[Sosoo ane loa lau faitau i le tatou tala faasolo mo lenei vaiaso, lea na gata mai i le vaiaso na tea nei i le taimi lea ua uma ai ona fasioti e Kati le tamaloa leaga o Tomasi.]

Na pei o le emo o le mata gaioiga a le tama sa faia i le taimi lea, i lona fasiotia o le tagata leaga lenei o Tomasi atoa ai ma lona faasaoina mai o le ola o le tamaitai sa taumafai le alii leaga lenei e faamalosi, ona ia faatonu lea o le tamaitai e tamo’e mo lona saogalemu, aua ne’i toe oo atu i le fale talimalo lea i se isi taimi o i luma, ao le taimi lea o lo o talanoa ai alii leoleo e toalua sa o atu ma isi tama faamoemoeina a le tamaloa o Tomasi, e aunoa ma se iloa e se isi o le mea lea ua tula’i mai. E le i umi ae vaaia e Kati tama faamoemoeina a Tomasi ua toe savavali atu i totonu o le potu ma la fana o lo o uu i la lima, ona taumafai loa lea o le isi e tatala le faitoto’a o le potu peita e le i mafai ona o lo o loka, ona tutu ai lea o alii i fafo o le faitoto’a ma le manatu, o le la tama leaga lea o lo o ia lokaina le faitoto’a, ma le lilo i o la manatu, ua leva ona feiloa’i Tomasi ma le afi i Seoli ua silia i le 20 minute talu ona maea le taimi na fana ai lona ulu i le fana otomeki e leai se po a le tama Leoleonana mai Italia.

Na avea le umi o le taimi o tutu tama faamoemoeina a Tomasi i fafo o le faitoto’a ma itu na la toe taumafai e tu’itu’i le faitoto’a ma taumafai e tatala peita’i sa loka pea e aunoa ma le tatalaina atu, na ona faataga savavali lava o le au alii ia i le isi itu o le fale, fetagofi loa i la fana ma tafana ai le faitoto’a o le potu ma ulufale faamalosi ai loa i totonu, ae o se vaaiga na matua sili ona la tete’i ai ina ua matala atu le faitoto’a ae la vaaia le la tama faamoemoeina o Tomasi o lo o oti telefua mai i luga o le moega lea sa ia faamalosia ai le tamaitai ua toe faasola e Kati, ae o ana tupe o lo o salalau solo i luga o le fola o le fale, o o fo’i i ana I.D ma isi uma pepa o lo o faamaumau ai faamatalaga e faatatau ia te ia.

E le i toe faatali le isi o le toalua lea ae ua oso atu ma oomi le ki lea e faailoa atu ai ua i ai le faalavelave faafuasei ua tupu, ma vaaia ai loa le pisi solo o tama faamoemoeina a Tomasi ma fana e saili le tagata ua ia fasiotia le latou ta’ita’i, a’o o Kati i le taimi lea, ua uma ona tapena ese uma ana mea pu’eata sa faapipii i totonu o le potu lea na ia fasiotia ai Tomasi, ma ua toe savali aga’i atu i lana taavale, faaola ma alu ese loa. “O fea oe,?” o le fesili lea a le tamaitai ia Kati, “O a’u lea ua alu ese mai ma le fale talimalo, o lea ua ou aga’i atu i le fale kofe lea e i tafatafa o le fale ofu o lo o i luga o le magatolu, ta fetaui ai iina i le isi 10 minute,” o le tala lea a Kati i le tamaitai lea ua la galulue faatasi i lana malologa i Enelagi, ona tago lea ua tape lana telefoni ae ki faaleotele i luga lana musika ma ata ee i totonu o le taavale i le mata’utia o le mea lea ua tupu, e aunoa ma le iloa e se isi o le vaega faatupu faalavelave i totonu o Enelagi, o ia o le leoleonana mai Italia o lo o fai malologa atu i totonu o le latou atunuu.