[Sosoo ane loa lau faitau i le tatou tala faasolo mo lenei vaiaso, lea na gata mai i le vaiaso na tea nei i le taimi lea ua sui ai teuga a le tama ua uma lana gaioiga faavavave sa faia i le faaumatiaina o le vaega leaga sa taumafai e osofa’i le fafine ave taxi ma lana tama.]

Na lilo i le manatu o le tama o le taimi mulimuli lea na te toe vaaia ai foliga o lenei Samaria agalelei ma lana tama, sa fesoasoani atu ia te ia i le taimi na toeititi ai lava osofa’i o ia e le au faatupu faalavelave. Na ona uma lava ona sui o ofu o le tama, savali atu loa i le potu malolo o le a ki le TV e matamata le news, ae ona vaaia lea ni taavale se lua o ui ane i tafatafa o le fale e aga’i i tua. Na pei o le emo o le mata gaioiga a le tama i le taimi lea, i lona valaau atu i le fafine e toe o e lalafi, ae ua tago le tama i lana fana ma tamo’e i le isi faitoto’a tulimanu ma le faamoemoe o le a oso i fafo e vaai poo a ia taavale e aga’i atu i le pito i tua o le fale, peitai e tuai gaioiga a Kati ae ona faalogoina le pa pa o ni fana, ona ia faalogoina lea o se leo o lo o ee, e le’i umi ae ona toe faalogoina ua toe pa le isi fana.

E lei toe faatali Kati i le taimi lea, ae ua oso loa i fafo ma le fale ma tamo’e loa aga’i i le isi itu o le pa laau lea e le mafai ona iloa atu ai se tagata, ma taumafai e tuli mata’i gaioiga uma o lo o faia i le pito i tua o le fale, ma ia iloa atu ai ni alii se toafa, o lo o tutu i tua o le fale ae o lo o taatitia le fafine ave taxi ma lana tama i tafatafa o Sipi uli e lua ua uma ona fasioti. E lei toe faatali Kati ae ua aapa atu loa lana fana otomeki lea e faaaoga i taimi o ana osofaiga ma ia osofa’i ai loa le au alii ia o lo o laulau tutu mai i fafo ma feoti uma ai, ona ia faanatinati atu loa lea e fesoasoani i le fafine ma lana tama peitai e taunuu atu, ua maliu le fafine sei vagana ai le teineititi na o lona vae na fana ae o lo o ola pea o ia, ma e lei toe faatali le tama ae ua faanatinati loa e fai ana gaioiga fesoasoani, ona ia tuu lea o le teneietiti i totonu o le isi Sipi uliuli ma la faanatinati atu loa i le falema’i, ae o le taimi lava fo’i lea o lo o ia viliina leoleo ma le taavale a le falema’i mo se fesoasoani.

Na maofa le tama ina ua ia vaaia totonu o le Sipi o lo o i ai le tele o masini e faaaoga i fesootaiga faapea ai ma ni a’upega malolosi e le o faaaoga e le Ami ma Leoleo, a’o lea e feavea’i e le au faatupu faalavelave. O totonu o le taavale o lo o i ai nisi o faamaumauga e aofia ai tusi folau ma ata o tagata ua uma ona fasiotia, ma e silia i le 200 tusi folau sa maua e le tama i totonu o le taavale, o nisi o tagata e ana tusi folau e aofia ai leoleo, tagata faipisinisi ae toatele lava i teine aoga. Na fiu le tama e tau saili faamaumauga pe maua ai se faamatalaga e faatatau ia te ia na te le’i maua, pau le itu na ia iloa, o ia e toatasi lea o lo o ogatotonu i ai taumafaiga uma a le vaega leaga o lo o faia, ina ia mafai ona fasiotia o ia.