Ads by Google Ads by Google

FAGOGO: O KATI LE LEOLEO NANA

[Sosoo ane loa lau faitau i le tatou tala faasolo mo lenei vaiaso, lea na gata mai i le vaiaso na tea nei i le taimi lea na faatonu ai e Tomasi ana auauna e ave soo se fafine po o se tamaitai o lo o i totonu o le fale talimalo e faamalie ai lona mana’o.]

 

Na ona uma lava ona faatonu e le tamaloa leaga o Tomasi o ana tama faapitoa e vaai soo se tamaitai o lo o i totonu o le fale e ave faamalosi, amata loa ona savavali solo auauna a le tagata leaga lenei i totonu o potu o lo o mautotogi ai ulugalii ma so o se tagata, e siaki pe i ai ni fafine po o ni tamaitai lalelei, e lei umi ae faalogoina e Kati le tau fai feei mai o nai fafine ma tamaitai ua aveese faamalosi mai i totonu o potu o lo o nonofo ai ma latou taitoalua.

 

E le i ano tele Kati i gaioiga o lo o faia ona o lo o taumafai e pu’e lelei i ana masini faalilolilo gaioiga uma o lo o faia, ae o le taimi foi lea e tasi o lo o faasalalau tuu sa’o ai i luga o initaneti gaioiga faale alofa o lo o faia e Tomasi ma lana vaega, ma faigofie ai loa ona iloa e le ofisa o leoleo a Enelagi mea o lo o tutupu i totonu o le fale talimalo, ma e le i umi se taimi ae vaaia le tau fai lolofi atu o taavale a leoleo ma si’omia atoa le lotoa e o o lava i totonu o le fale lea o lo o faia ai taaloga Casino, ua li’o uma e leoleo.

 

“O fea o i ai la outou ta’ita’i,?” o le fesili fia iloa lea a le ta’ita’i leoleo na savali atu i totonu o le fale, ae na tali i ai le auauna, “O Tomasi o lo o i totonu o lona potu fono.” E le i toe tu le leoleo ae na savali faasasa’o i le potu fono na te fia maua Tomasi se i talanoa i ai i ata ia ua faasalalau e le tagata i luga o le initaneti lea ua mafua ai ona latou o atu, na ona matala lava o le potu, ulufale ma le ta’ita’i leoleo ae faalogoina loa e Kati le pa o le fana.

 

Na ona faalogo lava o Kati i le pa o le fana, savali faanatinati loa i totonu o lona potu ma aumai au a’upega otomeki, ona seki loa lea o lana osofaiga o le a alu i totonu o le potu o lo o i ai Tomasi ma ana auauna. Na vaaia e Kati auauna e to’alua sa i totonu o le potu a le tamaloa ua savavali mai i fafo ma aga’i atu i le vaega tonu o lo o i ai taavale a leoleo, ma e foliga mai e i i ai se fesootaiga a nisi o leoleo ma le tagata leaga lenei o Tomasi. E le i toe faatali Kati ina ua ia iloa toe lava o Tomasi o lo o i totonu o le potu fono lea na fana mai ai le ta’ita’i leoleo, ae ua ia faanatinati atu loa i le isi itu o le fale talimalo ma saili mai ai lona auala e ulufale atu ai i totonu o le potu fono, ma ina ua maua lona avanoa i totonu o le potu fono, na te’i le tama ina ua ia vaaia le isi tama’i potu o lo o i tua atu o le potu fono, o lo o i ai na o Tomasi ma le isi tama’ita’i, o lo o ia faamalosi le tamaitai e ala i le faia i ai o uiga mataga, ae o lo o pu’e uma e ana masini pu’eata o lo o faapipi’i solo i tulimanu o le potu, e le i toe faatali Kati ae ua ulufale i totonu o le potu, ona ia muamua lea pu’e le ata o Tomasi ma lana gaioiga o lo o faia, faatoa aapa atu ai loa i lana fana ma fasioti ai loa le tamaloa leaga lea o Tomasi.