ona uma lava ona sui o teuga a Kati, tuu loa ma ana tama’i fana e lua i totonu o taga o lona ofu talaloa o lo o fai, ona faataga savali atu loa lea i le pati lea o lo o faia i totonu o le fale kalapu, ma la fetaui ai ma lana paga o lo o tafao mai na o ia i luga o le isi laulau. E savali ane fua Kati e aga’i atu i le laulau o lo o nofo mai ai lana paga, ae o le taimi lea i mata o leoleo po faapea ai ma isi sui o le vaega faavevesi tagata, e le o talitonu o latou mafaufau i le vaaiga lea ua latou iloa atu, ona e foliga mai ua amata ona tau masalomia o ia i le isi tagata lea o lo o teu faa leoleo nana, e foliga mai o ia lava lea o lo o fesuisuia’i atu ana teuga i totonu o le fale talimalo, e foliga mai fo’i la e i ai se isi mea o lo o i tua atu o fonotaga faa leoleo nana a le malo, fua i le fai ma fesuisuia’i ana teuga i totonu o le fale talimalo.

Na ona saofa’i lava i lalo o Kati, ae fetaui ma le taunuu atu i ai o le ali’i ave taxi, ona faatoa aga lea o e avetasi sei fai pe na te iloa le tagata lea, ae na te’i le ave taxi ina ua ata atu i le tama ae lei ata i ai le tama, e le masani i ai Kati i le alii le ua saofa’i atu i le la laulau ma lana paaga, ona fesili tofo tofo lea i ai o le ave taxi ia Kati pe manaomia se vai inu po o se isi mea e aumai i le faleoloa o le fale kalapu, ae na te’i le ave taxi ina ua tali atu i ai Kati fa’apea, “aisea ete fa’atinoina ai galuega e le o sau galuega, afai e le o oe o se tagata faigaluega i totonu o le fale talimalo, e le tatau fo’i la ona e taumafai e fesiligia pe faatalatalanoa tagata usu fono mai isi malo o le lalolagi, o lo o lolofi mai e fia auai i le fonotaga o lo o usuia i lo outou atunu’u, ma fai so latou sao i lea fonotaga”. E uma atu loa le tala lea a Kati ae fa’alogoina loa le pa o le fana, ma le vaai atu o Kati i le isi tulimanu o le fale, e to’alua ni ali’i o lo o ta’atitia mai ai ua maliliu.