[Sosoo ane loa lau faitau i le tatou tala faasolo mo lenei vaiaso, lea na gata mai i le vaiaso na tea nei i le taimi lea na faafuase’i ai ona pasae le fale ina ua pa pa pomu sa tatao ai e Kati i luma o nofoa o le potu malolo.]

Na tete’i matua o le tama’ita’i o Mena ina ua pasae fa’afuase’i le la fale a’o i ai ali’i e to’afa na o atu e asi laua. “Auoi!, o le a le la mea ua tupu, auoi!” o le alaga lea a le olomatua ma aapa atu ua fusi mai le toeaina, ae o le toeaina i le taimi lea, ua tata vale lava lona moa ona o le fefe i le tagata lea o lo o latou nonofo faatasi i totonu o le ta’avale.

“Mena, o fea a tatou o i ai,” o le fesili lea a le toeaina i lona afafine, ae sa faaloto tele atu i ai le teine i lona tama, e leai se mea la te toe popole ai o lea ua saogalemu la ola, o latou fo’i o le a malaga ese ma le atunuu o Enelagi i le aso lea, ona o lea ua lamatia o latou ola e le vaega faatupu fa’alavelave a Tomasi.

“O ai Tomasi,?” o le fesili fia iloa lea a le toeaina, “Se Tomasi lea sa fai ana fale tali malo, lea fo’i sa ou faigaluega muamua,” o le toe tali atu lea o le teine i lona tama. Na te’i le toeaina ina ua faamatala atu e lona tama ia te ia le tala e faatatau ia Tomasi ma le mafua’aga na oti ai. “Loga uiga o lau kala siaula Mega, o le kamaloa lea kakou ke o faakasi o le fasioki kagaka,?” o le fesili fia iloa lea a le toeaina, ae na musumusu atu i ai Mena, “Se Papa leai, aua ete popole,” na motu faafuase’i le talanoaga ina ua afe le ta’avale a Kati i se tasi o fale’aiga tele lava, ma ia faatonuina ai loa le teine ma ona matua e sili ona latou afe i le fale’aiga lea e fai ai sina faamalosi tino ona ua alu fo’i le aso.

A’o fai le taumafataga, na fa’aaoga ai loa e Kati le avanoa na te fa’amalamalamaina ai i le ulugalii le tala atoa o le mea o lo o tupu, ma le isi laasaga lea o le a latou aga’i atu i ai. O iina na faatoa iloa ai e le ulugalii, o Kati, o le Leoleo nana mai Italia sa malaga asiasi mai i Enelagi mo le faataunuuina o le misiona faapitoa na auina mai ai o ia, ma o lea fo’i ua mae’a, ma ua sauni e toe fo’i atu i Italia ma le tuutuuga, la te o ma Mena i Italia la te nonofo ai ma fai ai le la aiga.

“Na ou te’i ina ua talanoa mai Mena ia te a’u e fa’atatau ia te oulua, o le mafuaaga lena na toe tolopo ai le malaga sa fuafuaina mo le aso ananafi, ona sa ou manatu ou te fia asia le lua fale ma se’i vaavaai poo lua saogalemu, ae o se itu na faateia ai maua ina ua ma afe atu o lo o siomia le lua fale e ta’avale a le vaega a Tomasi, ou te masalosalo na o atu e aumai se vaega tupe tele mai ia te oulua, poo le fasiotia fo’i o oulua,” o le tala lea a Kati na tagi ai le toeaina ma faapea atu i le tama, “Faafetai i lou alofa ia i maua aemaise ai Mena, ma ua ma talitonu fo’i i lona loto fesoasoani, ae o le tonu lava ua lua faia ma Mena, ma te usita’i fo’i i ai, ua ma lagona fo’i, a aunoa ma oulua e leai se isi lafitaga mo i maua.”