[Sosoo ane loa lau faitau i le tatou tala faasolo mo lenei vaiaso, lea na gata mai i le vaiaso na tea nei i le taimi lea na faateia ai Kati ina ua ulufale faafuase’i atu se tagata e laei mama ma ni ana auauna se to’atele i totonu o le Casino, ma o le tagata tonu lava lea e suafa ia Tomasi o lo o ia tau sailia.]

Ua faasolo pea le taaloga i lea afiafi ma ua vaaia e Kati le tau fai onana uma o le to’atele o tagata o lo o tafafao ai i le Casino, e le i umi ae vaaia loa e le tama ni ali’i se to’alua e foliga mai o ni tama faapitoa a le tagata lenei o Tomasi, o savavali atu ma talanoa i se tamaitai lalelei lava sa ta’aalo mai ma lana uo tama i le isi laulau, mulimuli ane ua la ta’ita’i fa’amalosi lea tama’ita’i i le isi itu o le fale ma le i toe vaaia ai o ia i le taimi atoa na sosoo ane ai. Ua fesoota’i Kati i lana paga faapitoa o Ianeta lea ua la fesoota’i e faailoa i ai mea uma ia ua tutupu i totonu o le fale talimalo, ae poo fea fo’i e ave aga’i i ai tamaita’i pe afai e mana’o i ai le tagata leaga lenei.

Na faailoa uma ane e Ianeta ia Kati potu eseese o le fale talimalo e tatau ona ia faaeteete i ai, atoa ai ma le vaega tonu lea e faamautu uma i ai leoleo faapitoa a le tamaloa, ina ne’i sasi sana gaioiga e fai ona mateia lea o ia ma fasiotia loa. I le aoauli i le taimi tonu lea ua malaga taamilo Tomasi ma ana auauna i le taulaga, na taamilo ai loa Kati i totonu o le fale talimalo atoa ma faapipi’i solo ana measini pu’eata i faitoto’a ma nofoaga e faigofie ona ia maua ai gaioiga uma o lo o faia, atoa ai ma le tau sailia o tamaita’i o lo o ave faamalosi e Tomasi ma lana vaega faatupu faalavelave. Na ona maea lava ona faapipii o masini a le tama i nofoaga eseese o le fale, ona ia taumafai loa lea e faaaoga totonu o lona potu e fai ma nofoaga autu o fesootaiga, ina ia faigata ona mateia e se tasi. Ina ua oo i le afiafi o le aso na sosoo ai sa toe alu Kati i le Casino e nofonofo ma taalo ai pe na te toe vaaia ai Tomasi ma ana tama faapitoa, o le taimi lea, ua alu sauni Kati ma ana a’upega, ua le toe popole fo’i i se isi lava mea e ono tula’i mai, aua ua mautu tonu uma ua faia ma le tamaitai o Ianeta e tusa ai o gaioiga uma e tatau ona faia.

E le i umi ona taalo Kati i masini Casino ae vaaia loa fo’i tama faapitoa a Tomasi ua ulufale atu i totonu, e le i umi ae ulufale ma le tamaloa, ona valaau fo’i lea i tagata uma lava o lo o taaalo ina ia aga’i uma atu i le laulau e tasi latou te taaalo faatasi ai, ona ia tufa fo’i lea o tupe i tagata uma lava e aofia ai ma ia o lo o i ai i totonu o le fale Casino. E le i umi ae vaaia loa e Kati isi tama faapitoa a Tomasi ua savavali solo e saili ni tamaitai la lelei e ave ma le latou tama ta’ita’i, ma ua fiu e taamilo e le o i ai ni tamaitai lalelei i totonu o le fale i le taimi lea, ma sa avea lea ma itu na ita ai loa le tamaloa o Tomasi ma fai loa lana faatonuga i auauna e vaai nisi tamaitai o i totonu o le fale e ave i totonu o le nofoaga faapitoa lea o lo o masani ona ave i ai isi tamaitai.