[Sosoo ane loa lau faitau i le tatou tala faasolo mo lenei vaiaso, lea na gata mai i le vaiaso na tea nei i le taimi lea na iloa mai ai e le olomatua Kati o lo o tu atu i fafo o le faitoto’a, ona faataga savali ane loa lea i le pito i tua ma tatala le faitoto’a.]

E le i toe misi le vaai a Kati i gaioiga uma a le tagata lea o lo o faia i totonu o le fale, o ana teuga e atagia mai ai o ia o se tagata e asiasia fale mo le toe faafouina, ae o le taavale o lo o malaga atu ai, e foliga mai o se taavale a le vaega a le tamaloa o Tomasi lea ua maliu, ona o ituaiga ta’avale nei e masani lava ona fa’aaoga e le tamaloa ma lana vaega i le Fale Talimalo. Pe tusa ma le 5 minute talu ona tu Kati i tua o le fale ae ona vaaia loa ua lulu lima le tagata lenei ma le ulugali’i, ona toe savali lea i fafo ma le fale, e ulufale le ula lea ae ulufale Kati i totonu o le fale, ona ia tuuina atu lea o pepa e faamaonia ai o ia ma lona ata o lo o i ai, ma ia faailoa i ai le mafuaaga o lona oo atu, aemaise ai o le la tama teine o Mena o lo o fa’atali mai i le ta’avale, ae o ia lea na sau e siaki mai poo saogalemu mea uma.

Na faailoa e le ulugalii ia Kati le tuutuuga lea ua uma ona latou faia ma le tagata lea sa latou talanoa, o le a toe fo’i atu i totonu o le isi lua itula e piki mai le tupe e $100,000 lea ua ia faatonuina le ulugalii e avatu, afai e leai o le a fasiotia le la tama teine o Mena. O le tomai masani o Kati i galuega faaleoleo nana, na ia faatonuina ai loa le ulugalii e o atu latou te o i le nofoaga lea o lo o la faamautu ai ma Mena, ae faitalia o ia ma faafilemu le mataupu ma le au alii faatupu faalavelave lea o lo o mananao atu i se tupe. Na pei o le emo o le mata gaioiga a le tagata lenei o Kati i le tapenaina o mea totino a le ulugalii ona latou savavali loa lea i le itu o lo o paka mai ai le ta’avale.

Na ona taunuu lava o Kati ma le ulugali’i i totonu o le ta’avale, ona toe talosaga lea o Kati i le ulugali’i ma Mena, e fa’atali atu ae se’i toe tamo’e i le fale e piki mai lana telefoni o lo o galo i luga o le fata, ae lilo i manatu o le ulugalii, ua uma ona polokalame e Kati le gaioiga o le a fai. Na ona taunuu lava o le tama, ona ia tataoina loa le o ni pomu malolosi se lua i totonu o le fale, ae faapipi’i ana tama’i satelite i le laau o lo o ola i tafatafa o le fale, e faigofie ai ona ia iloaina le taimi e taunuu ai le au faatupu fa’alavelave. E fetaui lava le taunuu o Kati ma le ulugalii atoa ai ma Mena i le fale o lo o latou faamautu ai, ae emo emo mai loa ma le uati a le tama e faailoa atu ai ua tatau ona siaki lana masini, e fetaui lava le ki atu e Kati o lana masini ae ona vaaia loa i lana satelite le Van pa’epa’e ua toe paka fo’i i luma o le fale. E le i umi ae vaaia loa e Kati ali’i e to’a fa e tofu ma le suti uliuli faatasi ai ma atopa’u i o latou lima, ua savavali aga’i i le faitoto’a, ona latou tatala lea o le faitoto’a ma ulufale i totonu e tusa ai o le latou tuutuuga, ma latou saofafa’i i luga o nofoa i le potu malolo, e le i umi ni nai sekone, ae pasae loa ma le fale ua fa’apa e Kati pomu sa tatao ai.