Ads by Google Ads by Google

FAGOGO: O KATI LE LEOLEO NANA

[Sosoo ane loa lau faitau i le tatou tala faasolo mo lenei vaiaso, lea na gata mai i le vaiaso na tea nei i le taimi lea ua alu ai le tali e a Kati ma lana uo lea e pulea le fale kofe sa masani ona malolo i ai.]

Talu ona nofo Kati i le aai lea ma avea le faleaiga lenei o se nofoaga e fiafia e koma i ai mai lana galuega o se leoleo nana, o le taimi muamua lea ua la mafuta lelei ai ma le tamaitai o Tiana lea o lo o pulea le faleaiga, ma ua maua ai le avanoa o Tiana e talatalanoa ma tuufesili ai i le tama i tulaga o suesuega i tagata na tafanaina leoleo i luma atu o lona faleoloa, aemaise ai o le tele o isi mau solitulafono o lo o salalau solo i luga o televise, nusipepa ma leitio i tamaitai o lo o ave faamalosi atoa ai ma kegi faatau fualaau faasaina. E tiga lava ona naunau Tiana e fia iloa tulaga o suesuega i mataupu nei, ae faataga le ano ai lava le tama, sei vagana ai lona faapea atu i le tamaitai, “e i ai lava le taimi o ituaiga news na, ae o le taimi lenei, o le news pito sili lava ona manaia i le faalogologo o news i la ta mafutaga aemaise ai o tala e faatatau ia te oe,” o le tala lea a Kati na ata Tiana, ae te’i loa le tama i le tatagi o lana telefoni, ma le vaai atu o le isi alii o lana vaega. “Boss, o fea ua e gimo i ai,?” o le fesili ata mai lea a le alii lea ia Kati, “O a’u lea ou te relax i le fale kofe a la’u uo, sei tau fai ai sina koma ua te’a atu le isi avega sa tau saili,” o le tali lea a Kati i lana vaega, ona ia ta’uina lea i ai o le tuatusi o le nofoaga o lo o i ai.

“O le a se meaai e te fia ai ai,?” o le fesili lea a Tiana ma lona leo faagau loto, ae o Kati i le taimi lea, ua mafaufau i lana vaega lea o le a o mai, ona faapea atu lea i le teine, “aumai ni New York steak se fa special, ae o a’u e lava a i lou mata ataata mai,” o Kati lea. “O fea o le a saga ave i ai na meaai na o oe lau malaga,?” o Tiana lea, “Se aua ete popole leiloa lava poo i ai ni tagata homeless o fia maua ni meaai i lenei taimi, lea o le a ou tago e faatau meaai ma ave i ai.”

E fetaui loa le vela mai o meaai sa oka ma le ulufale loa o le vaega a Kati i totonu o le faleaiga, ona faataga o lea o le au alii i le isi laulau ma talatalanoa mai ai, pei lava e le masani ma le tama. Na ona saofafa’i lava o le aualii i luga o le laulau, ae taunuu atu loa foi ma le teine faigaluega ma tuu atu i ai le menu ma fesili mo le latou oka pe afai ua latou sauni, ae te’i i le oso mai o le tala a le isi alii, “aua ete popole tamaitai, e le o lagona se fia ai i lenei taimi, a maua mai lava ni a matou faguvai se fa ua lava lea,” o le tali lea a le isi alii o le toafa lea na mafua ai ona ata oomi le tamaitai faigaluega ma toe foi i tua, ae na te’i ina ua fai atu i ai le tama o Kati, “siaula, vaai le oka lea na avatu e Tiana e ave i le laulau le la o lo o nonofo mai ai alii la e toafa faamolemole,” o le tala atu lea a Kati i le teine faigaluega ona toe faliu lea ma faaauau le la talanoaga ma Tiana, e le’i umi ae vaaia loa le ulufale atu i totonu o le faleaiga o ni alii se toatolu ma o latou foliga saua.