[Sosoo ane loa lau faitau i le tatou tala faasolo mo lenei vaiaso, lea na gata mai i le vaiaso na tea nei i le taimi lea ua faafesootai ai Kati le ofisa o leoleo a le malo o Italia, ina ia vaai le taitai fitafita a le malo o Sepania lea o lo o malaga atu ma ni alii fitafita savili se toafa ina ia taofia faapagota uma i latou e faatali ai le vaega faapitoa o leoleo nana ia ua malaga atu i le isi vaalele.]

E taunuu le uaealesi a Kati i le taitai o le malo o Italia, ae o le taimi lea ua toe afa itula tulau eleele le vaalele tele lea o lo o malaga atu ai le taitai fitafita ma ana fitafita faapitoa e toafa. Na ona taunuu lava o le vaalele, amata loa ona gasolo i fafo le pasese ma savavali atu i vaega taitasi ua faamoemoe e kilia ai latou mo le ulufafo atu, ae o le taitai fitafita ma ana fitafita faapitoa, na ui sa’o lava i le vaega lea e kilia ai sui o soo se militeli a atunuu eseese e ulufale atu i totonu o Italia, ma o iina na faigofie ai ona maua i latou e leoleo.

Na ona maea lava ona kilia o pepa malaga mo le taitai fitafita ma ana fitafita, savavali sa’o loa i le faitoto’a lea e ulufafo atu ai i le vaega e paka ai taavale a le militeli a le malo o Italia, peitai na faateia le taitai fitafita ina ua tatala atu le faitoto’a ae latou vaaia le ova i le toa 20 leoleo o lo o laulaututu mai i fafo o le faitoto’a ma latou a’upega.

“Faaali mai tou ID faamolemole,” o le faatonuga lea a le taitai i leoleo sa pito mai lava i luma o le faitoto’a, ma savali atu lava i le vaega o lo o tutu mai ai le taitai fitafita a le malo o Sepania ma ana fitafita faapitoa e toafa. Na vaaia e leoleo le tau fai gaioi uma o fitafita ma le latou taitai i le lagaina mai o a latou ID ma tuuina atu loa i le taitai leoleo. “Talu ai o se poloaiga mai le malo o Sepania, ua faia ai e le Faamasinoga maualuga a Italia le poloaiga e taofia ai outou i lalo o le vaavaaiga a le malo sei taunuu mai leoleo nana faapitoa a le malo o lo o malaga mai mo le faia o ni suesuega e tusa ai o tuuaiga faasaga ia te outou,” e fai atu lava tala a le taitai leoleo ma ia faatonuina loa ana leoleo ina ia taofia uma i latou nei i le falepuipui, ae o latou ato ma meatotino uma ia taofia i se nofoaga faapitoa e faatali ai le taimi e toe foi atu ai i lo latou atunuu.

O le afiafi lava o le aso lea na tulaueleele ai loa le tama o Kati ma ana leoleo faapitoa e toalua i totonu o le laumua o Italia, ma latou aga’i sa’o atu loa i le nofoaga o le militeli a le malo mo le faamautuina o ni isi o a latou feutanaiga e uiga i le mataupu e faatatau i le taitai fitafita ma ana fitafita faapitoa e toafa. E pisi Kati ma ana leoleo nana faapitoa e toalua i le suesueina o le mataupu i le taitai fitafita ma ana fitafita, ae o le taimi lea o lo o pisi ai foi leoleo a le malo o Sepania e suesue tagata e toalima ia na maua ua maliliu i totonu o le Sipi na masalomia sa sosola ai le taitai fitafita ma ana fitafita, poo le a la latou sootaga ma le taitai fitafita.