[Sosoo ane loa lau faitau i le tatou tala faasolo mo lenei vaiaso, lea na gata mai i le vaiaso na tea nei i le taimi lea na fiu ai Kati e tu’itu’i le faitoto’a o le fale o matua o Mena.]

Pe tusa ma le 5 minute o tu tu Kati i fafo o le faitoto’a o le fale o matua o Mena na tu’itu’i le faitoto’a e leai lava se isi na te tatalaina mai le faitoto’a, ona ta’amilo lea o le tama i le itu i tua o le fale ma autilo mai i le fa’amalama o le umu kuka, ma ia iloa mai ai le toeaina o lo o talanoa i le telefoni ae o lo o tagi lava i ona uatafa le olomatua e foliga mai e i ai se mea o lo o tupu. O le tomai o Kati i gaioiga faa leoleo nana na mafua ai ona toe savali i le ta’avale ma fa’aola ma alu ese loa mai luma o le fale o le ulugalii, ae toe mimilo mai i le isi maga’ala ma ui mai ai loa i le auala alo o lo o kami mai i tua o fale nofo nei, ona paka loa lea o le ta’avale i le isi vaega o le auala, ae faatonu e Kati ia Mena ina ia mataalia i le taimi lea o le a nofo ai na o ia i le taavale, ina ne’i alu atu se tagata faapo o ia ae na te le iloa.

“A’o fea ete alu i ai,?” o le fesili lea a Mena ma ona foliga fefe, “Aua ete popole, tago i le fana lea,” o le tala lea a Kati ma tuu atu le fana otomeki i le lima o Mena, “aua ne’i misi lau vaai ma faata ia e lua o le ta’avale, ia e maitauina gaioiga uma e tutupu mai ai, ona e sauni loa lea, o le tagata lava e sau ia te ia ae foliga mai e faatupu se vevesi, aua e te fa’atali ae fana, ua e fa’alogo mai,?” o le faatonuga lea a Kati ia Mena, ae na o le luelue o le ulu o le tama’ita’i ma lona loto popole.

E faliu Kati o le a alu ese ae toe fesili atu lava Mena, “Ao fea la ete alu i ai, e i ai se mea o tupu i le fale o o’u matua,?” na ona lua lava o laa a Kati, ona toe faasaga mai lea i tua ma tali atu ia Mena, “Aua e te popole, o lea ou te alu e toe asi le fale o ou matua poo i ai se isi i totonu poo malaga i se la feau i le taulaga.” E fai lava tala a Kati ma aapa atu lona lima ua tatala le faitoto’a o le ta’avale ma savali ese atu loa i le auala alo lea e kami atu i tua o fale nofo i le aai lea.

E alu fua Kati ae o lona loto i le taimi lea, o lo o masalosalo pei lava e i ai le tagata o lo o i totonu o le fale o le ulugalii, fua i le le mafai ona la tatala o le faitoto’a i le taimi na ia tu’itu’i atu ai. Na ona tu lava o Kati i le fa’amalama o le umukuka lea na ia tu muamua ai, ona ia toe tilotilo lea i totonu o le fale ma ia iloa atu ai le tagata e to’atasi o lo o talanoa ma le ulugali’i, na mafai fo’i ona au atu le vaai a Kati i fafo o le fale ma ia iloa atu ai le Van pa’epa’e o lo o paka mai ai, e foliga mai o se ta’avale a se aiga. Na taumafai Kati e talo talo ona lima ina ia iloa mai o ia e le olomatua lea o lo o nofo i luga o le nofoa ma faasaga mai i le itu i tua o le fale, e le i umi ae iloa mai loa e le olomatua le tagata o lo o talo talo atu i tua o le fale, ona faataga savali mai loa lea ma faamatala le loka o le faitoto’a ma lona manatu, ai o se Samaria agalelei lea ua alu atu e fesoasoani ia i laua.