E toe fa’atalofa atu i le aufaitau i le fa’aiuga o lenei vaiaso, ae alo mai loa i le toe sosooina o le tatou tala fa’asolo, lea na gata mai i le vaiaso na te’a nei i le taimi lea ua tulimata’i ai e Kati le talanoaga a lana paga tama’ita’i ma le ali’i faigaluega o le Pa Pia lea o lo o fai mai i luga o le laulau.

E le i toe emo ese mata o Kati i le taimi atoa lea ina ua ia vaaia suiga nei i lana paga tama’ita’i lea o lo o talanoa mai ma le ali’i faigaluega o le Pa Pia. Na te’i le tama ina ua ia toe iloa atu ua pu’e e le ali’i lea le ata o lana paga i lana telefoni, ona ia vaaia lea ua tula’i le ali’i faigaluega ma savali aga’i atu i le pito i tua o le Pa Pia mo ni nai minute, e le i umi ae ona vaaia loa se isi ali’i se to’atasi e laei mama ua fa’ataga savali mai i luga o le vaega e oka ai mea inu, ina ua mae’a sa toe fa’ataga savali atu loa i le itu lea e saofa’i mai ai le tama’ita’i lenei ma nofo ai loa i lana laulau, ona vaaia lea e Kati o le ali’i lea ua fesili i le tama’ita’i i lona igoa, ma sa tali i ai le tamaitai, ona fesili fo’i lea o le tama’ita’i i le ali’i lea i lona igoa, ae po o ai fo’i o ia ua mafua ai ona nofo atu i ona autafa, ae na ata le ali’i ma tali atu i ai o ia o le loia.

“O oe o le loia?”, o le fesili atu lea a le paga a Kati i le alii lea la te faa fesaga’i, ma ua amata nei ona fa’ato’ato’a atu lana vaai ona ua tau sau le nenefu o lana vaai ua ova lona ‘ona, “O lea lava tama’ita’i, o a’u o se loia mai le malo o Sapania, o lea ou te usufono mai i le fonotaga tele a Leoleo nana a le lalolagi lea e faia i le vaiaso fou i le laumua nei o Aferika i Saute ...” Ua amata le talanoaga a le to’alua lea ae o le taimi lea o lo o tuli mata’i uma mai e Kati gaioiga o lo o faia ina ne’i a’afia atu ai lana paga i le ali’i lea o lo o la talanoa, e le i atoa se itula talu ona talanoa le ali’i lea ma le paga a Kati ae vaaia loa ua tu i luga ma savali atu i le nofoa o lo o i tafatafa o le tamaitai ma toe nofo ai, ae pe tusa o le afa itula talu ona saofa’i le ali’i lea i tafatafa o le tama’ita’i ae vaaia loa e Kati le tutu i luga o le ali’i lea ma lana paga e foliga mai o le a savavali aga’i i se mea.

E le i toe fa’atali le Leoleo nana i le taimi lea ae ua tago atu loa i lana fana o lo o fulu i luma o lona manava ua fa’alatalata mai i fafo ina ia vave ona papa’i atu i ai ona lima lapopo’a, ona fa’ataga tu lea i luga ma savali aga’i i le Bar ma toe oka mai ai isi ana ipu uaina e lua, ona savali loa lea ua saofa’i mai i le isi nofoa e fa’afesaga’i lelei lava ma le laulau lea o lo o fai mai ai gaioiga a le to’alua lea. Na manino i le vaai a Kati e foliga mai e musu le tamaitai e alu ae o lo o tauanau o ia e le ali’i o lo o la toa’alua la te o. E le i toe fa’atali Kati ae ua savali atu loa ma musumusu i le ali’i lea, “Tu’u le tama’ita’i aua e te toe pa’i i ai, e le o fia alu o ia i le mea lena e te mana’o i ai ..” na vave le fa’asaga i tua o le ali’i loia ma tau atu ai lana vaai ia Kati o lo o tu mai i ona luma ma ona foliga saua, ona ia manatu lea, o le a ia osofaia le ali’i lea ua fa’alavelave atu ia te ia.