FAGOGO: O KATI LE LEOLEO NANA

[Sosoo ane loa lau faitau i le tatou tala faasolo mo lenei vaiaso, lea na gata mai i le vaiaso na tea nei i le taimi lea ua pisi solo ai tama faamoemoeina a le tamaloa leaga o Tomasi e saili solo le tama’ita’i o Mena ma ona matua i totonu o Enelagi, ina ua fa’amaonia i a latou suesuega, o Mena lea na fesoasoani ia Kati i le fasiotia o Tomasi.]

 

E le i alo tamala tama fa’amoemoeina a Tomasi i le saili ina o Mena i vaega eseese o le atunuu, atoa ai ma le ata o Kati lea ua latou mauaina mai ata video sa pu’e i le taimi na sosoo ma le fa’alavelave, ma latou mauaina ai, e foliga mai o se tagata fa’atupu fa’alavelave le ali’i lenei na alu atu ma nofo i le fale talimalo ma le faamoemoe e fasioti Tomasi, pau le mea lea o lo o nenefu i mafaufau a tama faamoemoeina a Tomasi, e le iloa poo fea e sau ai le tagata lenei o Kati, pau la latou talitonuga o lo o i ai, o Kati o se tagatanu’u lava o Enelagi.

 

O le malae va’alele lea o lo o pisi ai tama faamoemoeina a Tomasi, o le malae va’alele lea o lo o fuafua Kati latou te pu’eina le va’alele ma Mena ma nai ona matua e aga’i atu i Italia, ma ua toe 5 nei itula ona oo lea i le taimi o le va’alele. E le i taitai le vaveao ae tau fagu loa Kati ia Mena, e fafagu ona matua e sauni toeititi ona latou aga’i atu loa lea i le malae va’alele. Na pisi le tama i le tapenaina o le latou ti mo le taeao, ma ua avea lea ma itu na faapea ane ai Mena i lona loto, “ta’i lelei si nei tamaloa ma le loto alofa ia te a’u ma o’u matua, e le faapea le tamaloa sa ma nonofo muamua, e sili atu lava ia te ia le ava ma le moe vaivai, a’o Kati, e le gata e tautala sa’o ae toe loto alofa fo’i,” o mafaufauga fai vavale ia o le tama’ita’i a’o tau pula pula ona mata e le i taitai uma lona fia moe.

 

E le i atoa se itula na pisi ai Kati i le tapenaina o le malu taeao ae mae’a loa, ona alo loa lea o le toeaina ma le olomatua i le la taumafataga, ae talatalanoa Kati ma Mena i le potu malolo ma matamata le TV, ae fa’afuase’i ai loa ona alu atu le ripoti e fa’atatau i osofaiga mata’utia ua faia e le vaega a Tomasi i nofoaga e i ai tagata matutua a le malo, e ala i le susunu i lalo o fale ma fasioti nai tagata matutua, e oo lava foi i le aufaigaluega ua fasiotia uma. E fetaui lava le toe lua ane o itula taunuu i le taimi o le va’alele ae taunuu loa Kati ma lana aumalaga i le vaega e paka ai ta’avale, ma latou sikaili ua sui uma ona o fuafuaga a le tama ina ia puipuia ai Mena ma nai ona matua mai le ono mateia e le au faatupu fa’alavelave, ona latou fasiotia lea. Na ona taunuu lava o le tama ma lana au malaga i le malae vaalele, aga’i sa’o atu loa i le vaega e siaki ai tusi folau mo le fa’amautuina o le va’alele e aga’i atu i Italia, ae o se itu na faateia ai le tama o Kati, ina ua oomi atu le tusi folau o Mena ae kiliki mai ai le faaupuga, “o Mena o lo o sailia e leoleo a Enelagi.”  Na vaaia e le tama’ita’i faigaluega o le va’alele le le mautonu o le pupula e Kati, ona taumafai atu lea o Kati e fesili i le tama’ita’i e toe oomi le tusi folau a Mena, peitai na vave gaioiga a le tama’ita’i ma ia oomi ai le ki e fa’ailoa ai i leoleo o le malae va’alele e i ai le mea o lo o tupu.

Comment Here