Ads by Google Ads by Google

FAGOGO: O KATI LE LEOLEO NANA

E toe fa’atalofa atu i le aufaitau i le fa’aiuga o lenei vaiaso, ae alo mai loa i le toe sosooina o le tatou tala fa’asolo, lea na gata mai i le vaiaso na te’a nei i le taimi lea ua maua ai e Kati le tala, o ali’i nei na auina fa’apitoa mai i Enelagi e saili le tagata e igoa ia Kati e fasioti.

 

E lei malamalama lelei le taeao na sosoo ai ae ulufale loa Kati i totonu o le ofisa o leoleo o lo o sosoo ma le falepuipu lea e taofia ai ali’i e to’afa lea ua masalomia e o mai i se vaega fa’atupu fa’alavelave, ma ia talosagaina ai le Ta’ita’i Leoleo mo se avanoa na te fesiligia ai ali’i e to’afa sa taofia fa’apagota mai i le faletalimalo “O ai oe fa’amolemole?”, o le fesili fia iloa lea a le Ta’ita’i Leoleo ma tu’u atu lona lima e fa’atalofa ai ia Kati. “O a’u o Kati le Leoleo nana numera tasi a Italia, o a’u lea na logoina le Ofisa o leoleo ina ia taofia fa’apagota ali’i nei, ina ua masalomia lo latou faia o ni gaioiga fa’atupu fa’alavelave i totonu o le Faletalimalo” Na luelue le ulu o le Ta’ita’i Leoleo ina ua malamalama lana fesili, ma ia fa’atonuina ai loa ana leoleo e tatala mai ali’i pagota o lo o taofia i le potu taofia, ma auina atu i totonu o le potu e fai ai faatalatalanoaga se’i fesiligia i latou e tusa ai o le mataupu lea ua mafua ai ona taofia i latou.

 

“Aisea ua outou faia ai nei uiga tau fa’amata’u i totonu o le Faletalimalo, ae o fea fo’i tou te o mai ai ...?” o isi ia fesili a Kati sa fai i le au ali’i e to’afa ia i le taimi o le latou fa’atalatalanoaga, ao nonofo mai i a latou nofoa ma latou lima o lo o ta loka, ae o lo o tofu i latou ma leoleo o lo o tutu i tua e vaavaaia se gaioiga e ono tula’i mai. “O matou o fitafita mai le malo o Enelagi, na auina fa’apitoa mai matou e saili ma fasioti le tagata e igoa ia Kati, o ia o se Leoleo nana i totonu o Italia nei, o ia lea ua fa’amaonia sa ia fasiotia le ta’ita’i o se tasi o Vaega Faipisinisi Tele i totonu o Enelagi, lea sa mafai ona lagolagoina gaioiga a fitafita a le malo ma maua ai se vaega tupe e tausi ai aiga o fitafita sa galulue ai”, o le tali atu lea a le isi alii o le to’afa lea i le fesili a Kati. “Ua outou mauaina la le tagata sa outou sailia?”, o le toe fesili atu lea a Kati, peita’i e leai ma se isi o i latou na tali, o lea na toe fesili ai Kati, “e i ai se isi o outou e tali mai, ua outou maua la le tagata sa outou sailia?”, peita’i sa tumau pea le leai o se isi e tali, on fa’atonu lea e Kati leoleo uma o lo o i totonu o le potu ina ia tuumuli ese, ae tuu mai na o latou ma alii pagota e to’afa i totonu o le potu, ma sa usita’i uma i ai leoleo. Na ona tuu muli ese lava o leoleo, tula’i loa ma Kati i luga ua savali fa’alatalata atu i le vaega o lo o nonofo mai ai ali’i nei e to’afa, ona ia toe fesili lea i ai e fa’apea, “Toe pau lava lea o la’u fesili, na outou maua la le tagata sa outou taumafai e saili?”, na fiu Kati e fa’alogo se tali e leai, o lea na ia fa’apea atu ai, “O a’u o Kati le Leoleo nana sa outou sailia”, na ona mae’a lava o le tala lea a tama se’i loa ma lana fana ma tafana ai loa le au ali’i ia.