FAGOGO: O KATI LE LEOLEO NANA

[Sosoo ane loa lau faitau i le tatou tala faasolo mo lenei vaiaso, lea na gata mai i le vaiaso na tea nei i le taimi lea na tula’i mai ai le fa’aletonu i le malae va’alele ina maua i le tusi folau o Mena o lo o tau sailia o ia e leoleo a le malo o Enelagi.]

 

E tau toe fesili atu Kati i le tama’ita’i faigaluega o le kamupani va’alele po o le a tonu le fa’aletonu o lo o tula’i mai i le tusi folau o Mena, ae fa’afuase’i loa ona vaaia e le tama ni ali’i leoleo se to’a fa o lo o savavali sa’o mai lava i le faitoto’a pito i tua o le vaega lea e siaki ai le pasese, ma aga’i sa’o mai lava i le vaega lea o lo o latou tutu atu ai, ona fesili lea o le isi ali’i leoleo i le tama’ita’i faigaluega e fa’asino le tagata lea e fa’aletonu lona tusi folau, ma te’i ai Kati ina ua tusi atu le lima o le teine faigaluega ia Mena, ona vaaia lea o isi leoleo e to’alua ua savali atu agai i le vaega o lo o tu mai ai Mena, ona faapea atu lea i ai o le isi ali’i leoleo, “Siaula, pe mafai lava ona maua sina avanoa tatou te talatalanoa ai i totonu o le tama’i potu la le e fa’atatau i si fa’aletonu laititi lea e tula’i mai i lou tusi folau.

 

Na malie Mena ona latou savavali loa lea i totonu o le tama’ita’i e tusa ai o le fa’atonuga a le au ali’i ia, ma le lilo i le mafaufau o Mena, ua uma ona fa’apipi’i e le Leoleo nana mai Italia ana tama’i masini i totonu o lana ato ta’ita’i o lo o asoa i lona tauau, atoa ai ma le isi tama’ita’i masini i lana uati o lo o taulima, ma ua faigofie ai ia Kati ona ia mata’ituina gaioiga uma atoa ai ma talanoaga o le a faia. Na ona taunuu lava o alii leoleo ma Mena i totonu o le potu lea e faatalatalanoa ai tagata e tulai mai ai faaletonu i a latou pepa malaga, ona fesili loa lea i ai o le isi alii leoleo, pe aisea ua manaomia ai o ia e le ofisa o leoleo i totonu o Enelagi, pe sa i ai fo’i sana solitulafono sa faia i totonu o le malo ua mafua ai ona sailia o ia e leoleo, ae na tali i ai Mena na te le iloaina le mafuaaga ua ala ai ona manaomia o ia e leoleo o le malo, e le i molia muamua foi o ia i se solitulafono.

 

E fai talanoaga a le toatolu lea i totonu o le potu, ae o le taimi lena o lo o lagonaina uma e Kati, tasi lava le popolega sa i le loto o le tama, ina nei avea le faaletonu lea ua tulai mai ma itu latou te misi ai le vaalele lea e tatau ona latou malaga ese ai i le isi 2 itula, ona tulai mai ai loa lea o se faaletonu e ono maua ai latou e nisi o sui o le vaega faatupu faalavelave a le tamaloa o Tomai. O le le to’a tele o Kati i le tuai mai o Mena ma leoleo na ala ai ona toe savali atu ma toe fesili atu i le tamaitai faigaluega, po o le a le umi o le talanoaga a Mena ma leoleo o lo o faia, ae na tali le tamaitai lea, e le toe fo’i mai latou, o Mena ua auina atu i le ofisa o leoleo ona o nisi o ana solitulafono ua mafua ai ona tau saili o ia e leoleo. “O a solitulafono e le i solitulafono muamua lava lo’u to’alua, faafefea na e fai mai sa solitulafono lo’u to’alua,” o le avaavau atu lea a Kati i le tamaitai faigaluega a le kamupani vaalele.

Comment Here